2 Timoteyo 1:1-18
1 Ndime Paulo, imwaapostolo wa Kristo Jesu kwiinda mukuyanda kwa Leza ikweelana acisyomezyo cabuumi bujanwa kwiinda muli Kristo Jesu,+
2 nendalembela nduwe Timoteyo, omwanaangu uuyandwa+ kuti:
Iluzyalo, luse alimwi aluumuno kuzwa kuli Leza Taata akuli Kristo Jesu Mwami wesu azibe anduwe.
3 Ndamulumba Leza, ooyo ngondibelekela mulimo uusetekene mbubonya mbobakacita bamatata, alimwi amanjezyeezya aasalala kunyina nondileka kukwiibaluka mumipailo yangu yakukombelezya, syikati amasiku.
4 Ciindi nondiyeeya misozi yako, ndilayandisisya kukubona, ikutegwa ndikondwe kapati.
5 Nkaambo ndilaluyeeya lusyomo+ ndojisi ilutali lwakuupaupa ameso, oolo cakusaanguna ilwakali muli bakaapanyoko ba Loisi amuli banyoko ba Yunisi, pele ndondisyoma kuti moluli amulinduwe.
6 Akaambo kaceeci ndikuyeekezya kuti ucivwilimye mbuli mulilo cipego ca Leza icili mulinduwe ncookapegwa nindakabikka maanza aangu alinduwe.+
7 Nkaambo Leza tanaakatupa muuya wabukandu pe,+ pele wakatupa muuya wanguzu+ aluyando alimwi akuyeeya kabotu.
8 Aboobo utafwi nsoni kucitila bumboni kujatikizya Mwami wesu+ naa kujatikizya ndime, ndemwaange akaambo kanguwe, pele kolibambila kupengela+ makani mabotu kwiinda mukusyoma nguzu zya Leza.+
9 Wakatufwutula akutwiita abwiite busalala,+ ikutali akaambo kamilimo yesu pe, pele akaambo kamakanze aakwe mwini alimwi aluzyalo lwakwe.+ Luzyalo oolu wakatupa muli Kristo Jesu ikaindi,
10 pele lino lwalibonya antangalala kwiinda mukuyubunuka kwa Mufwutuli wesu, Kristo Jesu,+ ooyo iwamanizya lufwu+ akumunikila buumi+ akutabola+ kwiinda mumakani mabotu,+
11 aayo ngondakasalilwa kuti ndibe mukambausi, mwaapostolo alimwi amwiiyi.+
12 Nkakaambo kaako ncondipengela boobu alimwi,+ pele tandifwi nsoni pe.+ Nkaambo ndilimuzyi ngondisyoma, alimwi ndilisinizyide kuti ulakonzya kucibamba eeco ncendibikkide mumaanza aakwe mane kusikila kubuzuba oobo.+
13 Kozumanana kukakatila kuceelelo* camajwi mabotu*+ alimwi meni-meni ngookamvwa kulindime icalusyomo aluyando lujanwa akaambo kakukamantana a Kristo Jesu.
14 Kocibamba kabotu cintu eeci ciyandisi cibikkidwe mumaanza aako kwiinda mumuuya uusalala uuli mulindiswe.+
15 Ulaazyi makani aaya aakuti bantu boonse mucooko ca Asiya+ bandimwaika akundisiya, kubikkilizya a Fugelo alimwi a Hermogene.
16 Mwami abafwide luse baŋanda ya Onesiforo,+ nkaambo ziindi zinji wakali kundikulwaizya, alimwi kunyina naakafwa nsoni pe akaambo kanketani zyangu.
17 Muciindi caboobo, naakali mu Roma, wakasungwaala kundiyandaula kusikila mane wandijana.
18 Mwami amupe kuti akafwidwe luse a Jehova* mubuzuba oobo. Alimwi yebo uliizyi kabotu milimo yoonse njaakabeleka ku Efeso.
Bupanduluzi buyungizyidwe
^ Naa “kucitondezyo.”
^ Naa “aagwasya.”
^ Amubone Makani Aayungizyidwe A5.
