2 Makani 7:1-22
7 Lino mbwaakamanina buyo kupaila Solomoni,+ kwakaboola mulilo kuzwa kujulu+ akuumpa cituuzyo cuumpwa alimwi azipaizyo, eelyo bulemu bwa Jehova bwakazuzya ŋanda.+
2 Bapaizi tiibakali kukonzya kunjila muŋanda ya Jehova nkaambo bulemu bwa Jehova bwakazuzya ŋanda ya Jehova.+
3 Lino bana Israyeli boonse bakali kulangilila ciindi mulilo nowakaseluka alimwi abulemu bwa Jehova nobwakaboola aŋanda, eelyo bakakotama akuvwuntama ansi akulumba Jehova, “nkaambo mubotu; luyando lwakwe lutamani nkoluli lyoonse mane kukabe kutamani.”
4 Lino mwami abantu boonse bakatuula zipaizyo kubusyu bwa Jehova.+
5 Mwami Solomoni wakatuula zipaizyo zyaŋombe zili 22,000 ambelele zili 120,000. Aboobo mwami abantu boonse bakayaaba ŋanda ya Leza mwini-mwini.+
6 Bapaizi bakaliimvwi mumasena aabo, mbubonya mbuli ba Levi ibakajisi zibelesyo zyakwiimbya nyimbo kuli Jehova.+ (Mwami Davida wakapanga zibelesyo eezyi kulumbya Jehova—“nkaambo luyando lwakwe lutamani nkoluli lyoonse mane kukabe kutamani”—ciindi Davida naakali kutembaula Leza antoomwe ambabo.*) Alimwi bapaizi bakailizya kapati myeembo+ kumbele lyaba Levi, ciindi bana Israyeli boonse nobakaimvwi.
7 Mpoonya Solomoni wakasalazya akati kalubuwa ilwakali kumbele lyaŋanda ya Jehova, nkaambo ooko nkwaakeelede kutuulila zituuzyo zyuumpwa+ amafwuta aazipaizyo zyalumvwano, nkaambo cipaililo camukuba+ eeco Solomoni ncaakapangide tiicakali kukonzya kukkwana zipaizyo zyuumpwa, zituuzyo zyamaila+ alimwi amafwuta.+
8 Aciindi eeco Solomoni wakacita pobwe antoomwe abana Israyeli boonse mazuba aali ciloba,+ imbungano mpati kapati iyakabungene kuzwa ku Lebo-hamati* kusikila ku Kalonga* kakukkuti lya Egepita.+
9 Pele mubuzuba bwalusele* bakaba amuswaangano uusetekene,+ nkaambo kwaabwa kwacipaililo bakakucita mazuba aali ciloba alimwi apobwe mazuba aali ciloba.
10 Mpoonya mubuzuba bwa 23 bwamwezi waciloba wakabamwaisya bantu kuti baunke kumaanda aabo, kabayaabusekelela+ akukondwa kapati mumyoyo yabo akaambo kabubotu Jehova mbwaakacitila Davida, Solomoni alimwi abantu bakwe bana Israyeli.+
11 Aboobo Solomoni wakamanizya kuyaka ŋanda ya Jehova aŋanda yamwami;+ alimwi kufwumbwa Solomoni ncaakayeeya kucita mumoyo wakwe kujatikizya ŋanda ya Jehova alimwi aŋanda yakwe, wakacicita akuzwidilila.+
12 Kumane Jehova wakalibonya masiku kuli Solomoni+ akumwaambila kuti: “Ndaumvwa mupailo wako alimwi ndasala busena oobu kuti bube ŋanda yakutuulila zipaizyo.+
13 Ciindi ndaasinka majulu kuti mvwula itawi akulailila cisozi kuti cilye zisyango alimwi akuti naa ndatuma cilwazi akati kabantu bangu,
14 ikuti bantu bangu ibaitwa azina lyangu+ balibombya,+ bapaila akundiyandaula alimwi akuleka nzila zyabo zibyaabi,+ ndiyooswiilila kujulu nkondibede akubalekelela zibi zyabo alimwi ndiyooponya nyika yabo.+
15 Lino meso aangu ayoobona alimwi amatwi aangu ayooswiilila mipailo iipailwa abusena oobu.+
16 Aboobo ndaisala akwiisalazya ŋanda eeyi kuti izina lyangu libe alinjiyo kukabe kutamani,+ alimwi meso aangu amoyo wangu zinooli alinjiyo lyoonse.+
17 “Lino ikuti yebo weende kubusyu bwangu mbubonya Davida uso mbwaakeenda kwiinda mukucita zyoonse nzindakulailila akubamba milawo yangu ambeta zyangu,+
18 nkokuti ndiyookkazikizya cuuno cabwami bwako,+ mbubonya mbondakapanga cizuminano a Davida uso+ kuti, ‘Takukabuli muntu wamukwasyi wako weendelezya bana Israyeli.’+
19 Pele ikuti naa nywebo mukandifwutatile akuleka kutobela malailile amilawo yangu njindamupa akutalika kubelekela baleza bambi akubakotamina,+
20 ndiyoomuzyula Israyeli munyika yangu njindakamupa,+ alimwi ŋanda eeyi njindasalazizya izina lyangu ndiyakwiisiya akupa kuti ibe cintu ciweelwa* alimwi cisampaulwa akati kabantu boonse.+
21 Alimwi ŋanda eeyi iyooba tongo. Kufwumbwa muntu wiinda afwaafwi anjiyo uyoogambwa+ akwaamba kuti, ‘Ino nkaambo nzi Jehova ncaakaicitila boobu nyika eeyi alimwi aŋanda eeyi?’+
22 Eelyo bayakwaamba kuti, ‘Nkaambo bakamusiya Jehova+ Leza wabamausyi iwakabagwisya mucisi ca Egepita,+ bakalijanina baleza bambi akubakomba alimwi akubabelekela.+ Nkakaambo kaako wakabaletela mapenzi aaya oonse.’”+
Bupanduluzi buyungizyidwe
^ Ambweni kwaamba ba Levi.
^ Naa “kumanjililo aa Hamati.”
^ Amubone Bupanduluzi Bwamabala.
^ Buzuba bwakatobela pobwe, naa buzuba bwa 15.
^ Mu Chihebrayo, “kasimpi.”
