Boroutšhara jwa Ke Bomang ba ba Dirang Thato ya ga Jehofa Gompieno? bo diretswe gore re bo dirise pele re tshwara thuto ya Baebele kgotsa morago ga yone. * Thuto 1 go ya go 4 e bua ka Basupi ba ga Jehofa, thuto 5 go ya go 14 e bua ka ditiro tsa Basupi mme thuto 15 go ya go 28 e bua ka phuthego ya Modimo. Go ka nna molemo go dira dithuto tseno ka go latelana ntle le fa go na le ntlha nngwe e lo tlhokang go tlotla ka yone ka nako eo. Dithuto tsa boroutšhara jono ga di ditelele mme lo ka tlotla ka tsone mo metsotsong e le metlhano go ya go e le lesome.

• Botsa potso e e mo setlhogong sa thuto nngwe le nngwe

• Bala thuto yotlhe kgotsa bala serapa sengwe le sengwe

• Tlotlang ka se lo sa tswang go se bala. Dirisa ditshwantsho le dipotso tse di kwa bofelong jwa setlhogo. O ka nna wa bala ditemana tse di umakilweng lo bo lo tlotla ka tsone. Tlhalosa gore ditlhogwana tsa mmala o montsho di araba potso ya setlhogo

• Fa go na le lebokoso la “Ithute mo go Oketsegileng,” lo baleng mmogo o bo o mo kgothaletsa gore a dirise dintlha tsa lone