Re mo kotsing ya go lebana le ntwa ya nuklea, ka gonne dipuso tse dikgolo di nna di ntse di oketsa dibetsa tsa tsone tsa nuklea. Go a utlwala go bo batho ba tshwenyegile ka go oketsega ga dibetsa tsa nuklea, ka gonne fa di ntse di oketsega matshosetsi a ntwa ya nuklea le one a oketsega. Gape ba tshwenngwa ke gore fa naga nngwe e ka dirisa sebetsa se sennye fela sa nuklea, seno se ka simolola ntwa e e kgolo ya nuklea e e ka senyang lefatshe. Bulletin of the Atomic Scientists e a re, “re tshelela mo letshogong la gore go tla nna le ntwa ya nuklea.”

 A go ka nna le ntwa ya nuklea? Fa e ka nna gone, a polanete ya rona e tla falola? Re ka dira eng fa re tlhobaela ka kgang eno? Baebele e a reng?

Mo setlhogong seno:

•  A Baebele e ile ya bolelela pele ka ntwa ya nuklea?

•  A Modimo a ka letlelela ntwa ya nuklea?

•  A polanete ya rona e tla falola?

•  O ka dira eng fa o tlhobaela ka gore go tla nna le ntwa ya nuklea?

•  A boporofeti jwa Baebele bo bontsha gore ntwa ya Aramagedona e tla nna ya nuklea?

•  Baebele e a re tharabololo ya dintwa ke eng?

•  A buka ya Baebele ya Tshenolo e bua ka ntwa ya nuklea?

 A Baebele e ile ya bolelela pele ka ntwa ya nuklea?

 Baebele ga e bue ka tlhamalalo ka ntwa ya nuklea. Le fa go ntse jalo, matshosetsi a ntwa ya nuklea a bakiwa ke mekgwa le ditiragalo tse Baebele e di boleletseng pele.

 Bapisa ditemana tseno tsa Baebele le se se diragalang gompieno:

 Ditemana tsa Baebele: Barutwa ba ga Jesu ba ile ba mmotsa ba re: “Sesupo sa gore o gone le sa gore ke malatsi a bofelo e tla nna eng?” Jesu o ile a ba araba a re: “Setšhaba se tla tlhasela setšhaba se sengwe le bogosi bo tla tlhasela bogosi jo bongwe.”​—Mathaio 24:3, 7.

 Se se diragalang gompieno: Gantsi dinaga tse di lwang, di na le dibetsa tsa nuklea kgotsa bokgoni jwa go di dira.

 “Go tletse thubakanyo mo lefatsheng go feta le fa e le leng pele mme koketsego ya dintwa e kwa godimo fela thata.”​—The Armed Conflict Location & Event Data Project.

 Temana ya Baebele: “Mo motlheng wa bokhutlo kgosi ya borwa e tla kgorometsana le [kgosi ya bokone].”​—Daniele 11:40.

 Se se diragalang gompieno: Dinaga tse di sa utlwaneng le tse di di emang nokeng, di lwela go nna le maatla fela jaaka Baebele ile ya bolelela pele. Le fa gone dinaga tse di nang le dibetsa tsa nuklea di sa lwantshane, di tswelela di tokafatsa dibetsa tsa tsone tsa nuklea.

 “Mo dingwageng di le lesome tse di fetileng, go nnile le koketsego e kgolo ya dintwa magareng ga dinaga mme dinaga tse di nang le maatla di ema nokeng matlhakore a a farologaneng a dinaga tse di lwang.”​—The Uppsala Conflict Data Program.

 Ditemana tsa Baebele: “Mo malatsing a bofelo, go tla nna le dinako tse di thata e bile di le kotsi. Gonne batho . . . ba sa batle go dumalana le ba bangwe ka sepe, ba senya batho maina, ba sa ithibe mo go sepe, ba le bogale jo bo tshabegang.”​—2 Timotheo 3:1-3.

 Se se diragalang gompieno: Fela jaaka batho ba le bantsi ba sa dumalane mo dilong dingwe, le baeteledipele ba lefatshe ba dira se se tshwanang. Go na le gore ba rarabolole dikgotlhang tsa bone ka kagiso ba leka go di rarabolola ka go nna dikgoka mme seo se dira gore go nne le matshosetsi a ntwa ya nuklea.

 “Dikgotlhang tseno di tla nna maswe le go feta fa go sa nne le tirisanommogo.”​—S. Saran le J. Harman, World Economic Forum.

 A Modimo a ka letlelela ntwa ya nuklea?

 Baebele ga e bue sepe ka seo mme e a re mo nakong e re tshelang mo go yone go tla nna le ditiragalo tse di “tshosang” kana tse di gakgamatsang. (Luke 21:11) Ditiragalo tseo di akaretsa bomo ya atomo e e neng ya latlhelwa ka nako ya Ntwa ya Bobedi ya Lefatshe. Baebele e tlhalosa gore ke eng fa Modimo a letleletse dintwa. Go ithuta mo go oketsegileng, bona bidio e e reng Goreng Modimo a sa Fedise Dilo Tse di Bosula?

 A polanete ya rona e tla falola?

 Ee. Le fa batho ba ka dirisa dibetsa tsa nuklea gape, Modimo ga a na go letla seo go senya lefatshe. Baebele e bontsha gore lefatshe le tla fenya matshosetsi a a lebaneng le one le gore batho ba tla tshelela ruri mo go lone.

 Batho bangwe ba akanya gore mo nakong e e tlang, go tla bo go tshela batho ba sekae fela mo lefatsheng le le tla bong le sentswe ke ntwa ya nuklea. Le fa go ntse jalo, Baebele e bontsha gore tshenyo e e bakilweng ke dintwa e tla baakanngwa.

 Mmopi wa rona o bopile lefatshe ka tsela ya gore le nne le bokgoni jwa go ipaakanya. Modimo o tla dirisa maatla go baakanya lefatshe le le tla nnang legae le le ntle la batho ka bosakhutleng.​—Pesalema 37:11, 29; Tshenolo 21:5.

 O ka dira eng fa o tlhobaela ka gore go tla nna le ntwa ya nuklea?

 Bangwe ba ka tswa ba tlhobaela ka gore go tla nna le ntwa ya nuklea kgotsa ba tshaba ntwa ya nuklea le ditlamorago tsa yone. Tsholofelo ya Baebele le kgakololo ya yone e ka thusa ba ba tlhobaelang ka kgang eno gore ba se ka ba tshoga thata. Jang?

 Baebele e solofetsa bokamoso jo bo itumedisang ka lefatshe le ba ba nang mo go lone. Go ithuta ka tsholofelo eno go ka nna jaaka “tshetledi ya matshelo a rona,” mme ga fokotsa ditlhobaelo tsa rona. (Bahebera 6:19) Re ka fokotsa go tlhobaela ka go akanya ka se se diregang gone jaanong mme e seng ka se se tla diragalang mo nakong e e tlang. Fela jaaka Jesu a ile a re, “Letsatsi lengwe le lengwe le na le mathata a lone.”​—Mathaio 6:34.

 Go botlhokwa gore re itlhokomele e le gore re kgone go akanya sentle le go wela makgwafo. Re ka dira seo ka go fokotsa go batla go itse tshedimosetso e e ka dirang gore re tlhobaele, jaaka go nna karolo ya metlotlo kgotsa go reetsa dikakanyo tsa ba bangwe ka ga dikgang tsa bosheng tse di kaga nuklea. Seno ga se reye gore re itlhokomolosa se se diragalang. Go na le moo, re dira sotlhe se r ka se kgonang gore re se ka ra akanya ka dilo tse re ka se kang ra kgona go di fetola le dilo tse gongwe di se kitlang di direga.

 Go na le go akanya ka dikgang tse di bosula, iphe nako ya go akanya ka dilo tse di siameng tse di diregang mo botshelong jwa gago.

 Go ithuta mo go oketsegileng ka ditsholofetso tsa Modimo go ka go naya tsholofelo, boitumelo le kagiso.

 A boporofeti jwa Baebele bo bontsha gore ntwa ya Aramagedona e tla nna ya nuklea?

 Bangwe ba akanya gore Aramagedona ke ntwa ya lefatshe lotlhe ya nuklea. Ntle le pelaelo, ba akanya ka tshenyo e e kgolo e e tla nnang teng ka ntlha ya tiragalo eno.

 Le fa go ntse jalo, fa Baebele e dirisa lefoko “Aramagedona,” e raya ntwa magareng ga “dikgosing tse di mo lefatsheng lotlhe” kana dipuso tsa batho le Modimo. a (Tshenolo 16:14, 16) Aramagedona ga e kitla e senya lefatshe fela jaaka bomo ya nuklea e ka dira. Go na le moo, ka nako ya Aramagedona, Modimo o tla fedisa batho ba ba bosula mme a dire gore go nne le kagiso le tshireletsego.​—Pesalema 37:9, 10; Isaia 32:17, 18; Mathaio 6:10.

 Baebele e a re tharabololo ya dintwa ke eng?

 Jehofa b Modimo o tla dirisa maatla a gagwe go emisa dintwa tsa ditšhaba le go nyeletsa dibetsa tse di dirisiwang mo ntweng. O tla dira seno a dirisa Bogosi jwa gagwe, e leng puso ya kwa legodimong e e tla busang lefatshe lotlhe.​—Daniele 2:44.

 Bogosi jwa Modimo bo tla ruta batho go tshela mmogo ka kagiso. E re ka go tla bo go busa puso e le nngwe fela mo lefatsheng, dikgogakgogano ga di kitla di tlhola di nna teng e bile batho ga ba kitla ba ithuta ntwa gape. (Mika 4:1-3) Diphelelo e tla nna eng? “Mongwe le mongwe o tla nna ka kagiso mo tshimong ya gagwe ya morara le mofeige mme ga go na ope yo o tla mo boifisang.”​—Mika 4:4, Today’s English Version.