Makgolo a dingwaga a le manè fa go sena go kwalwa buka ya bofelo ya karolo ya Sehebera ya Baebele, boporofeti jwa ga Mika jo bo buang ka Mesia bo ne jwa diragadiwa: Jesu o ne a tsholelwa kwa Bethelehema. Mo e ka nnang dingwaga di le 30 moragonyana, ka 29 C.E., karolo ya ntlha ya boporofeti jwa ga Daniele jo bo ka ga go tla ga Mesia e ne ya diragadiwa. Jesu o ne a kolobediwa mme Modimo a mo tlotsa ka moya o o boitshepo. Ka nako e e tshwanetseng, Mesia yo o sa bolong go letelwa, Losika, o ne a goroga!

Ka bonako fela Jesu o ne a simolola bodiredi jwa gagwe “a bolela dikgang tse di molemo tsa bogosi jwa Modimo.” (Luke 8:1) Fela jaaka go ne go boleletswe pele, Jesu o ne a le pelonomi, a le bonolo e bile a amega tota ka batho ba bangwe. Dithuto tsa gagwe di ne di solegela batho molemo e bile o ne a alafa “bolwetse jwa mofuta mongwe le mongwe,” a bontsha gore Modimo o na le ene. (Mathaio 4:23) Batho ba dingwaga tsotlhe ba ne ba thologela kwa go Jesu mme ba re: “Re bone Mesia”!—Johane 1:41.

Jesu o ne a bolelela pele gore pelenyana fela ga gore Bogosi jwa gagwe bo nne le taolo e e feletseng, go tla nna le dintwa, dithoromo tsa lefatshe le mathata a mangwe a mantsi mo lefatsheng. O ne a rotloetsa batho botlhe go ‘nna ba disitse.’—Mareko 13:37.

Jesu e ne e le monna yo o itekanetseng yo o neng a nna a le kutlo mo Modimong mme o ne a na le baba ba kgabagare ba neng ba mmolaya. Ka tsela eo, loso lwa gagwe lo ne lwa nna setlhabelo se se itekanetseng go dira gore re boe re bone se Adame le Efa ba se latlhileng—tsholofelo ya botshelo jo bo sa feleng mo Paradaiseng.

Loso lwa ga Jesu lo ne lwa diragatsa boporofeti, mme fa Modimo a tsosa Jesu mo baswing morago ga malatsi a le mararo gore a nne sebopiwa sa moya, le gone go ile ga diragatsa boporofeti. Morago ga foo, Jesu o ne a tlhagelela mo barutweng ba gagwe ba ba fetang 500. Pele ga a tlhatlogela kwa legodimong, Jesu o ne a laela balatedi ba gagwe gore ba ise dikgang tse di molemo ka ga gagwe le ka ga Bogosi jwa gagwe kwa ‘bathong ba ditšhaba tsotlhe.’ (Mathaio 28:19) Ba ne ba diragatsa tiro eo ka botlalo go le kana kang?

—E theilwe mo go Mathaio, Mareko, Luke, Johane, 1 Bakorintha.