Bana ba Tshwanetse go Rutiwa Eng?

“Lokwalo lotlhe lo tlhotlheleditswe ke Modimo e bile lo tswela mosola mo go ruteng, mo go kgalemeleng, mo go tlhamalatseng dilo, mo go otlhayeng ka tshiamo.”—2 TIMOTHEO 3:16.

BANA ba tshwanetse go rutiwa boammaaruri ka Modimo. Ba ka bona boammaaruri joo kae? Mo bukeng ya bodumedi e e tseelwang kwa godimo go gaisa tse dingwe tsotlhe mo lefatsheng, Baebele.

Baebele e ntse jaaka lekwalo le le tswang kwa Modimong. Mo lekwalong leo, Modimo o tlhalosa botho jwa gagwe e bile o dira gore bana ba gagwe botlhe, ba bannye le ba bagolo, ba bone kaelo malebana le boitsholo jo bo siameng. Ela tlhoko dithuto di se kae fela tse di mo Baebeleng le se tota le bana ba ka se ithutang mo go tsone.

Modimo o batla gore re itse eng ka ene?

▪ Se Baebele e se rutang: “Wena, yo leina la gago e leng Jehofa, wena o le esi o Mogodimodimo yo o okametseng lefatshe lotlhe.”—Pesalema 83:18.

Se re se ithutang: Modimo ga se maatla mangwe a a rileng mme ke Motho wa mmatota wa moya yo o nang le leina le le mo tlhaolang.

▪ Se Baebele e se rutang: “Jehofa o hukutsa dipelo tsotlhe, e bile o lemoga tshekamelo nngwe le nngwe ya dikakanyo. Fa o mmatla, o tla dira gore o mmone.”—1 Ditiragalo 28:9.

Se re se ithutang: Jehofa Modimo o amega ka rona rotlhe, go akaretsa le bana ba bannye. (Pesalema 10:14; 146:9) O batla gore re ithute ka ene.

▪ Se Baebele e se rutang: “Lo se ka lwa bogisa . . . mosimane yo o se nang rre. Ruri fa lo ka mmogisa, e tla re fa a lelela kwa go nna, ruri ke tla utlwa selelo sa gagwe.”—Ekesodo 22:22-24.

Se re se ithutang: Jehofa o reetsa le e leng dithapelo tsa bana ba bannye. Re ka rapela Modimo ka metlha ra mmolelela dikakanyo tsa rona le maikutlo a rona a a kwa tengteng.

▪ Se Baebele e se rutang: “Gangwe le gape ba ne ba leka Modimo, ba ne ba utlwisa Moitshepi wa Iseraele botlhoko.”—Pesalema 78:41.

Se re se ithutang: Se re se buang le se re se dirang se ama maikutlo a ga Jehofa, ka jalo re tshwanetse go akanya pele re bua kgotsa re dira sengwe.

 Re tshwanetse go tshwara jang batho ba ba sa tshwaneng le rona?

▪ Se Baebele e se rutang: “Modimo ga a na tlhaolele, mme mo setšhabeng sengwe le sengwe motho yo o mmoifang a ba a dira tshiamo o a amogelesega mo go ene.”—Ditiro 10:34, 35.

Se re se ithutang: E re ka Modimo a amogela batho ba mefuta yotlhe, ga re a tshwanela go tlhaola ba bangwe fela ka gonne e le ba mmala o sele kgotsa ba na le dipopego tse di sa tshwaneng le tsa rona.

▪ Se Baebele e se rutang: “Ka metlha lo [iketleeletse] go iphemela fa pele ga mongwe le mongwe yo o lo batlang lebaka la tsholofelo e e mo go lona, mme lo dira jalo ka bonolo le tlotlo e e boteng.”—1 Petere 3:15.

Se re se ithutang: Fa re tlotla ka bodumedi, re tshwanetse go tlhalosa maikutlo a rona re tlhatswegile pelo mme re le pelontle. Gape re tshwanetse go tlotla batho ba ba dumelang dilo tse di sa tshwaneng le tse rona re di dumelang.

Re tshwanetse go dirisana le ba malapa a rona jang?

▪ Se Baebele e se rutang: “Bana, utlwang batsadi ba lona mo go sengwe le sengwe, gonne seno se itumedisa thata mo Moreneng.”—Bakolosa 3:20.

Se re se ithutang: Bana ba ba kutlo ba bontsha gore ba rata batsadi ba bone e bile ba batla go itumedisa Modimo.

▪ Se Baebele e se rutang: “Tswelelang lo itshokelana e bile lo itshwarelana lo gololesegile fa mongwe a na le lebaka la go ngongorega ka yo mongwe. Le eleng jaaka Jehofa a ne a lo itshwarela a gololesegile, jalo le lona dirang jalo.”—Bakolosa 3:13.

Se re se ithutang: Batho ba bangwe, go akaretsa ba malapa a rona, ba tla nna ba re utlwisa botlhoko ka dinako tse dingwe. Mme fa re batla gore Modimo a re itshwarele, re tshwanetse ra ithuta go itshwarela ba bangwe.—Mathaio 6:14, 15.

 Ke eng fa re tshwanetse go ikanyega le go nna pelonomi?

▪ Se Baebele e se rutang: “[Latlhang] maaka, [mme] mongwe le mongwe wa lona a bue boammaaruri le moagelani wa gagwe.”—Baefeso 4:25.

Se re se ithutang: Fa re bua boammaaruri, re etsa Modimo e bile re a mo itumedisa. Mme fa re nna le mokgwa wa go bua maaka, re nna jaaka mmaba wa Modimo, Diabolo, yo e leng “ramaaka.”—Johane 8:44; Tito 1:2.

▪ Se Baebele e se rutang: “Tshwara ba bangwe kafa o batlang ba go tshwara ka teng.”—Mathaio 7:12, “Contemporary English Version.”

Se re se ithutang: Re tshwanetse go akanyetsa maikutlo a ba malapa a rona le batho ba bangwe mo setšhabeng mmogo le dikakanyo tsa bone le se ba se tlhokang. Fa re “utlwela ba bangwe botlhoko,” go motlhofo gore batho ba nne pelonomi mo go rona.—1 Petere 3:8; Luke 6:38.

Jaaka dikai tseno di bontsha, dilo tse re ka di ithutang mo Baebeleng di ka thusa bana gore e nne bagolo ba ba akanyetsang ba bangwe, ba ba nang le tlotlo le ba ba kutlwelobotlhoko. Mme ke mang yo o tshwanetseng go ruta bana dithuto tseno?