1, 2. (a) Ke eng fa re anaanela ditsala tse di ikanyegang le tse di itshwarelang? (b) Re tlile go sekaseka dipotso dife?

O KA re tsala ya mmatota ke motho yo o ntseng jang? Kgaitsadi mongwe wa Mokeresete e bong Ashley a re: “Nna ke tsaya tsala ya mmatota e le mongwe yo o go emang nokeng ka metlha le yo o go itshwarelang fa o mo diretse phoso.” Rotlhe re anaanela ditsala tse di ikanyegang le tse di itshwarelang. Di dira gore re ikutlwe re sireletsegile e bile re ratiwa.—Dia. 17:17.

² Jehofa ke Tsala e e ikanyegang go gaisa le e e itshwarelang. Go ntse fela jaaka mopesalema a ne a re: “Wena, Jehofa, o molemo e bile o iketleeleditse go itshwarela; mme bopelonomi jwa lorato [kgotsa “lorato lo lo ikanyegang”] mo go botlhe ba ba biletsang kwa go wena bo bogolo.” (Pes. 86:5) Go kaya eng go ikanyega le go itshwarela? Jehofa o bontsha jang dinonofo tseno tse di molemo? Mme re ka etsa jang sekao sa gagwe? Dikarabo tsa dipotso tseno di tla re thusa gore re rate thata Tsala eno ya rona e kgolo e bong Jehofa. Gape di tla re thusa gore re nonotshe botsala jwa rona le ba bangwe.—1 Joh. 4:7, 8.

3. Go kaya eng go ikanyega?

³ Boikanyegi ke nonofo e e molemo e e akaretsang boineelo le go ema mongwe nokeng ka botlalo. Motho yo o ikanyegang ga a nne a fetofetoga. Go na le moo, o ngaparela motho (kgotsa sengwe) ka lorato tota le mo maemong a a thata. Eleruri, Jehofa ke “Yo o ikanyegang” ka tsela e kgolo.—Tshen. 16:5.

4, 5. (a) Jehofa o bontsha jang gore o a ikanyega? (b) Re ka nonotshiwa jang ke go akanya ka ditiro tsa Modimo tsa boikanyegi?

⁴ Jehofa o bontsha jang gore o a ikanyega? Ga a ke a tlogela baobamedi ba gagwe ba ba ikanyegang. Mongwe wa baobamedi bao ba gagwe e bong Kgosi Dafide, o ne a naya bosupi jwa gore Jehofa o a ikanyega. (Bala 2 Samuele 22:26.) Fa Dafide a ne a lebane le diteko, Jehofa o ne a  mo kaela, a mo sireletsa, a bo a mo golola ka boikanyegi. (2 Sam. 22:1) Dafide o ne a itse gore Jehofa ga a bue fela gore o a ikanyega. Ke ka ntlha yang fa Jehofa a ile a dirisana le Dafide ka boikanyegi? Ka gonne Dafide ka boene e ne e le “motho yo o ikanyegang.” Jehofa o anaanela boikanyegi jwa baobamedi ba gagwe, mme o ba duela ka gore le ene a ba bontshe boikanyegi.—Dia. 2:6-8.

⁵ Re ka nonotshiwa ke go akanya ka ditiro tsa ga Jehofa tsa boikanyegi. Mokaulengwe mongwe yo o ikanyegang yo o bidiwang Reed a re: “Ruri go a nthusa go bala kafa Jehofa a neng a dirisana le Dafide ka gone mo dinakong tsa mathata. Tota le ka nako ya fa Dafide a ne a tshaba, a nna mo dikgageng, ka metlha Jehofa o ne a mo tlhokometse. Seo se nkgothatsa tota! Se nkgopotsa gore le fa boemo bo ka lebega bo le letobo go le kana kang, Jehofa o tla nkema nokeng fa ke nna ke ikanyega mo go ene.” Ga go pelaelo gore le wena o ikutlwa fela jalo.—Bar. 8:38, 39.

6. Jehofa o bontsha boikanyegi ka ditsela dife tse dingwe, mme seno se solegela baobamedi ba gagwe molemo jang?

⁶ Jehofa o bontsha boikanyegi ka ditsela dife tse dingwe gape? Ga a fetole melao ya gagwe. O re tlhomamisetsa jaana: “Ke ntse ke le ene yoo go fitlha botsofeng jwa motho.” (Isa. 46:4) Ka metlha o dira ditshwetso go dumalana le melao ya gagwe e e sa fetogeng ya se se siameng le se se phoso. (Mal. 3:6) Mo godimo ga moo, Jehofa o bontsha boikanyegi ka go diragatsa se a se solofeditseng. (Isa. 55:11) Ka jalo, baobamedi botlhe ba ga Jehofa ba ba ikanyegang ba solegelwa molemo ke boikanyegi jwa gagwe. Jang? Fa re dira sotlhe se re ka se kgonang go ikobela melao ya ga Jehofa, re ka tlhomamisega gore o tla diragatsa tsholofetso ya gagwe ya go re segofatsa.—Isa. 48:17, 18.

7. Tsela nngwe e re ka etsang boikanyegi jwa Modimo ka yone ke efe?

 ⁷ Re ka etsa jang boikanyegi jwa ga Jehofa? Tsela nngwe ke ka go thusa batho ba ba nang le mathata. (Dia. 3:27) Ka sekai, a o itse modumedimmogo le wena yo o kgobegileng marapo, gongwe e le ka ntlha ya mathata a botsogo, go ganediwa ke ba lelapa kgotsa ka go bo a dirile diphoso dingwe? Ke eng o sa tseye kgato go thusa motho yoo ka “mafoko a a molemo, mafoko a a gomotsang”? (Seka. 1:13) * Fa o dira jalo o tla bo o itshupa o le tsala ya mmatota e e ikanyegang, “e e ngaparelang go gaisa morwarra motho.”—Dia. 18:24.

8. Re ka etsa jang boikanyegi jwa ga Jehofa, ka sekai, mo lenyalong?

⁸ Gape re ka bontsha gore re etsa Jehofa, ka go ikanyega mo bathong ba re ba ratang. Ka sekai, fa e le gore re mo lenyalong re a itse gore re tshwanetse go ikanyega mo molekaneng wa rona wa lenyalo. (Dia. 5:15-18) Ka jalo, ga re tseye kgato epe e e ka dirang gore re feleletse re dirile boaka. (Math. 5:28) Mo godimo ga moo, re bontsha badumedimmogo le rona boikanyegi ka go tila tshebo e e kotsi kgotsa go senya motho leina, ka go se anamise puo eo e e sa siamang tota le e leng go e reetsa.—Dia. 12:18.

9, 10. (a) Ke mang yo segolobogolo re batlang go nna re ikanyega mo go ene? (b) Ke eng fa ka dinako dingwe go se motlhofo go ikobela ditaelo tsa ga Jehofa?

⁹ Sa botlhokwa le go feta, re batla go nna re ikanyega mo go Jehofa. Re ka dira seo jang? Ka go leka go leba dilo ka tsela e a di lebang ka yone—re rata se a se ratang le go tlhoa se a se tlhoileng—re bo re itshwara ka tsela e e dumalanang le seo. (Bala Pesalema 97:10.) Fa re dira gore dikakanyo le maikutlo a rona a dumalane le dikakanyo le maikutlo a ga Jehofa, re tla tlhotlheletsega go ikobela ditaelo tsa gagwe.—Pes. 119:104.

¹⁰ Gone ke boammaaruri gore ga se ka metlha go tla nnang motlhofo go ikobela ditaelo tsa ga Jehofa. Re ka nna ra tlhoka go iteka ka  natla gore re nne re ikanyega. Ka sekai, Bakeresete bangwe ba ba seng mo lenyalong ba ka tswa ba eletsa go tsena mo lenyalong, mme ga ba ise ba kgone go bona molekane yo o tshwanetseng mo phuthegong ya ga Jehofa. (1 Bakor. 7:39) Kgaitsadi yo o sa nyalwang a ka nna a lemoga gore badirimmogo le ene ba e seng Bakeresete, ba nna ba leka go mmatlela motho mongwe yo e ka nnang molekane wa gagwe. Kgaitsadi yono a ka tswa a ikutlwa a jewa ke bodutu. Le fa go ntse jalo, o leka ka natla go nna a ikanyega mo go Jehofa. A ga re anaanele dikao tse di ntseng jalo tse di molemo tsa boikanyegi? Ga go pelaelo gore Jehofa o tla duela botlhe ba ba tswelelang ba ikanyega mo go ene le fa ba na le mathata.—Baheb. 11:6.

11. Go itshwarela go kaya eng?

¹¹ Nngwe ya dinonofo tsa ga Jehofa e e dirang gore re mo rate, ke go iketleeletsa go itshwarela. Go nna motho yo o itshwarelang go kaya eng? Go kaya go itshwarela motho yo o go kgopisitseng fa go na le lebaka le le utlwalang la go dira jalo. Seo ga se kaye gore motho yo o itshwarelang o mpampetsa phoso eo kgotsa o latola gore e diragetse. Go na le moo, ga a boloke sekgopi. Dikwalo di re ruta gore Jehofa o “iketleeleditse go itshwarela” ba ba bontshang go ikwatlhaya ka tsela ya mmatota.—Pes. 86:5.

12. (a) Jehofa o bontsha jang gore o a itshwarela? (b) Go ‘phimolwa’ ga maleo a motho go kaya eng?

¹² Jehofa o bontsha jang gore o a itshwarela? Fa Jehofa a itshwarela o dira jalo ka “tsela e kgolo”; o itshwarela ka botlalo le ka bosakhutleng. (Isa. 55:7) Re itse jang gore Jehofa o itshwarela ka botlalo? Akanya ka se a re tlhomamisetsang sone mo go Ditiro 3:19. (E bale.) Moaposetoloi Petere o ne a rotloetsa batho ba ba neng ba mo reeditse gore ba ‘ikwatlhaye ba bo ba sokologe.’ Fa moleofi a ikwatlhaya ka tsela ya mmatota, o hutsafalela phoso e a e dirileng. Gape o ikemisetsa gore a se ka a boeletsa boleo joo. (2 Bakor. 7:10, 11) Mo godimo ga moo, boikwatlhao jwa mmatota bo tlhotlheletsa moleofi gore a “sokologe,”  a tlogele tsela e e sa siamang mme a itumedise Modimo. Fa batho ba ba neng ba reeditse Petere ba ne ba ka bontsha go ikwatlhaya ka tsela ya mmatota, diphelelo e ne e tla nna dife? Petere o ne a re maleo a bone a ne a tla ‘phimolwa.’ Lefoko leo le tswa mo lefokong la Segerika le le kayang, “go tlosa gotlhelele.” Ka jalo, fa Jehofa a itshwarela, o phimola maleo a rona gotlhelele. O itshwarela ka botlalo.—Baheb. 10:22; 1 Joh. 1:7.

13. Mafoko a a reng, “boleo jwa bone ga nkitla ke tlhola ke bo gakologelwa” a re tlhomamisetsa eng?

¹³ Re itse jang gore Jehofa o itshwarela ka bosakhutleng? Akanya ka boporofeti jwa ga Jeremia, jo bo malebana le kgolagano e ntšha e e dirilweng le Bakeresete ba ba tloditsweng, e e dirang gore ba ba bontshang tumelo mo thekololong ba kgone go itshwarelwa ka tsela ya mmatota. (Bala Jeremia 31:34.) Jehofa a re: “Ke tla itshwarela tlolo ya bone, le boleo jwa bone ga nkitla ke tlhola ke bo gakologelwa.” Ka jalo, Jehofa o re tlhomamisetsa gore fa a re itshwarela, ga a kitla a tlhola a dirisa phoso eo kgatlhanong le rona. Ga a nne a re latofatsa kgotsa a re otlhaela maleo a rona gangwe le gape. Go na le moo, Jehofa o itshwarela maleo ao mme o a a lebala—ka bosakhutleng.—Bar. 4:7, 8.

14. Re ka gomodiwa jang ke go tlhatlhanya ka boitshwarelo jwa ga Jehofa? Naya sekai.

¹⁴ Re ka gomodiwa ke go tlhatlhanya ka go itshwarela ga ga Jehofa. Akanya ka sekai seno. Dingwaga di le dintsi tse di fetileng, kgaitsadi mongwe yo re tla mmitsang Elaine o ne a kgaolwa. Dingwaga di le mmalwa morago ga foo, o ne a busediwa mo phuthegong. Elaine a re: “Le fa ke ne ke ipolelela gore Jehofa o intshwaretse e bile ke bolelela ba bangwe jalo, ka metlha ke ne ke akanya gore ka tsela nngwe Jehofa o kgakala le nna kgotsa ke akanya gore ba bangwe ba atamalane thata le ene e bile ke wa mmatota mo go bone.” Le fa go ntse jalo, Elaine o ne a gomodiwa ke go bala le go tlhatlhanya ka dipapiso dingwe tse Baebele e di dirisang go tlhalosa tsela e Jehofa a itshwarelang ka yone. A re: “Ke ne ka bona gore Jehofa o a nthata e bile o amega ka nna ka tsela e ke neng ke sa e lemoge pele.” O ne a gomodiwa thata ke go akanya ka ntlha eno: “Fa Jehofa a itshwarela maleo a rona, ga re a tshwanela go nna re akanya gore re tla tswelela re na le selabe sa boleo joo botshelo jotlhe jwa rona.” * Elaine a re: “Ke ne ka lemoga gore ke ne ke sa dumele gore Jehofa a ka kgona go intshwarela ka botlalo e bile ke akanya gore ke tla tswelela ke imetswe ke boleo jono botshelo jwa me jotlhe. Ke a itse gore go tla tsaya nako e telele mme gone ke simolola go ikutlwa ke kgona go atamalana le Jehofa e bile ke ikutlwa ke imologile.” Ruri re direla Modimo yo o lorato le yo o itshwarelang!—Pes. 103:9.

15. Re ka etsa jang sekao sa ga Jehofa sa go itshwarela?

¹⁵ Re ka etsa sekao sa ga Jehofa sa go itshwarela ka go itshwarela ba bangwe fa go na le lebaka le le utlwalang la go dira jalo. (Bala Luke 17:3, 4.) Gopola gore fa Jehofa a itshwarela, o lebala maleo a rona ka tsela ya gore ga a tswelele a re otlhaela one. Fa re itshwarela ba bangwe, le rona re ka lebala diphoso tseo, ka go sa nne re ba gopotsa tsone mo nakong e e tlang.

16. (a) A go itshwarela go kaya gore re mpampetsa diphoso tsa ba bangwe kgotsa re letla gore ba re tshware ka tsela e e sa siamang? Tlhalosa. (b) Re tshwanetse go dira eng gore Modimo a re itshwarele?

 ¹⁶ Go itshwarela ba bangwe ga go kaye gore re mpampetsa diphoso tsa bone kgotsa re letla gore ba re tshware ka tsela e e sa siamang. Le e seng. Go kaya gore ga o nne o tshwaretse motho yoo sekgopi. Le fa go ntse jalo, sa botlhokwa ke gore, fa re batla gore Modimo a re itshwarele, re tshwanetse go mo etsa ka gore le rona re itshwarele ba bangwe. (Math. 6:14, 15) Tota e bile, kutlwelobotlhoko  e dira gore Jehofa a gakologelwe gore “re lorole.” (Pes. 103:14) Ka jalo, a kutlwelobotlhoko ga e a tshwanela go re tlhotlheletsa go itlhokomolosa diphoso tsa ba bangwe, re ba itshwarele re gololesegile go tswa pelong?—Baef. 4:32; Bakol. 3:13.

17. Ke eng se se ka re thusang fa modumedimmogo le rona a re utlwisitse botlhoko?

 ¹⁷ Boammaaruri ke gore ga se ka metlha go leng motlhofo go itshwarela. Tota le Bakeresete bangwe ba ba tloditsweng ba lekgolo la ntlha la dingwaga ba ka tswa ba ne ba fitlhela go le thata go rarabolola dikgotlhang tsa bone. (Bafil. 4:2) Fa modumedimmogo le rona a re utlwisitse botlhoko, ke eng se se ka re thusang? Akanya ka Jobe. O ne a utlwa botlhoko thata fa banna ba ba ipitsang ditsala tsa gagwe—Elifase, Biledade le Sofare—ba mo latofatsa ka maaka. (Jobe 10:1; 19:2) Kgabagare, Jehofa o ne a kgalemela balatofatsi bao ba maaka. Modimo o ne a ba laela gore ba ye go ntsha tshupelo ya maleo a bone kwa go Jobe. (Jobe 42:7-9) Mme gape Jehofa o ne a batla gore Jobe le ene a dire sengwe. O ne a re a dire eng? Jehofa o ne a laela Jobe gore a rapelele banna bano ba ba neng ba mo latofaditse. Jobe o ne a dira fela jaaka Jehofa a ne a mo laetse mme Jehofa o ne a mo segofatsa ka gonne Jobe a ne a na le moya wa go itshwarela. (Bala Jobe 42:10, 12, 16, 17.) Re ithutang eng mo go seno? Fa ka tlhoafalo re rapelela motho yo o re kgopisitseng, seo se ka re thusa gore re se ka ra tshwara sekgopi.

18, 19. Re ka tswelela jang re godisa tsela e ka yone re anaanelang botho jwa ga Jehofa jo bo dirang gore re mo rate?

¹⁸ Ruri go re itumedisitse go tlotla ka dikarolo tse di farologaneng tsa botho jwa ga Jehofa. Re setse re bone gore o a atamelesega, ga a tlhaole, o pelotshweu, o tekatekano, o a ikanyega e bile o a itshwarela. Mme gone, se re ithutileng sone ke lemmenyana fela. Re tla itumelela go ithuta mo go oketsegileng ka Jehofa ka bosakhutleng. (Mor. 3:11) Re dumalana le moaposetoloi Paulo yo o neng a re: “A boteng jwa dikhumo tsa Modimo le botlhale le kitso”—re sa re sepe ka lorato lwa gagwe le dinonofo tse dingwe tse thataro tse re setseng re tlotlile ka tsone.—Bar. 11:33.

¹⁹ A rotlhe re tsweleleng re godisa tsela e ka yone re anaanelang botho jwa ga Jehofa jo bo dirang gore re mo rate. Re ka dira seno ka go ithuta dinonofo tsa gagwe, re tlhatlhanya ka tsone re bo re di etsa ka tsela e re tshelang ka yone. (Baef. 5:1) Fa re dira jalo, ga go pelaelo gore re tla dumalana thata le mopesalema yo o neng a re: “Fa e le nna, go atamela Modimo go molemo mo go nna.”—Pes. 73:28.