Nna o Thantse, Fela Jaaka Jeremia

“[Nna Jehofa] ke nna ke thantse ka ga lefoko la me gore ke le diragatse.”—JER. 1:12.

1, 2. Ke eng fa Jehofa a tshwantsha go ‘nna a thantse’ ga gagwe le setlhare sa thamane?

MO DITHABANENG tsa Lebanona le tsa Iseraele, sengwe sa ditlhare tse di thunyang la ntlha ke setlhare sa thamane (almond). O ka kgona go bona dithunya tsa sone tse dintle tse di pinki kgotsa tse di tshweu fa January e ya kwa bokhutlong kgotsa fa February e simologa. Leina la sone ka Sehebera le kaya “yo o tsogang.”

² Fa Jehofa a ne a tlhoma Jeremia go nna moporofeti wa gagwe, o ne a bona go tshwanela go dirisa nonofo eno ya setlhare sa thamane go tshwantsha sengwe sa botlhokwa. Kwa tshimologong ya bodiredi jwa moporofeti yono, o ne a bontshiwa ponatshegelo ya letlhogela la setlhare seo. E ne e kaya eng? Jehofa o ne a tlhalosa jaana: “Ke nna ke thantse ka ga lefoko la me gore ke le diragatse.” (Jer. 1:11, 12) Fela jaaka setlhare sa thamane se ‘tsoga’ ka bonako, Jehofa le ene o ne a “tsoga go sa le phakela” ka tsela ya tshwantshetso go romela baporofeti ba gagwe gore ba tlhagise batho ba gagwe ka ditlamorago tsa botlhokakutlo jwa bone. (Jer. 7:25) Mme o ne a ka se ikhutse—o ne a tla ‘nna a thantse’—go fitlha lefoko la gagwe la boporofeti le diragadiwa. Ka 607 B.C.E., ka yone nako e e neng e tlhomilwe, Jehofa o ne a tlisa katlholo mo setšhabeng sa gagwe sa batlhanogi sa Bajuda.

3. Re ka tlhomamisega ka eng ka ga Jehofa?

³ Ka tsela e e tshwanang, le gompieno Jehofa o  thantse, o ela tlhoko go dira thato ya gagwe. Ga go kgonege gore a ka itlhokomolosa go diragatsa lefoko la gagwe. Go nna kelotlhoko ga ga Jehofa go go ama jang? A o dumela gore mo ngwageng ono wa 2011, Jehofa o “thantse” malebana le go diragatsa ditsholofetso tsa gagwe? Fa e le gore re na le dipelaelo ka ga ditsholofetso tsa ga Jehofa tse di tlhomamisitsweng, gone jaanong ke nako ya gore re tsoge mo borokong jwa semoya. (Bar. 13:11) E re ka Jeremia e ne e le moporofeti wa ga Jehofa o ne a nna a thantse. Go sekaseka gore Jeremia o kgonne jang go nna a tsogile mo kabelong ya gagwe e a neng a e neilwe ke Modimo le lebaka la go bo a ile a dira jalo, go tla re thusa go bona gore re ka itshoka jang mo tirong e Jehofa a re neileng yone.

Molaetsa o o Potlakileng

4. Jeremia o ne a lebana le dikgwetlho dife fa a isa molaetsa wa gagwe kwa bathong, mme ke eng se se neng se dira gore molaetsa oo o potlake?

⁴ Jeremia a ka tswa a ne a le dingwaga di ka nna 25 fa Jehofa a ne a mo tlhopha go nna molebeledi. (Jer. 1:1, 2) Mme o ne a ikutlwa e kete ke mosimanyana fela, a sa tshwanelege gotlhelele go bua le batho ba bagolo ba setšhaba, banna ba ba godileng le ba ba nang le maemo mo setšhabeng. (Jer. 1:6) O ne a tshwanetse go bolela dikatlholo tse di bogale le tse di boifisang, segolobogolo kwa baperesiting, kwa baporofeting ba maaka le kwa babusing le mo go ba ba neng ba tsere ‘tsela e e rategang’ mme ba sa ‘ikanyege ka bosaikanyegeng.’ (Jer. 6:13; 8:5, 6) Tempele e e galalelang ya ga Kgosi Solomone, e e neng e le boremelelo jwa kobamelo ya boammaaruri ka dingwaga di ka nna makgolo a le manè, e ne e tlile go senngwa. Jerusalema le Juda di ne di tlile go swafadiwa mme baagi ba tsone ba ne ba tla isiwa botshwarwa. Kwantle ga pelaelo, molaetsa o Jeremia a neng a laetswe gore a o ise kwa bathong o ne o potlakile!

5, 6. (a) Gompieno Jehofa o dirisa setlhopha sa Jeremia jang? (b) Re tlile go sekaseka eng mo thutong eno?

⁵ Mo motlheng ono, Jehofa ka lorato o neile batho setlhopha sa Bakeresete ba ba tloditsweng ba e leng balebeledi ba tshwantshetso gore ba ba tlhagise ka katlholo ya gagwe e e tlelang lefatshe leno. Ka masomesome a dingwaga, setlhopha seno sa Jeremia se ntse se rotloetsa batho gore ba ele tlhoko metlha e re tshelang mo go yone. (Jer. 6:17) Baebele e gatelela gore Jehofa, yo e leng Mmolokanako yo Mogolo, ga a bonya. Letsatsi la gagwe le tla tla ka nako e e tshwanetseng, ka ura e batho ba sa e lebelelang.—Sefa. 3:8; Mar. 13:33; 2 Pet. 3:9, 10.

⁶ Gakologelwa gore Jehofa o tsogile mme o tla tlisa lefatshe la gagwe le lesha la tshiamo ka nako e e tshwanetseng. Go itse seo go tshwanetse ga tlhotlheletsa ba setlhopha sa Jeremia le go thusa ditsala tsa bone tse di ineetseng gore ba nne ba tsogile malebana le molaetsa wa bone o o ntseng o potlaka le go feta. Seno se go ama jang? Jesu o ne a re botlhe ba tshwanetse go emela Bogosi jwa Modimo. A re sekasekeng dinonofo di le tharo tse di ileng tsa thusa Jeremia gore a nne a tsogile malebana le taelo e a neng a e neilwe, tse le rona di ka re thusang go dira jalo.

Go Rata Batho

7. Tlhalosa kafa lorato lo tlhotlheleditseng Jeremia go rera ka gone le fa a ne a lebane le maemo a a bokete.

⁷ Ke eng se se ileng sa tlhotlheletsa Jeremia go rera le fa a ne a lebane le maemo a a gwetlhang? O ne a rata batho. Jeremia o ne a itse gore badisa ba maaka ke bone ba ba neng ba bakela batho mathata a ba neng ba lebana le one. (Jer. 23:1, 2) Kitso eno e ne ya mo thusa gore a dire tiro ya gagwe ka lorato le ka kutlwelobotlhoko. O ne a batla gore batho ba naga ya gaabo ba utlwe mafoko a Modimo mme ba tshele. O ne a amegile thata jaana mo e leng gore o ne a lelela masetlapelo a a neng a ba tlela. (Bala Jeremia 8:21; 9:1.) Buka ya Dikhutsafalo e tlhalosa sentle lorato lo lo boteng lo Jeremia a neng a na le lone le kafa a neng a amega ka leina la ga Jehofa le ka batho ka gone. (Dikhu. 4:6, 9) Fa gompieno o bona batho ba “sotlegile e bile ba gasame jaaka dinku tse di se nang modisa”, a ga o utlwe o eletsa go ba leretse dikgang tse di gomotsang tsa Bogosi jwa Modimo?—Math. 9:36.

8. Ke eng se se bontshang gore go boga ga go a ka ga dira gore Jeremia a nne a galefile?

⁸ Jeremia o ne a bogisiwa ke bone batho ba a neng a batla go ba thusa, le fa go ntse jalo ga a ka a ipusolosetsa kgotsa a ba galefela. O ne a le pelotelele  e bile a le pelonomi, tota le mo go Kgosi Sedekia yo o neng a le bosula! Fa Sedekia a sena go mo neelela gore a bolawe, Jeremia o ne a sa ntse a mo kopa gore a ikobele lefoko la ga Jehofa. (Jer. 38:4, 5, 19, 20) A lorato lo re ratang batho ka lone lo nonofile fela jaaka lwa ga Jeremia?

Bopelokgale jo a Neng a bo Neilwe ke Modimo

9. Re itse jang gore bopelokgale jwa ga Jeremia bo ne bo tswa kwa Modimong?

⁹ Fa Jehofa a ne a bua le Jeremia la ntlha, Jeremia o ne a leka go dira diipato. Seno se re thusa go lemoga gore bopelokgale le go tlhomama tse Jeremia a neng a di bontsha moragonyana e ne e se tsa tlholego fela. Maatla a a fetang a a tlwaelegileng a Jeremia a neng a a bontsha ka nako ya tiro ya gagwe ya go porofeta, tota a ne a dirwa ke go ikaega ka botlalo ka Modimo. Tota, Jehofa o ne a na le moporofeti yono “jaaka yo o thata yo o boifisang” ka gore o ne a ema Jeremia nokeng mme a mo nonotsha gore a kgone go diragatsa kabelo ya gagwe. (Jer. 20:11) Jeremia o ne a itsege ka bopelokgale thata jaana, mo ka nako ya bodiredi jwa ga Jesu mo lefatsheng, bangwe ba neng ba akanya gore Jesu ke Jeremia yo o tsogileng mo baswing!—Math. 16:13, 14.

10. Ke eng fa go ka twe masalela a batlodiwa a ‘kwa godimo ga ditšhaba le magosi’?

¹⁰ E re ka Jehofa e le “Kgosi ya ditšhaba” o ne a laela Jeremia gore a ise molaetsa wa katlholo kwa ditšhabeng le kwa magosing. (Jer. 10:6, 7) Mme batlodiwa ba “kwa godimo ga ditšhaba le kwa godimo ga magosi” ka tsela efe? (Jer. 1:10) Fela jaaka moporofeti wa bogologolo, setlhopha sa Jeremia se amogetse kabelo e e tswang kwa go Molaodimogolo wa lobopo. Ka jalo, batlhanka ba Modimo ba ba tloditsweng ba neilwe taelo ya gore ba bolele dikatlholo mo lefatsheng lotlhe kgatlhanong le ditšhaba le magosi. E re ka Modimo Mogodimodimo a ba neile maatla e bile ba dirisa puo e e itshekileng ya Lefoko la gagwe le le boitshepo, setlhopha sa Jeremia se bolela gore ditšhaba le magosi a gompieno a tla kumolwa, mme a senngwe ka nako e e tshwanetseng ya Modimo le ka tsela e a e tlhophileng. (Jer. 18:7-10; Tshen. 11:18) Setlhopha sa Jeremia se ititeile sehuba gore se se ka sa goga dinao mo tirong e Modimo a ba neileng yone ya go itsise melaetsa ya katlholo ya ga Jehofa lefatshe ka bophara.

11. Ke eng se se tla re thusang go tswelela re rera re sa kgaotse fa re lebane le maemo a a thata?

¹¹ Go tlwaelegile gore ka dinako dingwe motho a kgobege marapo fa a lebane le kganetso, le batho ba ba sa kgatlhegeng kgotsa le maemo a a thata. (2 Bakor. 1:8) Mme fela jaaka Jeremia, a re nneng re gatela pele. O se ka wa kgobega marapo. A mongwe le mongwe wa rona a tswelele a rapela Modimo ka tlhoafalo, a ikaega ka ene, mme a ‘nne le bopelokgale’ fa a ntse a kopa thuso kwa go ene. (1 Bathes. 2:2) Jaaka re le baobamedi ba boammaaruri, re tshwanetse go tswelela re thantse malebana le boikarabelo jo re bo neilweng ke Modimo. Re tshwanetse go ititaya sehuba gore re tswelele re rera re sa kgaotse ka tshenyego ya madumedi a a ipitsang a Bokeresete, e e neng ya tshwantshediwa ke tshenyego ya Jerusalema yo o sa ikanyegeng. Setlhopha sa Jeremia se tla “bolela ngwaga wa kamogelo wa ga Jehofa” mmogo le “letsatsi la pusoloso la Modimo wa rona.”—Isa. 61:1, 2; 2 Bakor. 6:2.

Boipelo jo Bogolo

12. Ke eng fa re ka dira tshwetso ya gore Jeremia o ne a nna a itumetse, mme ke eng se se neng sa mo thusa go dira jalo?

¹² Jeremia o ne a itumelela tiro ya gagwe. O ne a raya Jehofa a re: “Mafoko a gago a ne a bonwa, mme ke ne ka a ja; lefoko la gago mo go nna le nna go itumela le go ipela ga pelo ya me; gonne leina la gago le bidiwa mo go nna, wena Jehofa.” (Jer. 15:16) Mo go Jeremia, e ne e le tshiamelo go emela Modimo wa boammaaruri le go rera lefoko la gagwe. Go a kgatlha go itse gore fa Jeremia a ne a tlhoma mogopolo mo go sotliweng ke batho, o ne a felelwa ke boitumelo. Mme fa a ne a tlhoma mogopolo mo botlhokweng jwa molaetsa wa gagwe, o ne a boa a itumela gape.—Jer. 20:8, 9.

13. Ke eng fa go ikotla ka dithuto tsa boammaaruri tse di boteng go le botlhokwa gore re tswelele re itumetse?

¹³ Gore re tswelele re itumetse mo tirong ya go rera mo motlheng wa rona , re tshwanetse go ikotla ka “dijo tse di tiileng” e leng dithuto tsa boammaaruri tse di boteng tsa Lefoko la Modimo. (Baheb. 5:14) Go ithuta ka tsela e e boteng, go aga  tumelo. (Bakol. 2:6, 7) Go gatelela mo go rona gore ditiro tsa rona di ama pelo ya ga Jehofa go le kana kang. Fa re fitlhela go le thata go nna le nako ya go bala le go ithuta Baebele, re tshwanetse go tlhatlhoba thulaganyo ya rona gape. Tota le metsotso e le mmalwa ya go ithuta le go tlhatlhanya letsatsi le letsatsi e ka dira gore re atamalane le Jehofa mme seo se tla dira gore ‘dipelo tsa rona di itumele le go ipela,’ fela jaaka go ne go ntse ka Jeremia.

14, 15. (a) Jeremia o ne a nna le nonofo efe ka ntlha ya go kgomarela ka boikanyegi taelo e a neng a e neilwe? (b) Batho ba Modimo gompieno ba tlhaloganya eng ka tiro ya bone ya go rera?

¹⁴ Jeremia o ne a bolela ditlhagiso tsa ga Jehofa le melaetsa ya katlholo a sa kgaotse, le fa go ntse jalo, mo pelong ya gagwe o ne a akantse ka taelo ya go ‘aga le go jala.’ (Jer. 1:10) Tiro ya gagwe ya go aga le go jala e ne ya nna le matswela. Bajuda bangwe mmogo le batho ba e neng e se Baiseraele ba ne ba falola fa Jerusalema e senngwa ka 607 B.C.E. Re itse ka Barekabe, Ebede-meleke le Baruke. (Jer. 35:19; 39:15-18; 43:5-7) Ditsala tseno tsa ga Jeremia tse di ikanyegang le tse di boifang Modimo di bontsha sentle ba gompieno ba nang le tsholofelo ya go tshela mo lefatsheng ba e leng ditsala tsa setlhopha sa Jeremia. Setlhopha sa Jeremia se itumelela go aga tumelo ya “boidiidi [jono] jo bogolo.” (Tshen. 7:9) Ka tsela e e tshwanang, ditsala tseno tse di ikanyegang tsa  batlodiwa di itumelela thata go thusa batho ba dipelo di ikanyegang gore ba itse boammaaruri.

¹⁵ Batho ba Modimo ba tlhaloganya gore go rera dikgang tse di molemo ga se fela go direla batho ba ba ba reetsang molemo mme gape ke tsela e ba bontshang ka yone gore ba obamela Modimo. Re ka tswa re fitlhela batho ba ba re reetsang kgotsa nnyaa, go direla Jehofa tirelo e e boitshepo ka go rera go dira gore re ipele thata.—Pes. 71:23; bala Baroma 1:9.

‘Nna o Thantse’ mo Kabelong ya Gago

16, 17. Tshenolo 17:10 le Habakuke 2:3 di bontsha jang go potlaka ga motlha wa rona?

¹⁶ Go potlaka ga metlha e re tshelang mo go yone go gatelelwa mo mafokong ano a boporofeti jo bo tlhotlheleditsweng jo bo mo go Tshenolo 17:10. Kgosi ya bosupa, Mmuso wa Maesemane le Maamerika, e simolotse go busa. Re bala jaana ka yone: “Fa [kgosi ya bosupa] e goroga e tla nna lobakanyana.” Go tla go fitlha jaanong, “lobakanyana” lo tshwanetse lwa bo lo le gaufi le go fela. Moporofeti Habakuke o ne a re tlhomamisetsa jaana malebana le bokhutlo jwa tsamaiso eno e e boikepo: “Ponatshegelo e sa ntse e na le nako e e tlhomilweng . . . Nna o e lebeletse; gonne ruri e tla diragala. Ga e kitla e tla morago ga nako.”—Hab. 2:3.

¹⁷ Ipotse: ‘A botshelo jwa me ruri bo bontsha gore motlha wa rona o potlakile? A tsela e ke tshelang ka yone e bontsha gore ke lebeletse gore bokhutlo bo tle ka bonako? Kgotsa a ditshwetso tsa me le dilo tse di tlang pele mo botshelong jwa me di bontsha gore ga ke a lebelela gore bokhutlo bo tle ka bonako, e bile ga ke tlhomamisege gore a tota bo tla tla?’

18, 19. Ke eng fa eno e se nako ya go goga dinao?

¹⁸ Tiro ya setlhopha sa molebeledi ga e ise e fele. (Bala Jeremia 1:17-19.) A bo go kgothatsa jang ne gore masalela a batlodiwa a eme a nitame jaaka “pilara ya tshipi” le “motse o o sireletsegileng”! Ba ‘gatlhile matheka a bone ka boammaaruri’ ka gore ba letla Lefoko la Modimo go ba nonotsha go fitlha fa tiro e ba laetsweng go e dira e weditswe. (Baef. 6:14) Ba boidiidi jo bogolo le bone ba ititeile sehuba mme ka matlhagatlhaga ba ema nokeng setlhopha sa Jeremia go tsweletsa pele kabelo ya bone e e tswang kwa Modimong.

¹⁹ Jaanong ga se nako ya go goga dinao mo tirong ya Bogosi mme ke nako ya go tlhatlhoba botlhokwa jwa Jeremia 12:5. (E bale.) Rotlhe re lebana le diteko tse re tshwanetseng go di itshokela. Diteko tseno tsa tumelo ya rona di ka tshwantshanngwa le batho “ba ba tsamayang ka dinao” ba re tshwanetseng go taboga le bone. Le fa go ntse jalo, fa “pitlagano e kgolo” e ntse e atamela, re ka lebelela gore mathata a oketsege. (Math. 24:21) Go sokasokana le dikgwetlho tse di oketsegileng tse di larileng kwa pele go ka tshwantshanngwa le go taboga “lobelo le dipitse.” Go tla tlhoka maatla a magolo gore motho a itshoke mme a tswelele a taboga le dipitse. Ka jalo, go mosola go itshokela diteko tse re lebanang le tsone gone jaanong, mme seo se re baakanyetsa go itshokela tse di larileng kwa pele.

20. O ikemiseditse go dira eng?

²⁰ Rotlhe re ka etsa Jeremia mme ra diragatsa kabelo ya rona ya go rera ka katlego! Dinonofo tse di jaaka lorato, bopelokgale le boipelo, di ne tsa tlhotlheletsa Jeremia gore a tswelele a dira tirelo ya gagwe ka boikanyegi ka dingwaga di le 67. Dithunya tse dintle tsa setlhare sa thamane di re gakolola gore Jehofa o tla ‘nna a thantse’ malebana le lefoko la gagwe gore a le diragatse. Ka jalo, le rona re na le lebaka le le utlwalang la gore re nne re tsogile. Jeremia o ne a ‘nna a tsogile,’ le rona re ka kgona go dira jalo.

A o A Gakologelwa?

• Lorato lo ne lwa thusa jang Jeremia go ‘nna a tsogile’ mo kabelong ya gagwe?

• Ke eng fa re tlhoka bopelokgale jo bo tswang kwa Modimong?

• Ke eng se se thusitseng Jeremia go tswelela a ipela?

• Ke eng fa o batla go ‘nna o tsogile’?

[Dipotso Tsa Thuto]

[Ditshwantsho mo go tsebe 31]

A o tla tswelela o rera le fa o ganediwa?