A o Tla Nna o Bolokile Bothokgami?
A o Tla Nna o Bolokile Bothokgami?
“Nka se tlose bothokgami jwa me mo go nna go fitlha ke swa!”—JOBE 27:5.
1, 2. Re tshwanetse go tlhagolela nonofo efe, mme re tla sekaseka dipotso dife?
A RE re o lebile polane ya ntlo. O jesiwa kgakge ke tsela e polane eno e dirilweng ka yone. O itumelela go akanya ka ditsela tse ntlo eo e ka solegelang wena le lelapa la gago molemo ka tsone. A ga go boammaaruri gore polane eo le go akanya fela ka yone go ka se go solegele molemo ka sepe fa o sa tseye matsapa a go aga ntlo eo, wa fudugela mo go yone, mme wa e tlhokomela?
2 Baebele e re naya tsholofelo e e molemo ya go tshela mo lefatsheng le lesha re na le ba malapa a rona. Mme go akanya fela ka bothokgami jwa rona jwa Bokeresete go ka se re solegele molemo go le kalo fa re sa dire gore re nne le jone mme re nne re bo bolokile. Go tshwana fela le go aga ntlo. Go akanya fela ka polane ya yone go ka se solegele motho molemo ka sepe fa a sa iphe nako le go dira maiteko a go aga ntlo eo. (Luke 14:28, 29) Ka tsela e e tshwanang, go nna le bothokgami go tlhoka nako e bile go tlhoka gore re dire maiteko, mme go re solegela molemo. Ka jalo, a re sekasekeng dipotso tseno tse tharo: Re ka nna jang batho ba ba thokgameng? Re ka nna jang re bolokile bothokgami jwa Bokeresete? Go ka dirwang fa mongwe a sa boloka bothokgami ka lobaka lo lo rileng?
Re ka Nna Jang Batho ba ba Thokgameng?
3, 4. (a) Jehofa o re thusa ka ditsela dife gore re boloke bothokgami? (b) Re ka dira jang gore re nne batho ba ba thokgameng, jaaka Jesu?
3 Mo setlhogong se se fetileng re ithutile gore Jehofa o re naya seriti ka go re naya tshiamelo ya go itirela tshwetso fa go tliwa mo kgannyeng ya gore a re tla nna batho ba ba bolokang bothokgami kana nnyaa. Le fa go ntse jalo, se se itumedisang ke gore ga a re tlogele fela mo lefifing. O re ruta gore re ka dira jang gore re nne le nonofo eno ya botlhokwa, mme o re naya moya wa gagwe o o boitshepo ka bopelotshweu, o o re thusang go dirisa se a se re rutang. (Luke 11:13) E bile o sireletsa batho ba ba lekang go tsamaya ka bothokgami, o ba sireletsa ka tsela ya semoya.—Dia. 2:7.
4 Jehofa o re rutile jang gore re nne batho ba ba bolokang bothokgami? Sengwe sa botlhokwa thata se a se dirileng ke go romela Morwawe, Jesu, mo lefatsheng. Jesu o ne a le kutlo ka botlalo. O ne “a nna kutlo go fitlha losong.” (Bafil. 2:8) Mo go sengwe le sengwe se Jesu a neng a se dira o ne a utlwa Rraagwe yo o kwa legodimong, le ka dinako tse go neng go le boima thata. O ne a raya Jehofa a re: “A go diragale thato ya gago, e seng ya me.” (Luke 22:42) Mongwe le mongwe wa rona o tshwanetse go ipotsa jaana, ‘A le nna ke kutlo ka tsela eo?’ Fa re nna kutlo ka maitlhomo a a siameng, re tla nna batho ba ba bolokang bothokgami. Sekaseka dikarolo dingwe tsa botshelo tse go leng botlhokwa thata gore re nne kutlo mo go tsone.
5, 6. (a) Dafide o ne a gatelela jang botlhokwa jwa go boloka bothokgami le fa re sa bonwe ke batho ba bangwe? (b) Bakeresete gompieno ba lebane le kgwetlho efe ya go boloka bothokgami fa go se na motho ope yo o ba bonang?
5 Re tshwanetse go ikobela Jehofa le fa go lebega go se na batho ba ba re bonang. Mopesalema Dafide o ne a bontsha kafa bothokgami bo leng botlhokwa ka teng ka dinako tse go neng go lebega go se na batho ba ba mmonang. (Bala Pesalema 101:2.) E re ka Dafide e ne e le kgosi, o ne a nna a na le batho. Kwantle ga pelaelo, go na le dinako tse ka tsone a neng a etswe tlhoko ke batho ba le makgolokgolo kana ba le diketekete. (Bapisa Pesalema 26:12.) Go ne go le botlhokwa gore a boloke bothokgami ka dinako tseo, ka gonne e re ka e ne e le kgosi, o ne a tshwanetse go tlhomela batho ba gagwe sekao se se molemo. (Dute. 17:18, 19) Le fa go ntse jalo, Dafide o ne a ithuta gore ka nako e a ka tswang a ne a le nosi—‘mo teng ga ntlo ya gagwe’—o ne a ntse a tshwanetse go tsamaya ka bothokgami. Go tweng ka rona?
6 Mo go Pesalema 101:3, re fitlhela mafoko ano a ga Dafide: “Ga nkitla ke tlhoma selo se se se nang molemo wa sepe fa pele ga matlho a me.” Gompieno go na le maemo a le mantsi a a ka dirang gore re beye dilo tse di se nang molemo wa sepe fa pele ga matlho a rona, segolobogolo fa re le nosi. Internet e baketse batho ba bantsi mathata mo ntlheng eno. Go motlhofo fela go raelesega go leba tshedimosetso e e sa tshwanelang kana e e hepisang. A mme fa re dira jalo re tla bo re ikobela Modimo yo o neng a tlhotlheletsa Dafide gore a kwale mafoko ao? Tshedimosetso e e hepisang e kotsi ka gonne e gakatsa dikeletso tse di phoso le tsa bopelotshetlha, e kgotlela segakolodi, e thuba manyalo mme e tlontlolola mongwe le mongwe yo o amegang.—Dia. 4:23; 2 Bakor. 7:1; 1 Bathes. 4:3-5.
7. Re ka thusiwa ke molaomotheo ofe go boloka bothokgami fa re le nosi?
7 Gone ke boammaaruri gore ga go na motlhanka ope wa ga Jehofa yo o a tleng a nne nosi tota. Rraarona o re baya leitlho ka lorato. (Bala Pesalema 11:4.) Jehofa o tshwanetse a bo a itumela tota fa a go bona o fenya thaelo! Fa o dira jalo, o ikobela tlhagiso e e kaiwang ke mafoko a ga Jesu a a mo go Mathaio 5:28. Tsweetswee, ititeye sehuba gore o se ka wa leba ditshwantsho tse di tla go raelang gore o dire phoso. O se ka wa senya bothokgami jwa gago jo bo tlhwatlhwakgolo ka go dira selo se se tlhabisang ditlhong ka go leba ditshwantsho tse di hepisang kana go bala tshedimosetso e e hepisang!
8, 9. (a) Daniele le ditsala tsa gagwe ba ne ba lebana le teko efe ya bothokgami? (b) Basha ba Bakeresete gompieno ba itumedisa Jehofa le Bakeresete mmogo le bone jang?
8 Gape re ka boloka bothokgami ka go ikobela Jehofa fa re na le batho ba ba sa dumeleng. Akanya ka Daniele le ditsala tsa gagwe tse tharo. Fa ba sa le basha, ba ne ba tsewa ba isiwa botshwarwa kwa Babelona. Fa Bahebera bano ba banè ba le koo, ba ne ba tshela le batho ba ba sa dumeleng, ba ba neng ba itse go le gonnye kana ba sa itse sepe gotlhelele ka Jehofa, mme ba ne ba patelediwa go ja dijo tsa maemo tse Molao wa Modimo o neng o di iletsa. Go ne go ka nna motlhofo fela gore basimane bao ba itirele diipato tsa gore ba se ka ba ikobela Molao wa Modimo. Aitsane, batsadi ba bone, bagolo ba bangwe le baperesiti ba ne ba ka se bone se ba neng ba se dira. Ke mang yo o neng a tla bona? Ke Jehofa ka boene. Ka jalo ba ne ba ema ba nitame mme ba mo ikobela le fa ba ne ba gatelelwa e bile go ka direga gore ba lebane le ditlamorago tse di sa itumediseng.—Dan. 1:3-9.
9 Mo lefatsheng lotlhe, basha ba e leng Basupi ba ga Jehofa ba dira se se tshwanang, ba latela melao e Modimo a e beetseng Bakeresete mme ga ba ineele mo kgatelelong e e kotsi ya dithaka. Fa lona basha lo gana go dirisa diokobatsi, go dira thubakanyo, go dirisa puo ya matlhapa, go dira boitsholo jo bo sa siamang, kana go dira dilo tse dingwe tse di phoso, lo a bo lo ikobela Jehofa. Fa lo dira jalo, lo boloka bothokgami. Lo solegelwa molemo ka bolona, mme lo itumedisa Jehofa le Bakeresete mmogo le lona!—Pes. 110:3.
10. (a) Basha bangwe ba ile ba leba dilo jang ka tsela e e phoso e e dirileng gore ba se ka ba boloka bothokgami? (b) Bothokgami bo re thusa jang gore re se ka ra nna mo kotsing ya go dira kgokafalo?
10 Gape re tshwanetse go nna kutlo fa re dirisana le batho ba bong bo sele. Re itse gore Lefoko la Modimo le thibela kgokafalo. Le fa go ntse jalo, go motlhofo fela go sa nne kutlo le go simolola go tsaya gore sengwe le sengwe se itshiametse fela. Ka sekai, basha bangwe ba ile ba dira tlhakanelodikobo e mo go yone go dirisiwang molomo mo dirweng tsa tsalo kana tlhakanelodikobo ya marago kana ba tshwaratshwarana dirwe tsa tlhakanelodikobo, ba re dilo tseno ga di maswe go le kalo ka gonne fa ba di dira tota ba a bo ba sa “tlhakanele dikobo.” Basha ba ba dirang jalo ba a lebala—kana ba itlhokomolosa—gore lefoko le le mo Baebeleng le le kayang kgokafalo le akaretsa mekgwa eo yotlhe, e leng boitsholo jo bo sa siamang jo motho a ka bo kgaolelwang. * Le fa go ntse jalo, se se maswe le go feta ke gore ba itlhokomolosa gore ba tshwanetse go boloka bothokgami. E re ka re leka ka natla go boloka bothokgami, ga re batle go itirela diipato tsa go dira bosula. Ga re batle go bona gore re ka atamela go le kana kang mo go direng boleo mme re sa otlhaiwe. Ga re tshwenyege fela ka gore re ka otlhaiwa mo phuthegong fa re dirile bosula. Go na le moo, re tshwenyega thata ka go dira se se tla itumedisang Jehofa mme re tila se se tla mo utlwisang botlhoko. Go na le go leka go bona gore re ka atamela go le kana kang mo go direng boleo, re tsamaela kgakala le jone mme re ‘tshaba kgokafalo.’ (1 Bakor. 6:18) Fa re dira jalo re bontsha gore re batho ba ba thokgameng tota.
Re ka Dira Jang Gore re Nne re Bolokile Bothokgami?
11. Ke eng fa tiro nngwe le nngwe e re e dirang e e bontshang go nna kutlo e le botlhokwa? Tshwantsha.
11 Re nna le bothokgami ka go nna kutlo, mme re boloka bothokgami ka go tswelela re le kutlo. Go nna kutlo gangwe fela go ka nna ga lebega e le selo se se sa reng sepe. Le fa go ntse jalo, go tswelela re dira ditiro tse di bontshang go nna kutlo go dira gore fa nako e ntse e tsamaya re nne batho ba ba bolokang bothokgami. Re ka tshwantsha jaana: Setena se le sengwe fela se ka nna sa lebega se se na mosola wa sepe, mme fa ditena tse dintsi di tlhatlaganngwa ka kelotlhoko, di ka aga ntlo e ntle. Ka jalo, fa re tswelela re dira ditiro tse di bontshang go nna kutlo, re boloka bothokgami.—Luke 16:10.
12. Dafide o ne a tlhoma sekao sa go boloka bothokgami jang fa a ne a sa tshwarwa sentle e bile a direlwa tshiamololo?
12 Re bonala gore a re na le bothokgami segolobogolo fa re na le mathata, re sa tshwarwe sentle, kana re direlwa tshiamololo. Akanya ka sekai sa ga Dafide se se mo Baebeleng. Fa Dafide e ne e le lekawana, o ne a bogisiwa ke kgosi e e neng e tshwanetse e ka bo e emela bolaodi jwa ga Jehofa. Le fa go ntse jalo, Jehofa o ne a sa tlhole a amogela Kgosi Saulo mme Saulo o ne a le lefufa thata mo go Dafide yo Jehofa a neng a mo amogetse. Le fa go ntse jalo, Saulo o ne a tswelela e le kgosi ka nakonyana mme o ne a dirisa masole a Iseraele go tlhorontsha Dafide. Jehofa o ne a letla gore tshiamololo eno e tswelele ka dingwaga di se kae. A Dafide o ne a galefela Modimo? A o ne a akanya gore ga go tlhokege gore a itshoke? Le e seng. O ne a tswelela a tlotla boemo jwa ga Saulo thata jaaka motlodiwa wa Modimo, mme a se ka a ipusolosetsa mo go Saulo fa a ne a bulegelwa ke sebaka sa go dira jalo.—1 Sam. 24:2-7.
13. Re ka boloka bothokgami jang fa re utlwisitswe botlhoko kana re kgopisitswe ke mongwe?
13 Ruri sekao sa ga Dafide se ka re solegela molemo thata gompieno! Re karolo ya phuthego e e mo lefatsheng lotlhe ya batho ba ba sa itekanelang, mme ope fela wa batho bao a ka re direla phoso kana a se ka a ikanyega. Gone re sego go bo re tshela mo nakong e mo go yone batho ba Modimo ba ka se fedisiweng e le setlhopha. (Isa. 54:17) Mme le fa go ntse jalo, re tshwanetse go itshwara jang fa mongwe a ka re swabisa kana a re utlwisa botlhoko? Fa re ka itetla go tshwara modumedi mmogo le rona ka pelo, re ka iphitlhela re sa tlhole re bolokile bothokgami mo Modimong. Boitshwaro jwa ba bangwe e ka se nne seipato sa gore re galefele Modimo kana sa gore re se ka ra ikanyega. (Pes. 119:165) Go itshoka le fa re lebane le diteko go tla re thusa go boloka bothokgami.
14. Batho ba ba bolokang bothokgami ba itshwara jang fa go dirwa diphetogo mo phuthegong le fa go fetolwa tsela e re tlhaloganyang dithuto dingwe tsa motheo ka yone?
14 Gape re ka boloka bothokgami ka go sa nne le mokgwa wa go rata go tshwayatshwaya diphoso. Seno se raya gore re tshwanetse go ikanyega mo go Jehofa. Gompieno o segofatsa batho ba gagwe go feta le fa e le leng pele. Kobamelo e e itshekileng ga e ise e ko e tsamaye e tlotlomadiwe jaana mo lefatsheng. (Isa. 2:2-4) Fa go fetolwa tsela e ditemana tsa Baebele di tlhalosiwang ka yone kana tsela e dilo di dirwang ka yone, re tshwanetse go amogela diphetogo tseo. Re itumelela go bona bosupi jwa gore lesedi la semoya le ntse le phatsimela pele. (Dia. 4:18) Fa re thatafalelwa ke go tlhaloganya phetogo nngwe, re kopa Jehofa gore a re thuse go e tlhaloganya. Mme fa re ise re tlhaloganye dilo ka botlalo, re tswelela re le kutlo, re bolokile bothokgami.
Go Tweng fa Mongwe a sa Boloke Bothokgami?
15. Ke mang fela yo o ka dirang gore o se ka wa boloka bothokgami?
15 Eo ke potso e e masisi, a ga go jalo? Jaaka re ithutile mo setlhogong se se fetileng, bothokgami bo botlhokwa fela thata. Fa re sa boloke bothokgami, re ka se nne le kamano le Jehofa mme ka jalo re ka se nne le tsholofelo ya mmatota. Nna o gakologetswe seno: Go na le motho a le mongwe fela mo lobopong lotlhe yo o ka dirang gore o se ka wa boloka bothokgami. Motho yoo ke wena. Jobe o ne a tlhaloganya seo sentle. O ne a re: “Nka se tlose bothokgami jwa me mo go nna go fitlha ke swa!” (Jobe 27:5) Fa le wena o ikemiseditse ka tsela e e tshwanang mme o nna o le gaufi le Jehofa, ga go na sepe se se ka dirang gore o se ka wa boloka bothokgami.—Jak. 4:8.
16, 17. (a) Fa motho a dirile boleo jo bo masisi, ke eng se a sa tshwanelang go se dira? (b) Ke eng se a tshwanetseng go se dira?
16 Mme gone, go na le bangwe ba ba palelwang ke go nna ba thokgame. Fela jaaka go ne ga direga ka nako ya fa baaposetoloi ba ne ba sa ntse ba le mo lefatsheng, bangwe gompieno ba tlwaela go dira maleo a a masisi. A go raya gore fa o ka dira boleo jo bo masisi, ga go na sepe se o ka tlholang o se dira? Ga go reye jalo. Ke eng se o ka se dirang? A re simolole ka go sekaseka se o sa tshwanelang go se dira. Batho ba na le mokgwa wa go fitlhela batsadi, Bakeresete ba bangwe, kana bagolwane phoso e ba e dirileng. Le fa go ntse jalo, Baebele e re gakolola jaana: “Yo o bipang ditlolo tsa gagwe ga a na go atlega, mme yo o di ipolelang a bo a di tlogela o tla utlwelwa botlhoko.” (Dia. 28:13) Batho ba ba lekang go bipa maleo a bone ba dira phoso e e maswe thata, ka gonne ga go na kafa motho a ka fitlhelang Modimo sepe ka teng. (Bala Bahebera 4:13.) Ba bangwe e bile ba leka go tshela botshelo jwa boitimokanyo, ba itira e kete ba direla Jehofa, mme ba ntse ba dira boleo. Fa motho a tshela jalo o a bo a sa thokgama le e seng. Jehofa ga amogele kobamelo ya batho ba ba fitlhileng maleo a a masisi. Go na le moo, boitimokanyo jo bo ntseng jalo bo a mo galefisa.—Dia. 21:27; Isa. 1:11-16.
17 Re itse sentle gore Mokeresete o tshwanetse go dirang fa a ka dira phoso e e masisi. O tshwanetse go kopa thuso ya bagolwane ba Bakeresete. Jehofa o dirile thulaganyo ya go thusa batho ba ba lwalang thata semoyeng. (Bala Jakobe 5:14.) O se ka wa dira gore go boifa go otlhaiwa kana go kgalemelwa go go thibele go batla thuso gore o boe o itekanele semoyeng. A motho yo o botlhale a ka gana go alafiwa bolwetse jo bo ka nnang jwa mmolaya fela ka gonne a tshaba botlhoko jwa nakwana jo a tla bo utlwang fa a tlhabiwa ka lemao kana a ariwa?—Baheb. 12:11.
18, 19. (a) Sekao sa ga Dafide se bontsha jang gore motho a ka boa gape a nna motho yo o thokgameng? (b) O ititeile sehuba go dira eng malebana le go nna le bothokgami?
18 A go na le tsholofelo ya gore motho a ka fola ka botlalo semoyeng? A fa motho a kile a se ka a boloka bothokgami, a ka boa a nna le jone gape? Akanya gape ka sekai sa ga Dafide. O ne a dira boleo jo bo masisi. O ne a leba mosadi wa monna yo mongwe mme a mo tswela pelo, a dira boaka le ene mme a loga leano la gore monna wa gagwe yo o se nang molato a bolawe. Go ka nna thata go akanya ka Dafide e le motho yo o neng a bolokile bothokgami ka nako eo. Le fa go ntse jalo, a go ne go se na sepe se a neng a ka tlhola a se dira? Dafide o ne a tlhoka go newa kotlhao e e gagametseng, mme o ne a e newa. Go tswa foo tsela e a neng a ikwatlhaya ka yone go tswa pelong e ne ya dira gore Jehofa a mo utlwele botlhoko. Dafide o ne a ithuta sengwe mo kotlhaong e a neng a e newa mme a boa a thokgama gape ka go ikobela Modimo le go tswelela a mo ikobela. Botshelo jwa ga Dafide bo dumalana le se se tlhalosiwang mo go Diane 24:16: “Mosiami o ka wa ga supa, mme ruri o tla tsoga.” Go ne ga felela jang? Akanya ka se Jehofa a neng a se bolelela Solomone ka Dafide fa Dafide a sena go swa. (Bala 1 Dikgosi 9:4.) Modimo o ne a gakologelwa Dafide e le monna yo o thokgameng. Eleruri Jehofa a ka itshekisa baleofi ba ba ikwatlhayang, le fa ba dirile maleo a a masisi.—Isa. 1:18.
19 Ee, o tla nna motho yo o thokgameng fa o nna kutlo ka gonne o rata Modimo. Itshoke ka boikanyego mme o ikwatlhaye go tswa pelong fa o ka dira boleo jo bo masisi. Bothokgami bo tlhwatlhwakgolo tota! E kete mongwe le mongwe wa rona a ka ititaya sehuba jaana jaaka Dafide: “Fa e le nna, ke tla tsamaya mo bothokgaming jwa me.”—Pes. 26:11.
[Ntlha e e kwa tlase]
O ka Araba Jang?
• O ka nna le bothokgami jang?
• O ka boloka bothokgami ka ditsela dife?
• O ka dira jang gore o boe o thokgame gape?
[Dipotso Tsa Thuto]
[Lebokoso mo go tsebe 8]
‘O Dirile Tiro E E Molemo’
Mafoko ao a ne a buiwa ke mosadi mongwe yo e neng e le moimana wa dikgwedi tse tlhano, a bua ka bopelonomi le bothokgami jwa motho mongwe yo a sa mo itseng. Mosadi yono o ne a ntse a le kwa lebenkeleng la kofi mme morago ga nako e telele a dule kwa lebenkeleng leo, o ne a lemoga gore o ne a lebetse sepatšhe sa gagwe teng. Sepatšhe seo se ne se na le R16 000, madi a mantsi thata a a neng a sa tlwaela go a tshola. Moragonyana o ne a bolelela lokwalodikgang longwe jaana: “Ke ne ke eme tlhogo.” Le fa go ntse jalo, morweetsana mongwe o ne a bona sepatšhe seo mme ka bonako o ne a batla mong wa sone. Ga a ka a mmona mme o ne a se isa kwa seteisheneng sa mapodise, mme bone ba ne ba batla mosadi yono wa moimana ba bo ba mmona. Mong wa sepatšhe seno o ne a bua jaana a itumetse: “Ruri motho yono o dirile tiro e e molemo fela thata.” Ke eng fa morweetsana yono a ne a tsere matsapa a magolo jaana go busa madi ao? Lokwalodikgang loo lo ne lwa re ka gonne e le Mosupi wa ga Jehofa, a re “bodumedi jo a goletseng mo go jone ke jone bo dirileng gore a bontshe bothokgami.”
[Setshwantsho mo go tsebe 9]
Basha ba ka kgona go boloka bothokgami fa ba lekwa
[Setshwantsho mo go tsebe 10]
Dafide o ne a se ka a boloka bothokgami ka lobaka lo lo rileng, mme o ne a baakanya ditsela tsa gagwe