“Ke ka Ntlha Yang fa re Tshela?”

MOGAPI wa Sekgele sa Nobel e bile e le mofalodi wa Go Gailwa ga Batho ke Banasi e bong Elie Wiesel o kile a re ke “potso ya botlhokwa thata e motho a ka e ipotsang.” Ke potso efe eo? Potso ya gore, “Ke ka ntlha yang fa re tshela?”

A o kile wa akanyetsa kwa teng ka potso eo? Batho ba bantsi ba kile ba akanya thata ka yone mme ga ba bone karabo. Fa rahisitori wa Boritane e bong Arnold Toynbee a ne a batla go itse gore bokao jwa botshelo ke eng, o ne a re: “Mokgele wa batho wa mmatota ke gore ba galaletse Modimo mme ba itumedisiwe ke Ene ka bosakhutleng.”

Go a kgatlha go itse gore dingwaga di le dikete di le tharo tse di fetileng monna yo mongwe, yo o neng a itsiwe a le tlhaga ka tsela e a neng a ela botshelo tlhoko ka yone o ne a setse a bone karabo ya potso eno. Kgosi Solomone yo o botlhale o ne a re: “Bokhutlo jwa kgang ke jo, sengwe le sengwe se se setseng se utlwilwe, ke se: Boifa Modimo wa boammaaruri mme o boloke ditaelo tsa gagwe. Gonne seno ke tshwanelo yotlhe ya motho.”—Moreri 12:13.

Morwa Modimo, Jesu Keresete, o ne a buelela molaomotheo oo. Fa Jesu a ne a le mo lefatsheng o ne a dira ka natla go galaletsa Rraagwe yo o kwa legodimong. Go direla Mmopi wa gagwe go ne go dira gore botshelo jwa ga Jesu bo nne le bokao. Go ne go mo nonotsha, ke gone mo a neng a re: “Dijo tsa me ke gore ke dire thato ya yo o nthomileng.”—Johane 4:34.

Ka jalo ke ka ntlha yang fa re tshela? Jaaka Jesu, Solomone le batlhanka ba bangwe ba Modimo ba bantsi, re ka bona bokao jwa mmatota jwa botshelo le boitumelo jo bo nnelang ruri fa re dira thato ya Modimo. A o ka rata go itse gore o ka obamela Modimo jang “ka moya le ka boammaaruri”? (Johane 4:24) Basupi ba ga Jehofa ba mo lefelong la gaeno ba tla itumelela go go thusa go bona karabo ya potso e e reng “Ke ka ntlha yang fa re tshela”?