Tila go Akanya ka Tsela E e Sa Siamang!

FA TLHOGO ya lotso e bong Jobe a ne a lebane le masetlapelo, o ne a etelwa ke ditsala tsa gagwe tse tharo e bong Elifase, Biledade le Sofare. Ba ne ba tlile go mo gomotsa le go lela le ene. (Jobe 2:11) Go bonala Elifase e ne e le ene yo mogolo mo go bone e bile a na le tlhotlheletso e kgolo. Ke ene yo o neng a simolola go bua e bile a bua go feta ba bangwe. Makgetlho a le mararo a Elifase a neng a bua ka one a ne a bontsha gore e ne e le motho yo o akanyang jang?

Fa Elifase a ne a gopola tiragalo e e sa tlwaelegang e e kileng ya mo diragalela, o ne a re: “Moya ka boone o ne wa feta mo godimo ga sefatlhego sa me; moriri wa letlalo la me o ne wa simolola go tlhonya. O ne wa ema o sa tshikinyege, mme ga ke a ka ka lemoga ponalo ya one; go ne go na le sebopego sengwe fa pele ga matlho a me; go ne go na le tshisibalo, mme jaanong ka utlwa lentswe.” (Jobe 4:15, 16) Ke moya o o ntseng jang o o neng wa tlhotlheletsa tsela e Elifase a neng akanya ka yone? Tsela e a neng a tshwayatshwaya diphoso ka yone fa a simolola go bua gape e bontsha gore ruri moya oo e ne e se mongwe wa baengele ba ba siameng ba Modimo. (Jobe 4:17, 18) E ne e le sebopiwa se se boikepo sa moya. Fa go ne go sa nna jalo, a Jehofa o ka bo a kgalemetse Elifase le ditsala tsa gagwe tse pedi ka ntlha ya go bua maaka? (Jobe 42:7) Tota Elifase o ne a tlhotlheleditswe ke ledimona. Dilo tse a neng a di bua ga di dumalane le tsela e Modimo a lebang dilo ka yone.

Re ka lemoga eng mo dilong tse Elifase a neng a di bua? Ke ka ntlha yang fa go le botlhokwa gore re itlhokomele gore re se ka ra akanya ka tsela e e sa siamang? Mme re ka dirang gore re lwantshane le go akanya ka tsela e e sa siamang?

“Ga a Na Tumelo mo Batlhankeng ba Gagwe”

Mo makgetlhong a le mararo a Elifase a neng a bua mo go one, o ne a ntsha mogopolo wa gore Modimo o re batla dilo tse dintsi jaana mo e leng gore ga go na sepe se batlhanka ba gagwe ba se dirang se se mo kgotsofatsang. Elifase o ne a raya Jobe a re: “Bona! Ga a na tumelo mo batlhankeng ba gagwe, mme o pega barongwa ba gagwe molato.” (Jobe 4:18) Moragonyana Elifase o ne a bua jaana ka Modimo: “Ga a na tumelo mo baitsheping ba gagwe, le magodimo tota ga a phepa mo matlhong a gagwe.” (Jobe 15:15) Mme o ne a botsa a re: “A Mothatayotlhe o na le kgatlhego epe ya go bo o le tshiamo?” (Jobe 22:3) Biledade o ne a dumalana le se Elifase a neng a se bua ka gonne o ne a re: “Go na le ngwedi, mme ga e phatsime; le dinaledi ka botsone ga di phepa mo matlhong a [Modimo].”—Jobe 25:5.

Re tshwanetse go itisa gore re se ka ra tlhotlhelediwa ke tsela e e ntseng jalo ya go akanya. Seo se ka dira gore re akanye gore Modimo o re batla dilo tse dintsi thata. Go akanya ka tsela eo go ka senya kamano ya rona le Jehofa. Mo godimo ga moo, fa re ineela go nna le pono e e ntseng jalo, re tla arabela jang fa re newa kgakololo? Go na le gore re amogele kgakololo ka boikokobetso, dipelo tsa rona di ka  nna tsa “galefela Jehofa ka boene,” re bo re nna ka sekgopi. (Diane 19:3) Ruri seno se tla re tsenya mo kotsing e kgolo tota ya semoya!

“A Monna yo o Nonofileng a ka Nna le Thuso mo Modimong?”

Selo se sengwe gape se se tshwanang le go akanya gore Modimo o re batla dilo tse dintsi thata ke go akanya gore o leba batho e se ba sepe. Fa Elifase a ne a bua lekgetlho la boraro o ne a botsa jaana: “A monna yo o nonofileng a ka nna le thuso mo Modimong ka boene, mo e leng gore ope fela yo o nang le temogo a ka nna le thuso mo go ene?” (Jobe 22:2) Tota Elifase o ne a raya gore batho ga ba na mosola ope mo Modimong. Biledade le ene o ne a re: “Motho yo o nang le go swa a ka nna yo o se nang molato jang fa pele ga Modimo, kgotsa motho yo o tsetsweng ke mosadi a ka nna phepa jang?” (Jobe 25:4) Go ya ka ene, Jobe, e leng mothonyana fela yo o swang, a ka nna jang le boemo jo bo siameng fa pele ga Modimo?

Gompieno batho bangwe ba na le maikutlo a go sa ithate. Dilo tse di tshwanang le tsela e ba godisitsweng ka yone, mathata a ba nnileng le one mo botshelong kana go tlhoiwa ka ntlha ya morafe kana setso sa bone e ka nna tsone tse di dirileng gore ba ikutlwe jalo. Mme gone Satane le madimona a gagwe le bone ba itumelela go kgoba batho. Fa ba ka kgona go dira gore motho a ikutlwe a sa dire sepe se se kgotsofatsang Modimo Mothatayotlhe, seno se ka dira gore a inyatse le go feta. Fa nako e ntse e ya, motho yono a ka katogela kgakala le Modimo yo o tshelang kana a kgaogana le ene.—Bahebera 2:1; 3:12.

Botsofe le botsogo jo bo seng bontle di ka dira gore re se ka ra kgona go dira sengwe le sengwe. Fa re tsaya se re se dirang gone jaanong mo tirelong ya Bogosi re se bapisa le se re neng re se dira fa re ne re sa ntse re le basha, fa re ne re na le botsogo jo bontle e bile re na le maatla a a oketsegileng, se re se dirang gone jaanong se ka lebega se le sennye thata. Go botlhokwa gore re lemoge gore Satane le madimona a gagwe ba batla gore re ikutlwe re se na sepe se re se dirang se se kgotsofatsang Modimo! Re tshwanetse go tila go akanya ka tsela e e ntseng jalo.

Kafa re ka Tilang ka Gone go Akanya ka Tsela E e Sa Siamang

Jobe o ne a bua jaana le fa gone Satane Diabolo a ne a mmogisa: “Nka se tlose bothokgami jwa me mo go nna go fitlha ke swa!” (Jobe 27:5) E re ka Jobe a ne a rata Modimo, o ne a iketleeleditse go boloka bothokgami jwa gagwe le fa go ne go ka direga eng, mme ga a ka a letla sepe se fetole tsela e a neng a akanya ka yone. Eno ke ntlha e e botlhokwa e e ka re thusang go tila go akanya ka tsela e e sa siamang. Re tshwanetse go tlhaloganya lorato lwa Modimo sentle re ithute go le anaanela thata. Gape re tshwanetse go godisa tsela e re mo ratang ka yone. Re ka dira seno ka go ithuta Lefoko la Modimo ka metlha le go tlhatlhanya ka se re ithutang sone mmogo le go mo rapela gore a re thuse.

Ka sekai, Johane 3:16 ya re: “Modimo o ratile lefatshe mo go kalo mo a bileng a ntsha Morwawe yo o tsetsweng a le esi.” Jehofa o rata batho thata, mme seo se bontshiwa ke tsela e a neng a dirisana le batho ka yone go ralala dingwaga. Go tlhatlhanya ka dikai tsa batho ba nako e e fetileng go tshwanetse ga godisa tsela e re anaanelang Jehofa ka yone le kafa re mo ratang ka teng, mme seo se tla re thusa go tila go akanya ka tsela e e sa siamang.

Akanya ka tsela e Jehofa a neng a dirisana ka yone le Aborahame fa a ne a tla senya Sodoma le Gomora. Aborahame o ne a botsa Jehofa ka makgetlho a le robedi ka katlholo ya Gagwe. Jehofa ga a ise a ko a tenege kana go betwa ke pelo. Go na le moo, tsela e a neng a araba Aborahame ka yone e ne ya gomotsa Aborahame. (Genesise 18:22-33) Moragonyana fa Modimo a ne a falotsa Lote le lelapa la gagwe kwa Sodoma, Lote o ne a kopa go tshabela kwa motseng o o gaufi go na le gore a tshabele kwa dithabeng. Jehofa o ne a mo araba ka go re: “Bona, ke go bontsha bopelotlhomogi go tla go fitlha fano, ka go sa ribegetse motse o o buileng ka one.” (Genesise 19:18-22) A ditiragalo tseno di bontsha gore Jehofa ke mmusi yo o re batlang dilo tse dintsi, yo o se nang lorato e bile a gobelela? Nnyaa. Di bontsha se tota a leng sone—Mmusi yo o lorato, yo o kutlwelobotlhoko e bile a sa gagamatse letsogo.

Dikai tsa ga Arone, Dafide le Manase wa Iseraele wa bogologolo di bontsha gore Modimo ga se Modimo yo o ratang go tshwayatshwaya diphoso le yo go se nang sepe se re se dirang se se mo kgotsofatsang. Arone o ne a dirile diphoso tse tharo tse dikgolo. O ne a dirile namane ya gouta, a ikopantse le kgaitsadie e bong Miriame gore ba tshwaye Moshe phoso e bile ga a ka a naya Modimo tlotlo kwa  Meriba. Le fa go ntse jalo, Jehofa o ne a bona dinonofo tse dintle mo go ene mme a mo letla gore a tswelele a le moperesiti yo mogolo go fitlhela a swa.—Ekesodo 32:3, 4; Dipalo 12:1, 2; 20:9-13.

Kgosi Dafide o ne a dira maleo a a maswe ka nako ya puso ya gagwe. Maleo ano a ne a akaretsa go dira boaka, go loga leano la go bolaya monna yo o se nang molato le go bala batho e se kafa molaong. Le fa go ntse jalo, Jehofa o ne a bona boikwatlhao jwa ga Dafide mme ka boikanyegi a diragatsa kgolagano ya Bogosi e a neng a e dirile le ene ka go mo letla gore a tswelele a le kgosi go fitlha a swa.—2 Samuele 12:9; 1 Ditiragalo 21:1-7.

Kgosi Manase wa Juda o ne a tlhomela Baale dibeso, a dira gore bomorwawe ba kgabaganye molelo, a rotloetsa batho go dirisana le meya a bo a aga dibeso tsa kobamelo ya maaka mo malwapeng a tempele. Le fa go ntse jalo, fa a sena go ikwatlhaya go tswa pelong, Jehofa o ne a mo itshwarela, a mo golola mo botshwarong a bo a mmusetsa bogosi jwa gagwe. (2 Ditiragalo 33:1-13) A Modimo yo o sa kgotsofaleleng sepe se batho ba se dirang a ka dira jalo? Le e seng!

Molatofatsi wa Maaka ke Ene yo o Leng Molato

Ga re a tshwanela go gakgamadiwa ke go bo Satane e le ene yo o dirang dilo tse a latofatsang Jehofa ka tsone. Satane o setlhogo e bile ke mogateledi. Re ka bona seno sentle mo tlwaelong ya go ntsha bana ditlhabelo e e amanang le kobamelo ya maaka e e neng e dirwa mo nako e e fetileng. Baiseraele ba batlhanogi ba ne ba fisa bomorwaabone le bomorwadiabone mo molelong—selo se se neng se sa tla le mo pelong ya ga Jehofa.—Jeremia 7:31.

Satane ke ene motho yo o ratang go tshwayatshwaya diphoso, e seng Jehofa. Tshenolo 12:10 e bitsa Satane “molatofatsi wa bakaulengwe ba rona . . . , yo o ba latofatsang bosigo le motshegare fa pele ga Modimo wa rona!” Kafa letlhakoreng le lengwe, mopesalema o ne a opela jaana ka Jehofa: “Fa nkabo o lebelela ditlolo, wena Jah, Jehofa, ke mang yo o neng a ka ema? Gonne o na le boitshwarelo jwa boammaaruri, gore o tle o boifiwe.”—Pesalema 130:3, 4.

Fa go Akanya ka Tsela E e Sa Siamang go sa Tlhole go le Gone

A bo dibopiwa tsa semoya tsa baengele di tshwanetse tsa bo di ile tsa itumela jang ne fa Satane Diabolo le madimona a gagwe ba kobiwa kwa legodimong! (Tshenolo 12:7-9) Morago ga moo, meya eo e e bosula e ne e sa tlhole e kgona go kgoreletsa ditiro tsa lelapa la ga Jehofa la baengele ba ba kwa legodimong.—Daniele 10:13.

Mo nakong e e sa fediseng pelo, baagi ba lefatshe ba tla itumela. Go ise go ye kae, moengele yo o fologang kwa legodimong ka selotlolo sa molete le keetane e kgolo mo seatleng sa gagwe o tla golega Satane le madimona a gagwe a bo a ba latlhela mo moleteng wa go sa dire sepe. (Tshenolo 20:1-3) A bo re tla gololesega jang ne fa seno se direga!

Mme gone jaanong, re tshwanetse go itisa gore re se ka ra akanya ka tsela e e sa siamang. Fa go direga gore re akanye ka tsela e e sa siamang, re tshwanetse go lwantsha seo mme re tlhome mogopolo mo tseleng e Jehofa a re ratang ka yone. Fa re dira jalo, ‘kagiso ya Modimo e e gaisang kakanyo yotlhe e tla disa dipelo tsa rona le maatla a rona a mogopolo.’—Bafilipi 4:6, 7.

[Setshwantsho mo go tsebe 26]

Jobe o ne a tila go akanya ka tsela e e sa siamang

[Setshwantsho mo go tsebe 28]

Lote o ne a ithuta gore Jehofa ke Mmusi yo o sa gagamatseng letsogo