Kgang ya Botshelo

Go Itumela yo Modimo wa Gagwe e Leng Jehofa

JAAKA GO BOLETSE TOM DIDUR

Holo ya motse e ne e setse e hirilwe. Go ne go lebeletswe batho ba ka nna 300 go tla kopanong kwa Porcupine Plain, Saskatchewan, kwa Canada. Ka Laboraro kapoko e ne ya simolola go wa, mme ka Labotlhano e ne e le ntsi mo go neng go sa bonale sepe. Go ne go le botsididi jwa -40°C. Go ne ga tla batho ba le 28, go akaretsa le bana ba le mmalwa. E ne e le kopano ya me ya ntlha ke le molebedi wa potologo, ke na le dingwaga di le 25 fela mme ke ne ke tshogile. Pele ga ke go bolelela gore go diragetseng, mma ke go tlotlele gore go tlile jang gore ke itumelele tshiamelo eno e e kgethegileng ya tirelo.

KE NGWANA wa bosupa mo baneng ba le robedi, rotlhe re basimane. Yo mogolo e ne e le Bill, ga latela Metro, John, Fred, Mike le Alex. Nna ke tshotswe ka 1925 mme Wally ke ene yo mmotlana mo go rona rotlhe. Re ne re nna gaufi le toropo ya Ukraina, kwa Manitoba, koo batsadi ba me, e bong Michael le Anna Didur, ba neng ba na le polasi e nnye gone. Rre o ne a bereka mo seporong sa terena, a tlhokometse karolo e nnye ya seporo. E re ka ntlonyana e ba neng ba e neilwe go robala mo go yone e e neng e le gaufi le seporo se se neng se le kgakala le mo batho ba nnang gone e ne e se lefelo le motho a ka godisetsang lelapa le legolo mo go yone, rona re ne re nna kwa polasing. Rre o ne a fetsa nako e ntsi a seo mo gae, ka jalo Mmè o ne a na le tiro e kgolo ya go re godisa. Ka dinako tse dingwe o ne a tsamaya a ya go nna le Rre lobaka lwa beke kgotsa go feta, mme o ne a tlhomamisa gore o re ruta go apaya, go baka dikuku le go dira ditiro tse dingwe tsa mo gae. Mme e re ka re ne re tsena Kereke ya Katoliki ya Gerika, sengwe sa dilo tse Mmè a neng a re ruta tsone re sa ntse re le bannye e ne e le go tshwara dithapelo ka tlhogo, le go nna le seabe mo meetlong e mengwe ya kereke.

Go Kopana le Boammaaruri Jwa Baebele

Ke simolotse go eletsa go tlhaloganya Baebele ke sa ntse ke le mosha. Moagelani mongwe wa rona, yo e  neng e le Mosupi wa ga Jehofa o ne a tlhola a etela lelapa la rona go tla go re balela sengwe mo Baebeleng malebana le Bogosi Jwa Modimo, Aramagedona, le masego a lefatshe le lesha. Mmè o ne a se na kgatlhego le e seng mo go se moagelani yono a neng a se bua, mme Mike le Alex bone ba ne ba rata se a se buang. Tota e bile se ba neng ba se ithuta se ne sa dira gore ba gane go ya bosoleng ka mabaka a segakolodi ka nako ya ntwa ya bobedi ya lefatshe. Ka ntlha ya seo Mike o ne a atlholelwa go ya kgolegelong ka lobakanyana, mme Alex ene a isiwa kwa kampeng e batho ba dirisiwang tiro e e bokete mo go yone kwa Ontario. Fa nako e ntse e ile, Fred le Wally le bone ba ne ba amogela boammaaruri. Le fa go ntse jalo, bonkgonne ba ntlha ba bararo bone ga ba a ka ba bo amogela. Ka dingwaga di le mmalwa Mmè le ene o ne a ganetsa boammaaruri mme moragonyana a re gakgamatsa rotlhe ka go tsaya letlhakore la ga Jehofa. O ne a kolobediwa a na le dingwaga di le 83. Mmè o ne a na le dingwaga di le 96 fa a tlhokafala. Rre le ene o ne a rata boammaaruri pele ga a swa.

Fa ke ne ke le dingwaga di le 17, ke ne ka ya kwa Winnipeg go ya go batla tiro le gore ke kopane le ba ba neng ba ka nthusa go ithuta Baebele. Basupi ba ga Jehofa ba ne ba thibetswe ka nako eo, mme gone ba ne ba tshwara dipokano ka metlha. Pokano ya ntlha e ke neng ka ya kwa go yone e ne e tshwaretswe mo legaeng la mongwe. E re ka ke godisitswe ka tumelo ya Katoliki ya Gerika, se ke neng ke se utlwa se simolotse se nkgakgamatsa. Le fa go ntse jalo, ka iketlo ke ne ka simolola go tlhaloganya gore ke ka ntlha yang fa thulaganyo ya go nna le baruti le batho fela ba ba tsenang kereke e ne e se thuto ya Dikwalo le gore ke ka ntlha yang fa Modimo a ne a sa amogele dithapelo tsa baruti fa ba rapelela ntwa. (Isaia 2:4; Mathaio 23:8-10; Baroma 12:17, 18) Kgang ya go tshela mo Paradaiseng e e mo lefatsheng e ne e bonala e le selo se se ka kgonegang e bile e ne e utlwala botoka go feta go ya kwa lefelong lengwe le le kwa kgakala go ya go nna teng ka bosakhutleng.

E re ka ke ne ke tlhatswegile pelo gore seno e ne e le boammaaruri, ke ne ka ineela mo go Jehofa mme ka kolobediwa ka 1942 kwa Winnipeg. Ka 1943 thibelo e e neng e beetswe Basupi ba ga Jehofa kwa Canada e ne ya tlosiwa, mme tiro ya go rera ya tswelela ka lobelo lo logolo. Boammaaruri jwa Baebele le jone bo ne bo simolola go nwelelela mo pelong ya me. Ke ne ka nna le tshiamelo ya go nna motlhanka mo phuthegong le go neela dipuo tsa phatlalatsa mo mafelong a a farologaneng a tshimo ya rona le go bereka mo ditshimong tse di sa abiwang. Go ya dikopanong tse dikgolo kwa United States go ne ga nthusa thata go gola semoyeng.

Go Oketsa Tsela e ke Neng ke Direla Jehofa ka Yone

Ka 1950 ke ne ka ikwadisetsa go nna modiredi wa mmulatsela, mme ka December ya one ngwaga oo, ke ne ka lalediwa gore ke ye go nna molebedi wa potologo. Ke ne ka nna le tshiamelo ya go thapisediwa gaufi le Toronto, ke thapisiwa ke Charlie Hepworth, mokaulengwe mongwe yo o nang le maitemogelo e bile a ikanyega. Gape ke ne ka itumelela go fetsa beke ya bofelo ke thapisiwa ke na le nkgonne, e bong Alex, yo o neng a setse a le mo tirong ya go potologa kwa Winnipeg.

Ga ke na ke tsamaya ke lebala kopano ya me ya ntlha ya potologo, e e tlhalosiwang kwa tshimologong. Jaaka o ka lebelela ke ne ke tshwenyegile ka gore dilo di tla tsamaya jang. Mme gone, molebedi wa rona wa kgaolo, e bong Mokaulengwe Jack Nathan, o ne a dira gore re nne re tshwaregile e bile re itumetse. Re ne ra sobokanya thulaganyo ya kopano le bakaulengwe ba ba neng ba tlile go nna le seabe ba ba neng ba setse ba fitlhile. Re ne re ntse re refosanya re bolelelana maitemogelo, re ikatisetsa go bua mo tshimong, go dira maeto a go boela, le go bontsha kafa re ka tshwarang dithuto tsa magae tsa Baebele ka gone. Re ne re opela dipina tsa Bogosi. Dijo e ne e le motlele. Mo e ka nnang diura dingwe le dingwe tse pedi re ne re fiwa kofi le dijo tse di bidiwang phae. Bangwe ba ne ba robala mo dibankeng le mo seraleng, fa ba bangwe bone ba robetse mo bodilong. Ka Sontaga sefefo se ne sa kokobela go sekae mme ga tla ba le 96 go tla go reetsa puo ya phatlalatsa. Tiragalo eno e ne ya nthuta go itshokela maemo a a thata.

Kabelo ya me e e latelang ya go potologa e ne e le kwa Alberta kafa bokone, British Columbia, le Yukon Territory, e leng naga e letsatsi le phirimang bosigo thata mo go yone. Go tsaya mosepele mo Tselakgolong ya Alaska e e neng e se mo maemong a mantle e  e tswang kwa Dawson Creek, kwa British Columbia, go ya kwa Whitehorse, kwa Yukon (sekgala sa dikilometara di le 1 477), mme re tla re neela bosupi, go ne go tlhoka boitshoko le go nna kelotlhoko thata. Go gosomana ga kapoko, mekgokolosa e e relelang ya dithaba, le go se bone sentle ka ntlha ya go foka ga kapoko, e ne e le dikgoreletsi tse dikgolo thata.

Ke ne ka gakgamadiwa ke go bona ka tsela e boammaaruri bo neng jwa anamela ka teng kwa Kgaolong e e Kwa Kgakala ya Bokone. Ka lekgetlho lengwe nna le Walter Lewkowicz re ne ra ya kwa ntlwaneng nngwe e e dirilweng ka dikgong ya maemo a a kwa tlase thata e e neng e le gaufi le Lower Post, kwa British Columbia, go bapa le Tselakgolo ya Alaska gaufi le molelwane wa Yukon Territory. Re ne re itse gore go tshwanetse ga bo go na le mongwe yo o nnang mo ntlwaneng eno ka gonne re ne re kgona go bona lesedinyana ka letlhabaphefo le lennye. E ne e ka nna ka ura ya borobongwe maitseboa, mme re ne ra kokota mo ntlong eno. Lentswe la monna le ne la goa la re re tsene, mme ra tsena. Re ne ra gakgamala tota go bona monnamogolo a kaname mo bolaong jwa gagwe jwa matlhatlhaganyane a bala makasine wa Tora ya Tebelo! Tota e bile o ne a tshwere makasine o mosha go feta o re neng re mo naya one. O ne a re tlhalosetsa gore o ne a amogela poso ya gagwe ka sefofane. E re ka ka nako eo re ne re setse re na le malatsi a feta robedi re seo mo phuthegong, re ne re ise re amogele dimakasine tse disha. Monna yono o ne a re bolelela gore leina la gagwe ke Fred Berg, le gore le mororo a na le dingwaga di le mmalwa jaanong a ntse a amogela peeletso ya dimakasine, e ne e le lekgetlho la ntlha a etelwa ke Basupi ba ga Jehofa. Fred o ne a kopa gore re robale mo ga gagwe bosigong joo. Re ne ra kgona go tlotla le ene dilo di le dintsi ka boammaaruri jwa Dikwalo ra ba ra rulaganya gore Basupi ba bangwe ba ba neng ba feta fa ga gagwe ka metlha ba mo etele.

Ka dingwaga di le mmalwa ke ne ke potologa mo dipotologong di le tharo tse dinnye. Di ne di simolola kwa Grande Prairie, kwa Alberta, kafa botlhaba go ya kwa Kodiak, kwa Alaska, kwa bophirima, sekgala sa dikilometara di le 3 500.

Go ne go intumedisa go lemoga gore le mo mafelong a a kwa kgakala, fela jaaka le mo mafelong a mangwe otlhe, batho botlhe ba ka kgona go amogela bopelonomi jo bo sa re tshwanelang jwa ga Jehofa le gore moya wa Modimo o tlhotlheletsa megopolo le dipelo tsa ba ba iketleeditseng go bona botshelo jo bo sa khutleng. Mongwe wa batho bano e ne e le Henry Lepine go tswa kwa Dawson City, kwa Yukon, e gone jaanong e bidiwang Dawson. Henry o ne a nna kwa lefelong  le le kwa thoko. Tota e bile o ne a na le dingwaga di feta 60 a ise a ko a tswe mo lefelong leno la moepo wa gouta. Le fa go ntse jalo, moya wa ga Jehofa o ne wa tlhotlheletsa monna yono wa dingwaga di le 84 go tsaya loeto lwa dikilometara di feta di le 1 600, go ya kwa Anchorage kwa kopanong ya potologo, le mororo a ise a ko a ye pokanong ya phuthego. O ne a itumelela go utlwa thulaganyo a bo a itumedisiwa thata ke go nna mmogo le bakaulengwe. E ne ya re fa Henry a boela kwa Dawson City, o ne a nna a ntse a ikanyega jalo go fitlha a swa. Ba le bantsi ba ba neng ba itse Henry ba ne ba ipotsa gore ke eng se se tlhotlheleditseng monnamogolo yono go tsaya loeto lo loleele jaana. Go ipotsa seno go dirile gore ba bangwe ba le mmalwa ba ba godileng le bone ba amogele boammaaruri. Ka jalo Henry o ne a kgona go neela bosupi le fa e ne e se ka tlhamalalo.

Ke ne Ka Amogela Bopelonomi Jo bo Sa re Tshwanelang Jwa ga Jehofa

Ka 1955, ke ne ka itumela tota fa ke ne ke amogela taletso ya gore ke nne teng mo tlelaseng ya bo26 ya Sekolo sa Baebele sa Watchtower sa Gileade. Thapiso e ke neng ka e amogela gone e ne ya nonotsha tumelo ya me ya ba ya nthusa go atamalana gaufi le Jehofa. Fa ke sena go aloga ke ne ka abelwa go ya go tswelela gape ka tiro ya go potologa kwa Canada.

Ke ne ka potologa mo porofenseng ya Ontario ka lobaka lwa ngwaga. Go tswa foo ke ne ka abelwa kwa Kgaolong ya Bokone e ntlentle. Ke sa ntse ke kgona go bona mo mogopolong wa me ditsela tse dikgolo tsa teng tse di dikologilweng ke bontle jwa tlhago, makadiba a a nang le metsi a a phepa e bile re tlhatloga dithaba tse di nang le kapoko kwa setlhoeng. Fa go le selemo, mekgatšha le naga e kete ke boalo jo bontle jwa dithunya tsa naga. Go nkga mowa o o monate e bile metsi a teng a itshekile. Dibera, bophiri, dikgama le diphologolo tse dingwe tsa naga di itsamatsamaela fela mo lefelong la tsone, go se na ope yo o di tshwenyang.

Le fa go ntse jalo, mo Alaska le teng go ne go na le mathata a gone—e seng fela ka ntlha ya maemo a bosa a a nnang a fetofetogetse ruri mme gape le ka ntlha ya sekgala se seleele se se neng se le mo gare ga mafelo a a farologaneng. Potologo ya me e ne e le bogolo jwa dikilometara di ka nna 3 200 go tswa kwa botlhaba go ya kwa bophirima. Ka nako eo go ne go se na thulaganyo ya gore molebedi wa potologo a nne le koloi ya gagwe. Bakaulengwe ba ke ba etetseng ba ne ba ithaopela go ntsaya mo phuthegong e nngwe ba nkisa kwa go e nngwe. Le fa go ntse jalo, ka dinako tse dingwe ke ne ke tshwanelwa ke go kopa bakgweetsi ba dilori le bajanala gore ba mpege.

Tiragalo nngwe ya mofuta oo e ne e le fa ke ne ke le mo mosepeleng o moleele mo Tselakgolong ya Alaska, mo gare ga Tok Junction, kwa Alaska, le Mile 1202, kgotsa karolo ya Scotty Creek. Mo karolong eno, go tswa mo ofising e nngwe ya lekgetho la dithoto go ya kwa go e nngwe e ne e le sekgala sa dikilometara di ka nna 160. Ke ne ka feta mo ofising ya lekgetho la dithoto ya United States kwa Tok mme mongwe a mpega sekgala sa dikilometara di ka nna 50. Morago ga moo, ga go a ka ga tla koloi epe, mme ke ne ka tsamaya diura di ka nna lesome sekgala sa dikilometara di le 40. Ke ne ka utlwa moragonyana gore e ne ya re fela fa ke sena go kgabaganya mo ofising eno ya lekgetho la dithoto, dikoloi tsotlhe di ne tsa emisiwa mo tselakgolong eno ka ntlha ya kapoko e e neng e ole sekgalanyana go tswa mo ofising eno ya lekgetho. Bosigogare go ne go nna botsididi jwa -23°C, mme ke ne ke sa ntse ke saletswe ke dikilometara di le 80 gore ke fitlhe kwa lefelong le le fa gaufi la go itshireletsa mo serameng seno. Ke ne ke itlhokela fela lefelo le ke neng ke tla ikhutsa mo go lone.

Fa ke ntse ke tsamaya ke tlhotsa, ke ne ka bona kara nngwe e e neng e tlogetswe gaufi le tsela, e khurumeditswe go sekae ke kapoko. Ke ne ka akanya gore ke ne nka tshabela serame mo go yone fa fela ke ne nka kgona go tsena mme ke robale mo ditulong tsa yone. Ke ne ka kgona go tlosa kapoko e e lekaneng gore ke  kgone go bula setswalo, mme ka fitlhela e ntshitswe sengwe le sengwe mo teng ga yone. Se se itumedisang ya nna gore fa ke sena go fetela pele go sekae fela mo go yone tsela eo, ke ne ka bona ntlonyana e e neng e se na sepe mo teng. Morago ga go tshwaragana le mathata a go leka go tsena mo teng ga ntlo eo le go gotsa molelo, ke ne ka kgona go ikhutsa diura di le mmalwa. Mo mosong, mongwe o ne a mpega go ya go fitlha kwa lefelong le le latelang le ke neng ke ile go gorogela kwa go lone, kwa ke neng ka bona dijo tse ke neng ke di tlhoka thata le go kgona go fapa menwana ya me e e neng e gobetse.

Jehofa o Dira Gore Tiro e Gole Kwa Bokone

Loeto lwa me lwa ntlha go ya kwa Fairbanks e ne e le lo lo kgothatsang thata. Re ne ra atlega thata mo bodireding mme go ne ga tla batho ba ka nna 50 go tla go reetsa puo ya phatlalatsa ka Sontaga seo. Re ne ra kopanela mo legaeng le lennye la barongwa kwa Vernor le Lorraine Davis ba neng ba nna teng. Batho ba ne ba ntshitse ditlhogo ba le mo kamoreng ya boapeelo, mo kamoreng ya borobalo, le mo phashiting gore ba utlwe puo. Re ne ra lemoga go tswa mo tseleng eno e ntle e ba neng ba arabela ka yone gore Holo ya Bogosi e ne e tlile go thusa go dira gore tiro ya go rera e tsepame mo Fairbanks. Ka jalo, ka thuso ya ga Jehofa re ne ra kgona go reka kago nngwe e kgolo e e kileng ya bo e le holo ya go tantsha, mme ra e fudusetsa kwa karolong e nngwe ya naga. Go ne ga epiwa sediba, mme ga tsenngwa matlwana a boithomelo le dilwana tsa go thuthafatsa kamore. E ne ya re ngwaga o ise o fele ke fa go na le Holo ya Bogosi e e neng e na le sengwe le sengwe se se tlhokegang kwa Fairbanks. Fa go sena go tsenngwa boapeelo, holo eno e ne ya dirisiwa go tshwarela kopano ya kgaolo ka 1958, mme ga tla batho ba le 330.

Ka selemo sa ngwaga wa 1960, ke ne ka tsaya mosepele o moleele ka koloi go ya kwa ntlokgolong ya lefatshe lotlhe ya Basupi ba ga Jehofa kwa New York go ya go tsenela dithuto tse di oketsegileng tsa balebedi botlhe ba ba etang ba United States le Canada. Fa ke ntse ke le koo, Mokaulengwe Nathan Knorr le bakaulengwe ba bangwe ba ba ikarabelang ba ne ba mpotsa gore a go ka kgonega go bula ofisi ya lekala kwa Alaska. Dikgwedi di le mmalwa moragonyana re ne ra itumelela go utlwa gore go simolola ka September 1, 1961, Alaska e ne e tla nna le ofisi ya yone ya lekala. Mokaulengwe Andrew K. Wagner o ne a abelwa go okamela tiro mo lekaleng leno. Ene le mosadi wa gagwe e bong Vera, ba ne ba ile ba direla kwa Brooklyn ka dingwaga di le 20 e bile ba ne ba na le maitemogelo le mo tirong ya go potologa. Bakaulengwe ba ne ba anaanela go tlhongwa ga ofisi ya lekala kwa Alaska fela thata ka gonne e ne e dira gore molebedi wa potologo a se ka a tshwanelwa ke go tsaya mesepele e meleele thata, mme e ne e mo thusa go tlhokomela thata dilo tse di tlhokwang ke diphuthego le ke ditshimo tse di kwa thoko.

Selemo sa ngwaga wa 1962 e ne e le nako e e itumedisang thata kwa Bokone. Ofisi ya lekala ya Alaska e ne ya neelwa, mme go ne ga tshwarwa le kopano ya kgaolo kwa Juneau, Alaska. Go ne ga agiwa Diholo Tsa Bogosi tse disha kwa Juneau le Whitehorse, kwa Yukon, ga ba ga simololwa ditlhopha di le mmalwa tse di kwa thoko.

Ke Boela Gape Kwa Canada

Ka dingwaga di le mmalwa ke ne ke ntse ke kwalelana le Margareta Petras yo o neng a le kwa Canada. Reta, jaaka a bidiwa, o ne a simolola tirelo ya go bula tsela ka 1947, a aloga kwa Gileade ka 1955, mme a bula tsela kwa botlhaba jwa Canada. Ke ne ka ipuelela mo go ene mme a dumela. Re ne ra nyalana kwa Whitehorse ka February 1963. Ka letlhabula la one ngwaga oo, ke ne ka abelwa go potologa kwa bophirima jwa Canada, mme re ne ra itumelela go direla koo mo dingwageng di le 25 tse di neng tsa latela.

Ka ntlha ya mathata a pholo, ka 1988 re ne ra abelwa go ya go nna babulatsela ba ba kgethegileng kwa Winnipeg, kwa Manitoba. Kabelo eno e ne e akaretsa go tlhokomela Holo ya Dikopano ka dingwaga di le tlhano. Re sa ntse re nna le seabe mo tirong e e itumedisang ya go dira barutwa go ya kafa maemo a re letlang ka gone. Fa re ne re sa ntse re potologa, re ne re simolola dithuto di le dintsi tsa Baebele mme re di tlogelela ba bangwe gore ba di tshware. Mme gone jaanong, ka bopelonomi jwa ga Jehofa jo bo sa re tshwanelang, re a di simolola re bo re nna le boitumelo jo bongwe gape jwa go bona batho ba re ithutang le bone ba gatela pele go fitlha ba ineela ba bo ba kolobediwa.

Ke tlhatswegile pelo gore go direla Jehofa ke yone tsela e e molemo go di gaisa tsotlhe mo botshelong. Ke tiro e e nang le matswela e bile e a kgotsofatsa, e bile e dira gore lorato lwa rona mo go Jehofa lo nne lo gole letsatsi le letsatsi. Seno ke sone se se lereng boitumelo jwa mmatota. Kabelo le fa e le efe ya dilo tsa puso ya Modimo e re nnileng le yone, kgotsa karolo le fa e le efe ya lefatshe e re abetsweng mo go yone, re dumalana le mopesalema yo o neng a re: “Go itumela setšhaba se Modimo wa sone e leng Jehofa!”—Pesalema 144:15.

[Setshwantsho mo go tsebe 24, 25]

Mo tirong ya go potologa

[Setshwantsho mo go tsebe 25]

Ke etetse Henry Lepine kwa Dawson City. Ke kafa molemeng

[Setshwantsho mo go tsebe 26]

Holo ya Bogosi ya ntlha kwa Anchorage

[Setshwantsho mo go tsebe 26]

Nna le Reta, ka 1998