Letlhoo ke go sa rate motho mongwe kgotsa batho ba ba rileng. Ga se go galefa ga nako eo fela mme ke sengwe se se tswelelang.

Go na le mabaka a mantsi a a dirang gore batho ba tlhoane. Batho ba ka tlhoa batho ba ba rileng le fa ba sa ba dira sepe se se phoso. Ba ka tlhoa batho bao ka gonne ba akanya gore batho bao ba bosula, ba kotsi le gore ga ba kitla ba fetoga. Ba ka tsaya gore batho bao ba a ba tshosetsa, ba a ba nyenyefatsa kgotsa ba ba pega molato ka ntlha ya mathata a a rileng. Batho ba ba tlhoileng ba bangwe ba ka tswa ba ile ba bogisiwa, ba direlwa tshiamololo kgotsa ba diragalelwa ke sengwe se se dirileng gore letlhoo leo le nne teng.

Ka dinako tse dingwe batho ba tlhoa ba bangwe le fa ba sa ba itse. Ka sekai, batho bangwe ba tlhoa ba bangwe ka gonne ba masika le ditsala ba ba tlhoile. Mo go rayang gore fa go na le mongwe mo lelapeng kgotsa mo setšhabeng yo o tlhoileng batho bangwe ba ba rileng, ba ba mo lelapeng leo kgotsa mo setšhabeng seo le bone ba ka simolola go ba tlhoa.

Fa re tlhaloganya gore go motlhofo go tlhoa ba bangwe, re tla kgona go tlhaloganya gore ke eng fa batho ba le bantsi ba tlhoana jaana. Gore re kgone go dira gore batho ba se ka ba tlhola ba tlhoana re tshwanetse go tlhaloganya gore letlhoo le simolotse jang. Baebele e re bolelela gore le simolotse jang.

LETLHOO GA LE A SIMOLOLA KA BATHO. Le simolotse fa moengele kwa legodimong yo moragonyana a neng a bidiwa Satane Diabolo a ne a tlhanogela Modimo. Satane “e ne e le mmolai go tloga kwa tshimologong” fa a ne a tlhanoga. E re ka e le ‘moaki e bile e le rramaaka,’ o tsweletse ka go dira gore batho ba tlhoane. (Johane 8:44; 1 Johane 3:11, 12) Baebele e a re o bosula, o tletse bogale e bile o tlhasela batho.—Jobe 2:7; Tshenolo 12:9, 12, 17.

GO MOTLHOFO GORE BATHO BA TLHOANE. Motho wa ntlha e bong Adame o ne a dira se Satane a neng a se dira ka go leofa. Ka ntlha ya seo, batho botlhe ba ne ba nna le boleo ba bo ba dira diphoso. (Baroma 5:12) Morwa wa ntlha wa ga Adame e bong Kaine o ne a tlhoa monnawe e bong Abele mo a neng a mmolaya. (1 Johane 3:12) Gone ke boammaaruri gore batho ba le bantsi ba rata ba bangwe e bile ba ba utlwela botlhoko. Mme ka ntlha ya boleo, batho ba bangwe ba le bantsi ba ikakanyetsa ba le bosi, ba pelotshetlha e bile ba itseela kwa godimo. Dilo tseno tsotlhe di dira gore ba tlhoe ba bangwe.—2 Timotheo 3:1-5.

GO MOTLHOFO GORE MOTHO YO O SA RATENG BA BA SA TSHWANENG LE ENE A BA TLHOE. Lefatshe le re tshelang mo go lone le dira gore batho ba se ka ba nna pelotlhomogi le gore ba tlhoane. “Lefatshe lotlhe le laolwa ke Satane” mme seno se dira gore batho ba se ka ba rata ba bangwe, ba ba tlhaole, ba ba kgobe ka mafoko, ba ba bogise le gore ba ba tlhasele.—1 Johane 5:19.

Mme gone Baebele ga e bue fela ka gore letlhoo le simolotse jang. Gape e bua ka gore letlhoo le ka fedisiwa jang.