1, 2. (a) Jehofa o re senoletse eng? (b) Isaia 46:10, 11 le 55:11 e re tlhomamisetsa gore go tla direga eng?

BAEBELE e simolola ka mafoko ano a a motlhofo mme gone a na le bokao jo bogolo: “Mo tshimologong Modimo o ne a bopa magodimo le lefatshe.” (Gen. 1:1) Ke boammaaruri gore ga re itse go le kalo ka dilo tse dintsi tse Modimo a di bopileng tse di jaaka lefaufau, lesedi le maatlakgogedi, e bile re kgona go bona bontlhabongwe fela jwa lobopo. (Mor. 3:11) Le fa go ntse jalo, Jehofa o re senoletse boikaelelo jwa gagwe ka lefatshe le ka batho. O ne a batla gore lefatshe e nne legae le le siametseng batho ba ba dirilweng mo setshwanong sa gagwe. (Gen. 1:26) Batho bano ba ne ba tla nna bana ba gagwe mme ene o ne a tla nna Rraabone.

² Kgaolo ya boraro ya Genesise e tlhalosa gore go na le sengwe se se neng sa kgoreletsa boikaelelo jwa ga Jehofa. (Gen. 3:1-7) Le fa go ntse jalo, selo seo se ne se ka kgona go rarabololwa ka gonne ga go na ope yo o ka thibelang boikaelelo jwa ga Jehofa. (Isa. 46:10, 11; 55:11) Ka jalo, re ka tlhomamisega gore boikaelelo jwa ga Jehofa jwa kwa tshimologong bo tla diragadiwa ka nako e a e beileng.

3. (a) Re tshwanetse go itse dithuto dife tsa botlhokwa gore re kgone go tlhaloganya molaetsa wa Baebele? (b) Ke eng fa gone jaanong re tlotla ka dithuto tseno gape? (c) Re tla sekaseka dipotso dife?

³ Ga go pelaelo gore re itse se Baebele e se buang ka boikaelelo  jwa Modimo ka lefatshe le batho le se e se buang ka seabe sa ga Jesu Keresete mo go diragadiweng ga boikaelelo jwa Modimo. Ke dithuto tsa botlhokwa e bile go ka direga gore ke tsone tsa ntlha tse re di ithutileng fa re ne re simolola go ithuta Lefoko la Modimo. Ka jalo, re batla go thusa batho ba ba siameng gore le bone ba itse dithuto tseno tsa botlhokwa. Gone jaanong, re mo letsholong la go laletsa batho ba le bantsi gore ba nne gone mo Segopotsong sa loso lwa ga Jesu Keresete. (Luke 22:19, 20) Ba ba tla nnang gone ba tla ithuta go le gontsi ka boikaelelo jwa Modimo. Ka jalo pele Segopotso se tla, go tla bo go le molemo gore re akanye ka dipotso tse re tla di botsang batho ba re ba laletsang le batho ba re ithutang Baebele le bone gore ba kgatlhegele go nna gone kwa tiragalong eno ya botlhokwa. Mo setlhogong seno, re tla sekaseka dipotso tse tharo: Boikaelelo jwa Modimo jwa kwa tshimologong e ne e le eng ka lefatshe le ka batho? Matsapa di a tsere kae? Mme ke eng fa setlhabelo sa thekololo sa ga Jesu se le botlhokwa gore boikaelelo jwa Modimo bo diragadiwe?

4. Popo e bontsha jang kgalalelo ya ga Jehofa?

⁴ Jehofa ke Mmopi yo o gakgamatsang, sengwe le sengwe se a se dirileng ke sa maemo a a kwa godimo. (Gen. 1:31; Jer. 10:12) Dilo tse dintle le tse di rulaganeng sentle tse Jehofa a di bopileng di re ruta eng? Fa re leba popo re kgatlhiwa ke tsela e dilo tse dikgolo le tse dinnye tse Jehofa a di bopileng di dirang tiro ya botlhokwa ka gone. Re kgatlhiwa ke disele tse di raraaneng tsa mmele wa motho, tsela e lesea le le sa tswang go tsholwa le leng lennye ka gone le bontle jwa phirimo ya letsatsi. Dilo tseno tsotlhe di a re kgatlha ka gonne re bopilwe re na le bokgoni jwa go itumelela dilo tse dintle.—Bala Pesalema 19:1; 104:24.

5. Jehofa o tlhomamisa jang gore dilo tse a di bopileng di dira ka thulaganyo?

⁵ Jehofa o beetse dilo tsotlhe tse a di bopileng melao, o tlhomile melao ya tlholego le ya boitsholo gore dilo tsotlhe di direge ka thulaganyo. (Pes. 19:7-9) Ka jalo, dilo tsotlhe mo lobopong di na le tiro e di e dirang mme di dira tiro eo go dumalana le boikaelelo jwa Modimo. Jehofa ke ene a tlhophang gore dilo tse a di bopileng di dirisana jang. Ka jalo, molao wa maatlakgogedi o dira gore go nne go na le moya o re ka o hemang mo lefatsheng, o laola diphefo tsa mawatle e bile o dira gore go nne le thulaganyo e e siameng ya dilo tsa tlholego e e re thusang gore re tswelele re tshela. Dilo tsotlhe tse Jehofa a di bopileng, go akaretsa batho, di laolwa ke melao eno. Tsela e dilo tse Jehofa a di bopileng di rulaganeng ka yone, e bontsha gore o na le boikaelelo ka lefatshe le ka batho. Fa re le mo bodireding re tshwanetse go bontsha batho gore ke mang Mmopi wa dilo tseno tse di kgatlhang.—Tshen. 4:11.

6, 7. Jehofa o ne a naya Adame le Efa dimpho dife?

⁶ Boikaelelo jwa ga Jehofa jwa kwa tshimologong e ne e le gore batho ba tshelele ruri mo lefatsheng. (Gen. 1:28; Pes. 37:29) O ne a naya Adame le Efa dimpho di le dintsi tse di neng di dira gore ba itumelele botshelo. (Bala Jakobe 1:17.) Jehofa o ne a ba naya kgololesego ya go itlhophela, bokgoni jwa go akanya le bokgoni jwa go rata ba bangwe le go itumelela go nna le ditsala. Modimo o ne a bua le Adame mme a mo naya melao e a neng a tshwanetse go e ikobela. Gape Adame o ne a ithuta go itlhokomela le go tlhokomela diphologolo le lefatshe. (Gen. 2:15-17, 19, 20) Jehofa o ne a bopa Adame le Efa ba na le ditemosi tsa go  latswa, go tshwara, go bona, go utlwa le go dupa. Ka jalo, ba ne ba ka kgona go itumelela legae la bone le lentle la Paradaise le dilo tse dintsi tse di farologaneng tse di neng di le mo go lone. Ba ne ba ka kgona go dira dilo di le dintsi le go ithuta go le gontsi.

⁷ Gape Modimo o ne a ikaeletse eng? Jehofa o ne a bopa Adame le Efa ba na le bokgoni jwa go tshola bana ba ba itekanetseng. Modimo o ne a batla gore bana bao le bone ba tshole bana go fitlha lefatshe le tlala ka batho ba ba itekanetseng. O ne a batla gore Adame le Efa le batho botlhe ba e neng e tla nna batsadi ba rate bana ba bone, fela jaaka Jehofa a ne a rata bana ba gagwe ba ntlha ba ba neng ba itekanetse. Lefatshe le dilo tsotlhe tse di mo go lone e ne e tlile go nna legae la bone go ya go ile.—Pes. 115:16.

8. Ke eng fa Jehofa a ile a naya Adame le Efa molao o o mo go Genesise 2:16, 17?

⁸ Dilo ga di a ka tsa tsamaya jaaka Modimo a ne a lebeletse. Ka ntlha yang? Jehofa o ne a naya Adame le Efa molao o o motlhofo. Molao oo o ne o tla senola gore a ba ne ba itse gore kgololesego ya bone e ne e lekanyeditswe. O ne a re: “O ka nna wa ja mo setlhareng sengwe le sengwe sa tshingwana gore o bo o kgotsofale. Mme fa e le setlhare sa kitso ya molemo le bosula sone o se ka wa ja mo go sone, gonne ka letsatsi le o jang mo go sone ruri o tla swa.” (Gen. 2:16, 17) Adame le Efa ba ne ba tlhaloganya molao oo sentle, e bile go ne go le motlhofo tota gore ba o ikobele. Kana e bile, dijo e ne e le ntletsentletse kwa tshimong ya Edene.

9, 10. (a) Satane o ile a latofatsa Jehofa ka eng? (b) Adame le Efa ba ne ba dira eng? (Bona setshwantsho se se simololang setlhogo.)

⁹ Satane Diabolo o ne a dirisa noga go tsietsa Efa gore a se ka a ikobela Rraagwe e bong Jehofa. (Bala Genesise 3:1-5; Tshen. 12:9) Satane o ne a tlhomolola ntlha ya gore batho ba ne ba sa letlelelwa go “ja mo setlhareng sengwe le sengwe sa tshingwana.” Go ne go ntse jaaka e kete o ne a raya Efa a re: ‘O raya gore ga lo kgone go dira se lo se batlang?’ Morago ga moo o ne a aketsa Efa jaana: “Ruri ga lo kitla lo swa.” Go tswa foo, o ne a leka go dira gore Efa a se ka a reetsa Modimo ka go mo raya a re: “Modimo o a itse gore mo go lone letsatsi le lo jang mo go sone ka lone ruri matlho a lona a tla bulega.” Satane o ne a dira gore go nne e kete Jehofa o ne a sa batle gore Adame le Efa ba je leungo leo ka gonne ba ne ba tla nna botlhale. Mo godimo ga moo, Satane o ne a baya Efa bobi mo matlhong ka go mo raya a re: “Lo tla tshwana le Modimo, lo itse molemo le bosula.”

¹⁰ Adame le Efa ba ne ba tla dira eng? A ba ne ba tla ikobela Jehofa kgotsa a ba ne ba tla reetsa noga? Ka maswabi, ga ba a ka ba ikobela Modimo. Ka go dira jalo, ba ile ba tlhanogela Modimo jaaka Satane. Ba ne ba gana gore Jehofa e nne Rraabone mme Jehofa ga a ka tlhola a ba sireletsa.—Gen. 3:6-13.

11. Ke eng fa Jehofa a sa letlelele botsuolodi?

¹¹ Fa Adame le Efa ba ne ba tsuologela Modimo, ba ne ba latlhegelwa ke mpho e Jehofa a neng a ba neile yone ya go itekanela. Mo godimo ga moo, botsuolodi joo bo ile jwa dira gore ba kgaogane le Modimo ka gonne ‘o itshekile thata mo matlhong gore a ka bona se se bosula.’ Ka jalo, ‘ga a kgone go leba matshwenyego [kgotsa boikepo].’ (Hab. 1:13) Fa Modimo a ka bo a letlile botsuolodi joo, boikaelelo jwa gagwe ka dibopiwa tsotlhe tsa gagwe tsa kwa legodimong le tsa mo lefatsheng, bo ne bo se kitla bo diragadiwa. Mo godimo ga moo, fa Modimo a ka bo a sa tsaya kgato fa Adame le Efa ba sena go leofa, seo se ne se tla dira gore go lebege e kete ga a ikanyege. Le fa go ntse  jalo, le ka motlha Jehofa ga a ke a fetola melao ya gagwe. (Pes. 119:142) Ka jalo, le fa Adame le Efa ba ne ba na le kgololesego ya go itlhophela, seo se ne se sa reye gore ba tshwanetse go itlhokomolosa molao wa Modimo. E re ka ba ile ba tsuologela Modimo, ba ile ba swa mme ba boela mo loroleng le ba neng ba dirilwe ka lone.—Gen. 3:19.

12. Go ile ga direga eng ka bana ba ga Adame?

¹² Fa Adame le Efa ba sena go ja leungo, ga ba a ka ba tlhola ba amogelwa mo lelapeng la Modimo. Modimo o ne a ba leleka kwa Edene mme ba ne ba sa letlelelwa go boela koo gape. (Gen. 3:23, 24) Ka go dira jalo, Jehofa o ne a dira gore Adame le Efa ba lebane le ditlamorago tsa tshwetso ya bone. (Bala Duteronome 32:4, 5.) E re ka batho ba ne ba sa tlhole ba itekanetse, ba ne ba sa kgone go bontsha dinonofo tsa ga Jehofa ka botlalo. Adame o ne a latlhegelwa ke isagwe e e itumedisang, gape o ne a fetisetsa boleo le loso mo baneng ba gagwe. (Bar. 5:12) O ne a dira gore bana ba gagwe ba se ka ba kgona go tshelela ruri. Mo godimo ga moo, Adame le Efa ba ne ba nna le bana le ditlogolo tse di sa itekanelang. Satane ga a ka a emisa ka Adame le Efa, le gompieno o sa ntse a tsietsa batho gore ba se ka ba ikobela Modimo.—Joh. 8:44.

13. Jehofa o batlela batho eng?

¹³ Le fa go ntse jalo, Modimo o sa ntse a rata batho. Le fa gone Adame le Efa ba ile ba tsuologa, Jehofa o batla gore batho ba itumelele go nna le kamano e e molemo le ene. Ga a batle gore ope a swe. (2 Pet. 3:9) Ka jalo, morago ga botsuolodi joo, Modimo o ne a dira dithulaganyo tsa gore batho ba boe ba atamalane le ene, mme go ntse go le jalo, a sa fetole melao ya gagwe e e siameng. Jehofa o ne a dira seno jang?

14. (a) Go ya ka Johane 3:16, Modimo o ile a dira eng go boloka batho? (b) Re ka sekaseka potso efe le batho ba ba bontshitseng kgatlhego?

¹⁴ Bala Johane 3:16. Batho ba le bantsi ba re tla ba laletsang go tla Segopotsong ba itse temana eno. Mme gone, setlhabelo sa ga Jesu se ka dira jang gore re kgone go tshelela ruri? Fa re laletsa batho, fa re le kwa Segopotsong le fa re boela kwa bathong ba ba neng ba le gone kwa go sone, re tla nna le tshono ya go thusa batho ba ba batlang go itse boammaaruri gore ba itse karabo ya potso eno ya botlhokwa. Batho bano ba tla itumela fa ba simolola go tlhaloganya gore setlhabelo sa thekololo se bontsha gore Jehofa o a re rata le gore o botlhale. Re ka ba thusa go tlhaloganya dintlha dife tsa botlhokwa ka thekololo?

15. Jesu o ne a farologane jang le Adame?

¹⁵ Jehofa o ne a rulaganya gore go nne le monna yo o itekanetseng gore a rekolole batho. Motho yoo o ne a tshwanetse go ikanyega mo go Jehofa e bile a iketleeleditse go ntsha botshelo jwa gagwe gore a rekolole batho mo boleong le mo losong. (Bar. 5:17-19) Jehofa o ne a romela morwawe mo lefatsheng. (Joh. 1:14) Jesu o ne a itekanetse fela jaaka Adame le ene a ne a itekanetse. Mme go farologana le Adame, Jesu o ne a dira dilo sentle jaaka Jehofa a ne a lebeletse gore motho yo o itekanetseng a dire. Tota le fa Jesu a ne a lebane le diteko tse di botlhoko, ga a ka a leofa kgotsa a tlola melao ya Modimo.

16. Ke eng fa thekololo e le mpho e e molemo?

¹⁶ E re ka Jesu a ne a itekanetse, o ne a ka kgona go boloka batho mo boleong le mo losong ka go ba swela. O ne a nna se Adame a tshwanetseng a ka bo a ile a nna sone—o ne a itekanetse, a ikanyega mo Modimong e bile a mo ikobela ka botlalo. (1 Tim. 2:6) Jesu o ne a nna setlhabelo se se neng se tla dira gore batho “ba le bantsi” ba bone botshelo jo bo sa khutleng. (Math. 20:28) Eleruri  thekololo ke yone e tla dirang gore boikaelelo jwa Modimo jwa kwa tshimologong bo diragadiwe. (2 Bakor. 1:19, 20) Thekololo e dira gore batho ba ba ikanyegang ba nne le tsholofelo ya go tshelela ruri.

17. Thekololo e dirile gore Jehofa a dire eng?

¹⁷ Fa Jehofa a ne a re naya thekololo, seo se ne sa dira gore a latlhegelwe fela thata. (1 Pet. 1:19) O re rata thata jaana mo a neng a ntsha Morwawe yo o tshotsweng a le esi gore a re swele. (1 Joh. 4:9, 10) Tota re ka re Jesu o tshotse maemo a ga Adame. (1 Bakor. 15:45) Jesu ga a re naya botshelo fela, mme gape o re thusa gore re boe re atamalane le Modimo. Setlhabelo sa ga Jesu se dira gore Jehofa a boe a re amogele ntle le go fetola melao ya gagwe. Ruri go nametsa pelo go akanya ka nako e mo go yone batho botlhe ba ba ikanyegang ba tla bong ba itekanetse! Botlhe ba ba mo lefatsheng le ba ba kwa legodimong ba tla nna le kutlwano. Ka jalo, rotlhe re tla nna bana ba Modimo.—Bar. 8:21.

18. Jehofa o tla nna leng “dilo tsotlhe mo go mongwe le mongwe”?

¹⁸ Botsuolodi jwa ga Satane ga bo a ka jwa dira gore Jehofa a se ka a tlhola a rata batho, e bile bo ka se dire gore batho ba ba sa itekanelang ba se ka ba ikanyega mo go Jehofa. Jehofa o tla dirisa thekololo go thusa bana ba gagwe botlhe go nna basiami. Akanya fela gore botshelo bo tla bo bo ntse jang fa mongwe le mongwe “yo o bonang Morwa mme a supa tumelo” a tla bong a tshelela ruri. (Joh. 6:40) E re ka Jehofa a re rata e bile a le botlhale, o tla dira gore batho ba boe ba itekanele go dumalana le boikaelelo jwa gagwe jwa kwa tshimologong. Rraarona Jehofa, o tla nna “dilo tsotlhe mo go mongwe le mongwe.”—1 Bakor. 15:28.

19. (a) Go lebogela mpho ya thekololo go tshwanetse ga re tlhotlheletsa go dira eng? (Bona lebokose le le reng ‘ Nnang lo Batle ba ba Tshwanetseng.’) (b) Re tla sekaseka eng ka thekololo mo setlhogong se se latelang?

¹⁹ Thekololo e tshwanetse go re tlhotlheletsa go dira sotlhe se re ka se kgonang go thusa batho ba bangwe gore ba solegelwe molemo ke mpho eno e e tlhwatlhwakgolo. Batho ba tshwanetse go itse gore Jehofa o dirisa thekololo go re thusa gore re nne le tsholofelo ya go tshelela ruri. Le fa go ntse jalo, thekololo e dirile se se fetang seo. Mo setlhogong se se latelang, re tla sekaseka kafa setlhabelo sa ga Jesu se thusang ka gone go rarabolola ditatofatso tsa ga Satane tsa kwa tshimong ya Edene.