Fa Jehofa a ne a laela batho gore ba “tlatse lefatshe [ba] bo [ba] nne beng ba lone,” o ne a raya gore go ise go ye kae, lefatshe e tla nna paradaise. (Gen. 1:28) Batho ba ba tla tshelelang ruri ba tla tshwanelwa ke go ikobela taelo eo. E re ka tshimo ya Edene e sa tlhole e le gone, lefatshe e tla bo e se paradaise kwa tshimologong. Morago ga Aramagedona, re tlile go nna le tiro e ntsi ya go phepafatsa dikarolo dingwe tsa lefatshe tse di senyegileng. E tla bo e le tiro e ntsi tota!

Seno se re gopotsa tiro e Baiseraele ba neng ba tshwanelwa ke go e dira fa ba ne ba tswa kwa Babelona. Go ne ga feta dingwaga di le 70 go se na ope yo o neng a nna mo nageng ya bone. Mme Isaia o ne a bolelela pele gore ka thuso ya ga Jehofa, ba ne ba tla kgona go dira gore naga eo e nne ntle gape. Boporofeti joo bo ne bo re: “O tla dira gore naga ya gagwe e tshwane le Edene e bile o tla dira gore sekaka sa gagwe se tshwane le tshingwana ya ga Jehofa.” (Isa. 51:3) Jehofa o ne a thusa Baiseraele go dira gore naga ya bone e nne ntle. Ka tsela e e tshwanang,  Jehofa o tla thusa ba ba tla ruang lefatshe gore ba le dire paradaise. Mme go na le dilo dingwe tse o ka di dirang gone jaanong go bontsha gore o batla go dira tiro eo.

Sengwe se o ka se dirang ke go tlhokomela ntlo ya gago gore e nne e le phepa le go rulaganya dilo sentle. O ka dira jalo le fa baagelani ba gago ba sa tlhokomele magae a bone. Gape o ka thusa ka go phepafatsa Holo ya Bogosi kgotsa Holo ya Dikopano e e gaufi le wena. Fa maemo a gago a go letla, o ka ikwadisetsa go thusa ka nako ya masetlapelo. Seno se tla bontsha gore o ikemiseditse go thusa bakaulengwe le bokgaitsadi ba gago fa ba tlhoka thuso. Gongwe o ka ithuta bokgoni bongwe jo o ka bo dirisang fa Jehofa a go letla gore o tshelele ruri mo lefatsheng.

Morago ga gore Jesu a tsose morwadia Jairo, o ne a re ngwana yoo a newe sengwe sa go ja. (Mar. 5:42, 43) E tshwanetse ya bo e ne e se tiro e e thata go tlhokomela mosetsana yoo wa dingwaga di le 12. Mme akanya ka tiro e e tla bong e dirwa fa Jesu a diragatsa tsholofetso ya gagwe ya gore ‘botlhe ba ba mo mabitleng ba tla utlwa lentswe la gagwe mme ba tla tsoga.’ (Joh. 5:28, 29) Le fa Baebele e sa re bolelele go le gontsi ka se se tla diragalang, batho ba ba tla tsosiwang ba tla tlhoka thuso ya go bona dijo, lefelo le ba tla nnang mo go lone le diaparo. Go na le dilo di le mmalwa tse o ka di dirang gone jaanong go bontsha gore o ipaakanyeditse go thusa.

Fa go dirwa kitsiso ya gore molebedi wa potologo o tla mo phuthegong ya lona, goreng o sa mo laletse gore a tle go ja le wena? Fa bakaulengwe ba ba mo phuthegong ya lona ba ba neng ba le mo tirelong ya nako e e tletseng kwa Bethele ba newa kabelo e ntšha kgotsa fa molebedi wa potologo a tlogela tiro ya go potologa, goreng o sa ba thuse go batla lefelo le ba ka nnang mo go lone? Fa kopano ya tikologo kgotsa e e kgethegileng e tlile go tshwarwa mo lefelong la lona, goreng o sa ithaopele go bereka pele le morago ga kopano kgotsa go amogela bakaulengwe le bokgaitsadi ba ba tlileng kopanong?

Go ya ka se re se balang mo go Ditiro 24:15, re solofetse gore batho ba le bantsi ba tlile go tsosiwa. Bontsi jwa bone e tla bo e le ba ba sa nnang le tshono ya go itse Jehofa pele ba swa. Mme ba tla newa tshono eo fa ba sena go tsosiwa. a Batlhanka ba Modimo ba ba ikanyegang ba ba nang le maitemogelo, ba tla thusa ka go ba ruta. (Isa. 11:9) Kgaitsadi mongwe yo o bidiwang Charlotte, yo o kileng a rera kwa Yuropa, Amerika Borwa le Afrika, o lebile pele go dira tiro eo. O ne a bua jaana a itumetse: “Ke lebile pele go ruta batho ba ba tla bong ba tsositswe. Fa ke bala ka mongwe yo o neng a tshela bogologolo, ke a tle ke akanye jaana: ‘Fa motho yono a ka bo a ne a ithutile ka Jehofa, botshelo jwa gagwe bo ka bo bo fetogile.’ Ke swegaswega pelo go bolelela batho ba ba tla tsosiwang ka Jehofa, le gore matshelo a bone a tla nna botoka fa ba mo direla.”

Tota le batlhanka ba ga Jehofa ba ba ikanyegang ba ba neng ba tshela pele Jesu a tla mo lefatsheng, ba tla tlhoka go ithuta dilo di le dintsi. Akanya gore e tla bo e le tshiamelo e bile go itumedisa jang go tlhalosetsa Daniele gore boporofeti jo a ileng a bo kwala mme a ne a sa bo tlhaloganye, bo ile jwa diragadiwa jang. (Dan. 12:8) Ruri go tla bo go itumedisa go thusa Ruthe le Naomi go ithuta gore Mesia o ile a tlhaga mo ditlogolwaneng tsa bone! Re tla itumelela go ruta batho mo lefatsheng lotlhe, re sa gatelelwe kgotsa go itewa tsebe ke lefatshe leno le le bosula.

Ke eng se o ka se dirang gone jaanong go bontsha gore o ipaakanyeditse go ruta batho ba ba tla tsosiwang? O ka tokafatsa tsela e o rutang ka yone le go nna o rera ka metlha. (Math. 24:14) Le fa gone jaanong o sa kgone go rera jaaka o batla ka ntlha ya botsofe kgotsa mabaka a mangwe, o sa ntse o ka bontsha gore o batla go rerela batho ba ba tla tsosiwang ka go dira sotlhe se o ka se kgonang mo tirong ya go rera gone jaanong.

Go molemo go akanya ka dipotso tseno tsa botlhokwa, A o lebile pele go rua lefatshe? A o swegaswega pelo go dira lefatshe paradaise, go amogela le go ruta batho ba ba tla tsosiwang? O ka bontsha gore o ipaakanyeditse go tshelela ruri mo lefatsheng ka go dira dilo dingwe tse di tshwanang le tse o tla di dirang kwa lefatsheng le lesha!