Ja dijo tse di foreshe. Ela tlhoko gore o ja dijo tsa “mmatota”—dijo tse di sa tswakanngwang le sepe, tse di foreshe tse batho ba sa bolong go di ja ka dingwagangwaga—go na le go ja dijo tsa segompieno tse di diretsweng ruri. Gantsi dijo tse di setseng di apeilwe le tse di apewang ka bonako kwa diresetšhurenteng di na le selekanyo se se kwa godimo sa sukiri, letswai le mafura, tse gantsi di amanngwang le malwetse a a jaaka bolwetse jwa pelo, seterouku, kankere le malwetse a mangwe a a masisi. Fa o apaya, leka go fufutsa dijo, go di baka kgotsa go di besa go na le go di gadika. Leka go dirisa ditlhatshana tse di natetshang dijo le ditswaiso gore o fokotse go dirisa letswai. Tlhomamisa gore nama e budule sentle mme le ka motlha o se ka wa ja dijo tse di senyegileng.

O se ka wa ja thata. Mokgatlho wa Lefatshe Lotlhe wa Boitekanelo o bega gore go na le koketsego e kgolo ya batho ba bakima le ba ba nonneng ka tsela e e feteletseng, e leng se gantsi se bakiwang ke go ja thata. Patlisiso nngwe e ile ya fitlhela gore mo dikarolong dingwe tsa Afrika, “go na le bana ba le bantsi ba bakima thata go na le ba ba sa jeng dijo tse di nang le dikotla.” Bana ba ba nonneng ka tsela e e feteletseng ba mo kotsing ya go nna le mathata a botsogo, go akaretsa le bolwetse jwa sukiri, gone jaanong le mo isagweng. Batsadi, tlhomelang bana ba lona sekao se se molemo ka go lekanyetsa selekanyo sa dijo tse lo di jang.

Ja segolobogolo dijalo. Dijo tse di siameng ke tse di nang le maungo, merogo le dijo tsa ditlhaka go na le nama le setatšhe. Mo boemong jwa nama, leka go ja tlhapi gangwe kgotsa gabedi mo bekeng. Fokotsa go ja dijo tse di ntshitsweng bontsi jwa dikotla tsa tsone tse di jaaka pasta, borotho jo bosweu le raese e e tshweu. Tila go ja dijo tse di kotsi tse batho ba ratang go di ja. Batsadi, sireletsang botsogo jwa bana ba lona ka go ba thusa gore ba rate go ja dijo tse di nang le dikotla. Ka sekai, ba neye manoko le maungo le merogo e e tlhatswitsweng sentle go na le gore ba je ditšhipisi kgotsa dimonamone.

Nwa diedi thata. Letsatsi le letsatsi, bana le bagolo ba tshwanetse go nwa metsi a mantsi le diedi tse di se nang sukiri. Di nwe thata fa go le mogote kgotsa fa o dira tiro e e boima le fa o ikatisa mmele. Diedi tseno di thusa gore dijo di silege, di ntsha botlhole mo mmeleng wa gago, di dira gore letlalo la gago le nne lentle e bile di dira gore o fokotse bokete jwa mmele. Di go thusa gore o ikutlwe le go lebega o le montle. Tila go nwa bojalwa ka tsela e e feteletseng le go nwa dino tse dintsi tse di nang le sukiri. Go nwa senotsididi se se nang le asiti se le sengwe ka letsatsi go ka oketsa bokete jwa gago jwa mmele ka dikilogerama di le 6,8 ka ngwaga.

Kwa dinageng dingwe, go bona metsi a a phepa e ka nna tiro e e boima e bile go ja madi a mantsi. Le fa go ntse jalo, go botlhokwa go nwa metsi. Metsi a a kgotletsweng a tshwanetse go bedisiwa kgotsa go phepafadiwa ka dikhemikale. Go bolelwa gore metsi a a leswe a bolaya batho ba le bantsi go feta ba ba bolailweng ke dintwa le dithoromo tsa lefatshe; go begiwa gore a bolaya bana ba le 4 000 letsatsi le letsatsi. Mokgatlho wa Lefatshe Lotlhe wa Boitekanelo o kgothaletsa gore mo dikgweding di le thataro tsa ntlha, masea a tshwanetse go anyisiwa letsele fela mme morago ga foo a anyisiwe a bo a jesiwe dijo tse dingwe go fitlha bobotlana a le dingwaga di le pedi.