Botsala bo thaiwa mo loratong. Fa o ntse o ithuta mo gontsi ka Jehofa, o tla mo rata thata. Fa lorato lwa gago mo Modimong lo gola, keletso ya gago ya go batla go mo direla le yone e tla gola. Seno se tla go tlhotlheletsa gore o nne morutwa wa ga Jesu Keresete. (Mathaio 28:19) Ka go kopanela mmogo le lelapa le le itumetseng la Basupi ba ga Jehofa, o ka nna tsala ya Modimo ka bosakhutleng. O tshwanetse go dira eng?

O tshwanetse go bontsha gore o rata Modimo ka go ikobela melao ya gagwe. “Seno ke se lorato lwa Modimo lo se kayang, gore re boloke ditaelo tsa gagwe; mme ditaelo tsa gagwe ga di imele.”—1 Johane 5:3.

Dirisa se o se ithutang. Jesu o kile a bolela polelo e e tshwantshang seno. Monna yo o botlhale o ne a aga ntlo ya gagwe mo lefikeng. Monna wa seeleele ene o ne a aga ntlo ya gagwe mo motlhabeng. Fa go ne go tla pula e kgolo, ntlo e e agilweng mo lefikeng ga e a ka ya wela, mme ntlo e e agilweng mo motlhabeng e ne ya wa ka go wa go gogolo. Jesu o ne a re ba ba utlwang dithuto tsa gagwe mme ba di dira ba tshwana le monna yo o botlhale yo o agileng mo lefikeng. Mme ba ba reetsang dithuto tsa gagwe ba bo ba sa di dire ba tshwana le monna wa seeleele yo o neng a aga mo motlhabeng. O batla go tshwana le monna ofe?—Mathaio 7:24-27.

 Boineelo. Seno se raya gore o atamela Jehofa ka thapelo mme o mmolelela gore o batla go dira thato ya gagwe ka bosakhutleng. Go dira thato ya Modimo go bontsha gore o morutwa wa ga Jesu Keresete.—Mathaio 11:29.

Kolobetso. “Kolobediwa mme o tlhatswe maleo a gago ka go bitsa leina la gagwe.”—Ditiro 22:16.

Tshwarega ka botlalo mo go direleng Modimo. “Le fa e le eng se lo se dirang, se direng ka moya otlhe jaaka lo se direla Jehofa mme e seng batho.”—Bakolosa 3:23.