Jesu o tlhotse a bereka thata. Fa a sena go boa kwa kgaolong ya Dekapolise, o ne a fodisa mosadi yo o neng a na le bolwetse jwa go elela madi a bo a tsosa morwadia Jairo yo o neng a sule. Mme tiro ya gagwe ga e ise e fele. Fa a tswa mo legaeng la ga Jairo, banna ba babedi ba ba foufetseng ba mo sala morago ba goa ba re: “Re utlwele botlhoko, Morwa Dafide.”—Mathaio 9:27.

Fa banna bano ba bitsa Jesu ba re “Morwa Dafide,” ba bontsha gore ba dumela gore Jesu ke moruaboswa wa setulo sa bogosi sa ga Dafide e bile ke Mesia. Go bonala Jesu a ba itlhokomolosa, gongwe a batla go bona gore a ba tla tswelela ba mo kopa, mme ke sone se ba se dirang. Fa Jesu a tsena mo ntlong, ba mo sala morago, ba tsena kwa go ene. Jesu o ba botsa jaana: “A lo a dumela gore nka dira seno?” Ba araba ba tlhatswegile pelo ba re: “Ee, Morena.” Foo Jesu o kgoma matlho a bone a bo a re: “E re ka lo na le tumelo, matlho a lona a tla bulega.”—Mathaio 9:28, 29.

Ka yone nako eo, ba kgona go bona. Jesu o ba laela gore ba se ka ba bolelela batho se a se dirileng, fela jaaka a ile a laela ba bangwe mo makgetlong a a fetileng. Mme e re ka ba phophoma ka boitumelo, moragonyana ba bolelela batho se se diragetseng.

Fa banna bano ba babedi ba tsamaya, batho ba tlisa monna yo mongwe yo o sa bueng ka gonne a na le ledimona. Jesu o leleka ledimona leo, mme ka bonako fela monna yono o simolola go bua. Batho ba gakgamalela seo, ba re: “Ga go ise go ke go direge dilo tse di tshwanang le tseno mo Iseraele.” Bafarasai le bone ba teng foo. Ba a bona gore Jesu o dirile dikgakgamatso tseno, le fa go ntse jalo ba sa ntse ba mo latofatsa ba re: “O leleka madimona ka maatla a a tswang kwa mmusing wa madimona.”—Mathaio 9:33, 34.

Moragonyana ga foo, Jesu o boela kwa motseng wa gaabo wa Nasaretha, mme o tsamaya le barutwa ba gagwe. Mo e ka nnang ngwaga pele ga foo, o ne a ruta mo sinagogeng koo. Kwa tshimologong, batho ba ne ba gakgamadiwa ke se a se buang, mme moragonyana ba ne ba tenegela dithuto tsa gagwe ba bo ba batla go mmolaya. Jaanong Jesu o leka gape go thusa batho bano ba e kileng ya bo e le baagelani ba gagwe.

Ka letsatsi la Sabata, o ya kwa sinagogeng gape go ya go ruta. Batho ba le bantsi ba gakgametse, e bile ba botsa jaana: “Monna yono o tsere kae botlhale jono le maatla a go dira dikgakgamatso tseno?” Ba re: “A yono ga se morwa mmetli? A mmaagwe ga se Marea, e bile a bomorwarraagwe ga se Jakobe le Josefa le Simone le Judase? A bokgaitsadie botlhe le bone ga ba na le rona fano? Jaanong, o tsere kae dilo tseno tsotlhe?”—Mathaio 13:54-56.

Batho ba akanya gore Jesu ke motho fela wa mo motseng wa bone. Ba re, ‘O goletse mo matlhong a rona, go ka tla jang gore e nne Mesia?’ Le fa gone go na le bosupi jo bontsi, go akaretsa botlhale jwa ga Jesu jo bogolo le dikgakgamatso tse a di dirang, ga ba mo amogele. E re ka ba tlwaetse Jesu, tota le ba losika lwa gagwe ba a mo tenegela, mme seno se dira gore a bue mafoko ano: “Moporofeti o tlotliwa gongwe le gongwe ntle le kwa nageng ya gagabo le mo ntlong ya gagwe.”—Mathaio 13:57.

Eleruri, Jesu o gakgamadiwa ke go bo ba se na tumelo. Ka jalo, ga a dire dikgakgamatso dipe koo ntle le go “fodisa fela batho ba le mmalwa ba ba lwalang, a ba baya diatla.”—Mareko 6:5, 6.