Jesu o setse a boleletse barutwa ba gagwe setshwantsho se se buang ka go rapela o sa kgaotse. (Luke 11:5-13) Gone jaanong a ka tswa a le kwa Samarea kgotsa kwa Galalea, mme o sa ntse a gatelela botlhokwa jwa go rapela o sa kgaotse. O dira jalo ka go bua setshwantsho se sengwe, a re:

“Mo motseng mongwe go ne go na le moatlhodi mongwe yo o neng a sa boife Modimo e bile a sa tlotle motho ope. Gape go ne go na le motlholagadi mongwe mo motseng oo yo o neng a tlhola a ya kwa go ene a re, ‘Go na le mongwe yo ke nang le kgang le ene, tlhomamisa gore o atlhola kgang ya rona ka tshiamiso.’ Go ne ga feta nako e telele a gana go dira jalo, le fa go ntse jalo, morago o ne a ipolelela jaana, ‘Le fa gone ke sa boife Modimo e bile ke sa tlotle motho ope, ke tla tlhomamisa gore ke atlhola kgang ya motlholagadi yono ka tshiamiso, ka gonne o nna a ntshwenya. Ke tla dira jalo gore a se ka a tlhola a tla mo go nna mme a ntapisa ka go boaboa fano.’”—Luke 18:2-5.

Jesu o tlhalosa setshwantsho seo jaana: “A lo utlwile se moatlhodi yono a neng a se bua le fa gone a le bosula? Eleruri, a Modimo le ene ga a kitla a tlhomamisa gore ba a ba tlhophileng ba ba goelang kwa go ene bosigo le motshegare ba direlwa tshiamiso, fa a ntse a le pelotelele le bone?” (Luke 18:6, 7) Jesu o batla go tlhalosa eng ka Rraagwe?

Go a bonala gore Jesu ga a reye gore Jehofa Modimo o tshwana le moatlhodi yono yo o sa siamang. Tota o leka go dira pharologano eno: Fa e le gore moatlhodi yono yo o sa siamang o tla reetsa fa batho ba mo kopa ba sa kgaotse, ga go pelaelo gore Modimo le ene o tla dira jalo. O siame e bile o molemo, ka jalo o tla araba batho ba gagwe fa ba mo rapela ba sa kgaotse. Re kgona go bona seo mo go se Jesu a se buang fa a re: “Ke a lo bolelela, [Modimo] o tla tlhomamisa gore ba direlwa tshiamiso ka bonako.”—Luke 18:8.

Gantsi batho ba maemo a a kwa tlase le ba ba humanegileng ga ba direlwe tshiamiso, mme ba ba nang le taolo le ba ba humileng bone ba direlwa dilo sentle. Mme gone Modimo ga a batle gore dilo di dirwe ka tsela eo. Ka nako e e tshwanetseng, o tla tlhomamisa gore badirabosula ba a otlhaiwa, mme batlhanka ba gagwe ba amogela botshelo jo bo sa khutleng.

Ke bomang ba ba nang le tumelo e e tshwanang le ya motlholagadi yono? Ke ba le kae ba tota ba dumelang gore Modimo o tla “tlhomamisa gore ba direlwa tshiamiso ka bonako”? Jesu o sa tswa go dira setshwantsho se se bontshang botlhokwa jwa go rapela o sa kgaotse. Jaanong o gatelela botlhokwa jwa go dumela gore thapelo e maatla, a re: “Fa Morwa motho a goroga, a tota o tla fitlhela tumelo e e ntseng jalo mo lefatsheng?” (Luke 18:8) Ntlha ya gagwe ke gore a ka nna a fitlhela tumelo e e ntseng jalo e seyo fa a goroga.

Batho bangwe ba ba reeditseng Jesu, ba tlhatswegile pelo gore ba na le tumelo. Ba ipolela gore ba siame, le fa gone ba lebela batho ba bangwe kwa tlase. Ka jalo, Jesu o dira setshwantsho se se latelang a akantse ka bone:

“Banna ba babedi ba ne ba ya kwa tempeleng go ya go rapela, yo mongwe e ne e le Mofarasai mme yo mongwe e le mokgethisi. Mofarasai o ne a ema mme a rapela mo pelong a re, ‘Ao tlhe Modimo, ke a go leboga ka gonne ga ke tshwane le batho ba bangwe, ba ba tsayang ka dikgoka, ba ba sa siamang, ba ba dirang boaka, e bile ga ke tshwane le mokgethisi yono. Ke itima dijo gabedi ka beke; ke ntsha moneelo wa dilo tsotlhe tse ke nnang le tsone.’”—Luke 18:10-12.

 Bafarasai ba itsege ka go itshupa fa pele ga batho gore ba siame. Ba dira seo gore ba kgatlhe batho ba bangwe. Gantsi ba rata go itima dijo ka boMantaga le boLabone, e leng malatsi a ka one go tlhanaselang kwa marekisetsong, ka gonne ba a itse gore ba tla bonwa ke batho ba le bantsi. Gape ba tlhomamisa gore ba ntsha ditsabosome tsa ditlhatshana dingwe. (Luke 11:42) Dikgwedi di le mmalwa tse di fetileng, ba ile ba bontsha gore ba nyatsa batho ba maemo a a kwa tlase ka go bua jaana: “Batho bano ba bantsintsi ba ba sa itseng Molao wa ga Moshe [go ya ka tsela e Bafarasai ba lebang dilo ka yone] ba hutsegile.”—Johane 7:49.

Jesu o tswelela ka setshwantsho sa gagwe a re: “Le fa go ntse jalo, mokgethisi o ne a eme kgakajana e bile a sa batle go leba kwa legodimong, mme o ne a nna a itaya sehuba sa gagwe a re, ‘Ao tlhe Modimo, nkutlwele botlhoko, ka gonne ke moleofi.’” E re ka mokgethisi yono a le boikokobetso, o amogela gore o na le makoa. Jesu o konela jaana: “Ke a lo bolelela, mokgethisi yono o ne a ya kwa legaeng la gagwe mme o ne a kailwe a siame go gaisa Mofarasai yole. Gonne mongwe le mongwe yo o ikgodisang o tla kokobediwa, mme mongwe le mongwe yo o ikokobetsang o tla godisiwa.”—Luke 18:13, 14.

Ka jalo, Jesu o gatelela botlhokwa jwa go nna boikokobetso. Kgakololo eno e tla solegela barutwa ba gagwe molemo, ka gonne ba goletse mo lefelong le le nang le Bafarasai ba ba tseelang go nna le maemo kwa godimo. Gape e botlhokwa mo balateding botlhe ba ga Jesu.