Le fa gone baba ba ga Jesu ba sa bolo go nna ba sotla le go mmogisa, maiteko a ga Pilato a go batla go mo golola ga a fetole maikaelelo a bone. Ba batla gore Jesu a bolawe. Ba nna ba goa ba re: “A a kokotelwe mo koteng! A a kokotelwe mo koteng!” Pilato o ba raya a re: “Mo tseyeng mme lo mmolaye, ka gonne nna ga ke bone molato ope mo go ene.”—Johane 19:6.

Bajuda ga ba kgone go tlhatswa Pilato pelo gore Jesu o tshwanetse go swa ka gonne a tlhanogela puso, mme gone go tweng ka molato o o amanang le bodumedi? Ba itshwarelela ka kgang ya gore Jesu o a tlhapatsa e e neng ya tsoga fa a ne a sekisiwa fa pele ga Sanehederine. Ba re: “Re na le molao, mme go ya ka molao oo monna yono o tshwanetse go swa, ka gonne o itirile morwa Modimo.” (Johane 19:7) Eno ke tatofatso e ntšha e ba e bolelelang Pilato.

O boela gape mo ntlong ya gagwe ya segosi a bo a batla tsela ya go golola monna yono o ntseng a bogisiwa setlhogo. Gape Pilato o akantse ka toro e mosadi wa gagwe a neng a e lora ka monna yono. (Mathaio 27:19) O tla dira eng ka tatofatso eno e Bajuda ba e buang ya gore legolegwa leno ke “morwa Modimo”? Pilato o a itse gore Jesu o tswa Galalea. (Luke 23:5-7) Le fa go ntse jalo o botsa Jesu jaana: “O tswa kae?” (Johane 19:9) A Pilato a ka tswa a ipotsa gore a Jesu o kile a tshela kwa legodimong pele le gore a gongwe e ne e le modimo?

Pilato o setse a utlwile Jesu a bua ka tlhamalalo gore ke kgosi le gore Bogosi jwa gagwe ga se karolo ya lefatshe leno. E re ka Jesu a sa batle go tlhalosa ka mo go oketsegileng ka kgang eno e a setseng a e buile, o didimala fela. Seno se kgopisa Pilato, mme o mmotsa ka bogale a re: “A o gana go bua le nna? A ga o itse gore ke na le taolo ya go go golola e bile ke na le taolo ya go go bolaya?”—Johane 19:10.

Jesu o mo raya a re: “O ka bo o se na taolo epe mo go nna gotlhelele fa o ne o sa e newa go tswa kwa godimo. Ke gone ka moo monna yo o ntsentseng mo seatleng sa gago a nang le boleo jo bogolo thata.” (Johane 19:11) Jesu a ka tswa a sa akanya ka motho a le mongwe. Go na le moo o kaya gore Kaiafase, ba ba mo emang nôkeng mmogo le Judase Iskariota, ba na le molato o mogolo go gaisa o Pilato a nang le one.

E re ka Pilato a kgatlhiwa ke tsela e Jesu a itshwereng ka yone le se a se buang, e bile a tshosiwa thata ke kgang ya gore Jesu e ka tswa e le modimo, o leka gape go mo golola. Le fa go ntse jalo, Bajuda ba bua kgang e nngwe gape e Pilato a ka tswang a e boifa. Ba mo tshosetsa ba re: “Fa o golola monna yono, ga o tsala ya ga Kaesara. Mongwe le mongwe yo o itirang kgosi o ganetsa Kaesara.”—Johane 19:12.

Mmusi yono o ntshetsa Jesu kwa ntle gape, o nna mo setulong sa katlholo a bo a raya batho a re: “Bonang! Kgosi ya lona!” Le fa go ntse jalo, Bajuda ga ba ineele. Ba goa ba re: “Mo ntshe fa! Mo ntshe fa! Mo kokotele mo koteng!” Pilato o ba botsa jaana: “A ke bolaye kgosi ya lona?” Ke kgale Bajuda ba sa rate go busiwa ke Roma; le fa go ntse jalo, baperesiti ba bagolo ba bua ba le pelokgale ba re: “Ga re na kgosi epe ntle le Kaesara.”—Johane 19:14, 15.

E re ka Pilato a boifa Bajuda bano, o a ineela a bo a ba naya Jesu gore ba ye go mmolaya. Masole a apola Jesu kobo e khibidu ba bo ba mo apesa diaparo tsa gagwe. Fa a ntse a tsamaya le bone jalo, o sikere kota e a yang go kokotelwa mo go yone.

Jaanong e setse e le mo mosong wa Labotlhano, Nisane 14. Jesu o ne a ise a ke a robale fa e sa le ka Labone mo mosong mme o ntse a diragalelwa ke dilo tse di botlhoko ka go latelana. Fa a ntse a imelwa ke kota e a e sikereng, o felelwa ke maatla. Ka jalo, masole a pateletsa mofeti ka tsela mongwe yo o bidiwanag Simone yo o tswang kwa Kurene kwa Afrika, gore a sikare kota eo a e ise kwa lefelong le ba yang go bolaela Jesu kwa go lone. Batho ba le bantsi ba ba setse morago, bangwe ba bone ba ititaya ba hutsafetse e bile ba lela mo go botlhoko ka ntlha ya se se diregang.

Jesu o raya basadi ba ba hutsafetseng a re: “Bomorwadia Jerusalema, tlogelang go ntelela. Go na le moo, lelelang lona le bana ba lona; ka gonne malatsi a etla a batho ba tla reng, ‘Go itumela basadi ba ba se nang bana, basadi ba ba iseng ba ko ba tshole le basadi ba ba iseng ba ko ba anyise!’ Go tswa foo ba tla raya dithaba ba re, ‘Welang mo godimo ga rona!’ le dithota ba re, ‘Re khurumetseng!’ Fa ba dira dilo tseno fa setlhare se le metsi, go tla diragala eng fa se swabile?”—Luke 23:28-31.

Jesu o bua ka setšhaba sa Bajuda. Setšhaba seno se tshwana le setlhare se se swabang mme gone se sa ntse se le metsi ka gonne Jesu le Bajuda ba le mmalwa ba ba dumelang mo go ene, ba sa ntse ba le gone. Fa Jesu a swa mme barutwa ba gagwe ba tlogela tumelo ya Sejuda, setšhaba sa Iseraele se tla tshwana le setlhare se se swabileng. Batho ba setšhaba seno ba tla lela mo go botlhoko fa Modimo a tla bo a dirisa masole a Roma go ba atlhola!