A O GAKOLOGELWA gore ke ka ntlha yang fa mongwe wa baengele ba Modimo a ne a nna Satane Diabolo?— O ne a batla gore a obamelwe mme seo ke sone se se neng sa dira gore a nne kgatlhanong le Modimo. A baengele ba bangwe ba ne ba latela Satane?— Ee. Baebele e ba bitsa ‘baengele ba ga Satane’ kgotsa madimona.—Tshenolo 12:9.

A baengele bano ba ba bosula, kana madimona, ba dumela mo Modimong?— Baebele ya re ‘madimona a dumela gore go na le Modimo.’ (Jakobe 2:19) Mme gone jaanong ba a boifa. Ba boifa ka gonne ba itse gore Modimo o tla ba otlhaela dilo tse di bosula tse ba di dirileng. Ba dirile eng se se bosula?—

Baebele ya re baengele bao ba ne ba tlogela legae la bone kwa legodimong mme ba tla go tshela mo lefatsheng e le batho. Ba ne ba dira seno ka gonne ba ne ba batla go kopanela dikobo le basadi ba bantle mo lefatsheng. (Genesise 6:1, 2; Jude 6) Ke eng se o se itseng ka go kopanela dikobo?—

 Go kopanela dikobo ke fa monna le mosadi ba robala mmogo ka tsela e e kgethegileng. Morago ga moo, lesea le ka nna la gola mo teng ga mmè wa lone. Mme baengele ga ba a tshwanela go kopanela dikobo. Modimo o batla gore e nne monna le mosadi ba ba nyalaneng fela ba ba kopanelang dikobo. Fa go ntse jalo, monna le mosadi ba ka kgona go tlhokomela lesea fa le tsholwa.

Fa baengele ba ne ba ikapesa mebele ya batho mme ba kopanela dikobo le basadi mo lefatsheng, masea a bone a ne a gola a nna mekaloba. Ba ne ba le setlhogo thata, e bile ba ne ba utlwisa batho botlhoko. Modimo o ne a tlisa morwalela o mogolo go senya mekaloba eo le batho botlhe ba ba bosula. Mme Modimo o ne a dira gore Noa a age araka, kgotsa mokoro o mogolo go boloka batho ba le mmalwa ba ba neng ba dira se se siameng. Morutisi yo Mogolo o ne a re go botlhokwa gore re gakologelwe se se diragetseng ka Morwalela.—Genesise 6:3, 4, 13, 14; Luke 17:26, 27.

A o itse gore go ne ga diragalang ka baengele ba ba bosula fa Morwalela o tla?— Ba ne ba apola mebele ya bone ya batho, mme ba boela legodimong. Mme ba ne ba ka se  tlhole ba nna baengele ba Modimo, ka jalo ba ne ba nna baengele ba ga Satane, kgotsa madimona. Mme go ne ga diragala eng ka bana ba bone ba mekaloba?— Ba ne ba swa ka nako ya Morwalela. Batho botlhe ba ba neng ba sa utlwe Modimo le bone ba ne ba swa.

Fa e sa le ka nako ya Morwalela, Modimo ga a ka a tlhola a letla madimona gore a kgone go nna batho. Mme le fa re sa kgone go bona madimona, a sa ntse a leka go dira gore batho ba dire dilo tse di bosula thata. A baka mathata a magolo go feta pele. A dira jalo ka gonne a kobilwe kwa legodimong a latlhelwa mo lefatsheng.

A o itse gore ke ka ntlha yang fa re sa kgone go bona madimona?— Ke ka gonne ga a bonale. Mme re ka dumela gore a a tshela. Baebele ya re Satane o ‘tsietsa batho mo lefatsheng lotlhe,’ mme madimona a gagwe a a mo thusa.—Tshenolo 12:9, 12.

A Diabolo le madimona a gagwe ba kgona go re tsietsa le rona?— Ee, ba ka kgona fa re sa itlhokomele. Mme ga re tlhoke go boifa. Morutisi yo Mogolo o ne a re: ‘Ga go na jaaka Diabolo a ka ntshwara.’ Fa re atamela Modimo, o tla re sireletsa mo go Diabolo le madimona a gagwe.—Johane 14:30.

Go botlhokwa go itse gore ke ditiro dife tse di bosula tse madimona a ka lekang go dira gore re di dire. Akanya ka tsone. Madimona a ne a dira ditiro dife tse di bosula fa a ne a tla mo lefatsheng?— Pele ga Morwalela, a ne a kopanela dikobo le basadi, a dira selo se baengele ba neng ba sa tshwanela gore ba se dire. Gompieno madimona a a itumela fa batho ba sa utlwe molao wa Modimo ka go kopanela dikobo. Tla ke go botse, Ke bomang fela ba ba tshwanetseng go kopanela dikobo?— Ee, ke batho ba ba nyalaneng fela.

Gompieno basimane le basetsana bangwe ba kopanela dikobo, mme ga ba a tshwanela go dira jalo. Baebele e bua ka ‘serwe sa monna sa tsalo.’ (Lefitiko 15:1-3) Le mosadi o na le serwe sa mosadi sa tsalo. Jehofa o dirile dirwe tseno tsa mmele gore di dire tiro e e kgethegileng e e  tshwanetseng go dirwa fela ke batho ba ba nyalaneng. Madimona a a itumela fa batho ba dira dilo tse Modimo a sa di batleng. Ka sekai, madimona a a itumela fa mosimane le mosetsana ba tshwaratshwarana dirwe tsa tsalo. Ga re batle go itumedisa madimona, ga ke re?—

Go na le sengwe se sele se madimona a se ratang se Jehofa a sa se rateng. A o itse gore ke eng?— Ke go dirisa dikgoka. (Pesalema 11:5) Batho ba ba dikgoka ba setlhogo e bile ba utlwisa ba bangwe botlhoko. Gakologelwa gore ke se mekaloba, bana ba madimona, ba neng ba se dira.

Gape madimona a rata go tshosa batho. Ka dinako tse dingwe a itira gore a tshwane le batho ba ba suleng. E bile a ka bua jaaka batho bao ba ba suleng. Madimona a tsietsa batho ba le bantsi go dumela gore batho ba ba suleng ba a tshela e bile ba kgona go bua le batho ba ba tshelang. Ee, madimona a dira gore batho ba dumele gore dipoko di teng.

Re tshwanetse go itlhokomela gore Satane  le madimona a gagwe ba se ka ba re tsietsa. Baebele e tlhagisa jaana: ‘Satane o leka go itira moengele yo o molemo, le batlhanka ba gagwe ba dira jalo.’ (2 Bakorintha 11:14, 15) Mme tota madimona a bosula. A re boneng gore a ka dira jang gore re tshwane le one.

Gantsi batho ba ithuta kae go dirisa dikgoka le go kopanela dikobo mo go sa tshwanelang, ka dibopiwa tsa moya le ka dipoko?— A ga se ka go lebelela thelebishene le dibaesekopo, go tshameka metshameko ya khomputara le metshameko ya bidio, le go bala dibuka tsa dikhomiki? A go dira dilo tseno go re atametsa kwa Modimong kgotsa go re atametsa kwa go Diabolo le madimona a gagwe? O akanyang?—

O akanya gore ke mang yo o batlang gore re reetse mme re lebelele dilo tse di maswe?— Ke Satane le madimona a gagwe. Jaanong, nna le wena re tshwanetse go dirang?— Re tshwanetse go bala, go reetsa, le go lebelela dilo tse di tla re solegelang molemo le tse di tla re thusang go direla Jehofa. A o ka akanya ka dilo dingwe tse di molemo tse re ka di dirang?—

Fa re dira dilo tse di molemo, ga go tlhokege gore re tshabe madimona. Jesu o nonofile go a feta, mme a a mo tshaba. Tsatsi lengwe madimona a ne a goela kwa go Jesu a re: “A o tletse go re senya?” (Mareko 1:24) A ga re na go itumela fa nako ya gore Jesu a senye Satane le madimona a gagwe e fitlha?— Gone jaanong, re ka dumela gore Jesu o tla re sireletsa mo madimoneng fa re atamalana le ene le Rraagwe wa selegodimo.