BATSADI botlhe ba nna le seabe mo go sengwe se batho ba sa kgoneng go se tlhaloganya ka botlalo. Mongwe le mongwe wa bone o ntsha sengwe mo mmeleng wa gagwe. Seo se dira gore go gole sengwe mo teng ga mmè se se feleletsang e le motho yo o tshelang. Ka jalo, ga go gakgamatse go bo fa lesea le tsholwa, batho ba bua ka tiragalo eo ba re ke “kgakgamatso ya tsalo.”

Mme gone, go tshola ngwana ke tshimologo fela ya maikarabelo a batsadi. Kwa tshimologong masea a ikaega gotlhelele ka batsadi, mme fa a ntse a gola, ga a tlhoke go tlhokomelwa fela. A tlhoka go thusiwa go gola mo tlhaloganyong, mo maikutlong, mo boitsholong le mo semoyeng.

Bana ba tlhoka lorato lwa batsadi ba bone thata gore ba kgone go gola sentle. Le fa gone go le botlhokwa gore batsadi ba ba bolelele gore ba a ba rata, go botlhokwa gore ba supe seo ka ditiro. Ee, batsadi ba tshwanetse go tlhomela bana ba bone sekao se sentle. Bana ba tlhoka go kaelwa kafa ba tshwanetseng go itshola ka teng, ba newe melaometheo e ba tshwanetseng go tshela ka yone. Mme ba tshwanetse go kaelwa jalo fa ba sa ntse ba le bannye. Go ka nna le mathata a magolo fa bana ba sa thusiwe go sa ntse go na le nako.

Melaometheo e e molemo go gaisa yotlhe ke e e fitlhelwang mo Baebeleng. Thuto e e mo Baebeleng ga e ka ke ya bapisiwa le epe. Thuto e e ntseng jalo e thusa bana go lemoga gore dilo tse ba di bolelelwang ga di tswe mo bathong mme di tswa kwa Mmoping wa bone, Rraabone yo o kwa legodimong. Seno se dira gore kgakololo e ba e newang e nne e e molemo go di gaisa tsotlhe.

Baebele e kgothaletsa batsadi go tsaya matsapa a go dira gore bana ba lemoge botlhokwa jwa melaometheo e e siameng. Le fa go ntse jalo, fa bana ba ntse ba gola, gantsi batsadi ba fitlhela go le thata go bua le bone ka dilo tse di botlhokwa thata. Buka eno ya Ithute mo Morutising yo Mogolo e kwadilwe ka  maikaelelo a go thibela seo. E tla thusa batsadi le bana go nna le sengwe se se buang ka dilo tsa semoya se ba ka se balang mmogo. Mo godimo ga moo, e tshwanetse go dira gore bana ba kgone go buisana ka tsela e e molemo le batho ba ba ba balelang buka eno.

O tla lemoga gore buka eno e batla gore bana ba ntshe maikutlo a bone. E na le dipotso di le dintsi tse di tshwanelang. Fa o fitlha mo dipotsong tseno, o tla bona letshwao la thaladi (—). Letshwao leno le beetswe go go gakolola gore o eme mme o kgothaletse ngwana go ntsha maikutlo a gagwe. Bana ba a rata fa ba akarediwa mo motlotlong. Ngwana a ka iteega tsebe ka bonako fa a sa akarediwe mo motlotlong.

Se se botlhokwa le go feta ke gore dipotso tseno di tla go thusa go itse gore ngwana o akanya eng. Mme gone, ngwana a ka nna a se ka a nepa potso. Le fa go ntse jalo, tshedimosetso e e latelang morago ga potso nngwe le nngwe, e beilwe ka tsela e e tla thusang ngwana go bona karabo e e siameng.

Sengwe se se kgethegileng ka buka eno ke gore e na le ditshwantsho di feta 230. Bontsi jwa ditshwantsho tseno di na le dipotso tse di dirang gore ngwana a ntshe maikutlo a gagwe go ya ka se a se bonang le se a se badileng. Ka jalo, sekaseka ditshwantsho tseno le ene. Di ka thusa thata go gatelela dilo tse di botlhokwa tse ngwana a di rutiwang.

Fa ngwana a ithuta go bala, mo kgothaletse go go balela buka eno le gore le ene a e ipalele. Fa a nna a e bala jalo, kgakololo ya yone e tla gatelelwa mo mogopolong le mo pelong ya gagwe. Le fa go ntse jalo, batsadi ba tshwanetse go bala buka eno ka metlha le bana ba bone go nonotsha lorato lwa bone le tsela e ba ka bontshanang tlotlo ka yone.

Go farologana le dingwaga di le mmalwa tse di fetileng, gone jaanong bana ba dikologilwe ke boitsholo jo bo sa siamang jwa tlhakanelodikobo, tirisabadimo le dilo tse dingwe tse di tlhabisang ditlhong. Ka jalo, ba tlhoka go sirelediwa, e leng sone se buka eno e thusang go se dira ka tsela e e tlotlegang mme e tlhamaletse. Le fa go ntse jalo, selo sa botlhokwa ke gore bana ba rutiwe ka Motswedi wa botlhale jotlhe, e leng Rraarona yo o kwa legodimong, Jehofa Modimo. Ke sone se Jesu, Morutisi yo Mogolo a ileng a se dira ka metlha. Re solofela gore buka eno e tla thusa wena le lelapa la gago go tshela ka tsela e e itumedisang Jehofa, gore lo bone masego a a nnelang ruri.