Akanya ka boemo jono: Heather o na le dikgwedi di le pedi fela a intsha le Mike, mme o ikutlwa e kete ke kgale ba itsane. Ba kwalelana melaetsa ka metlha, ba buisana ka founo lobaka lo loleele e bile ba setse ba kgona go lemoga gore yo mongwe o ne a batla go reng! Mme jaanong, Mike o batla se se fetang seo.

o dikgweding tse pedi tse di fetileng, Mike le Heather ba ntse ba tshwarana ka matsogo le go atlana ka bokhutshwane fela. Heather ga a batle go dira se se fetang seo. Mme gape, ga a batle gore thatano ya bone e fele. Mike ke ene fela a dirang gore a ikutlwe a le montle thata e bile a kgethegile. O ipolelela jaana: ‘Gone mme, nna le Mike re a ratana . . . ’

Fa e le gore o setse o godile mo o ka intshang le mongwe mme o mo boemong jo bo tshwanang le jwa ga Heather, wena o ne o tla dira eng?

Fa o tlola molao mongwe wa tlholego, jaaka molao wa maatlakgogedi, o tla lebana le ditlamorago tse di botlhoko. Go tla direga se se tshwanang fa o ka tlola molao wa boitsholo, jaaka o o reng: “Ithibe mo kgokafalong.”—1 Bathesalonika 4:3.

Ditlamorago tsa go tlola molao oo ke dife? Baebele ya re: “Yo o dirang kgokafalo o leofela mmele wa gagwe.” (1 Bakorintha 6:18) Seo se boammaaruri go le kana kang?

 Babatlisisi ba fitlhetse gore basha ba le bantsi ba ba ileng ba dira seo ba lebana le nngwe kgotsa dingwe tsa ditlamorago tseno.

• GO NGOMOGA PELO. Bontsi jwa basha ba ba ileng ba robalana pele ga lenyalo, ba re ba ne ba ikwatlhaela seo.

• GO SE TLHOLE BA IKANYANA. Fa ba sena go robalana, mongwe le mongwe wa bone o ipotsa jaana, ‘O kile a robalana le mang gape?’

• GO SWABISIWA. Boammaaruri ke gore, basetsana ba le bantsi ba ka itumelela gore ba ratane le mongwe yo o tla ba sireletsang, e seng yo o ba dirisang fela. Mme basimane ba le bantsi ga ba kgatlhegele mosetsana yo o kileng a dumela go robalana le bone.

• Ntlha ya botlhokwa: Fa o dumela go robalana le mongwe pele ga lo nyalana, o a itlontlolola ka go itetla go latlhegelwa ke sengwe se se tlhwatlhwakgolo. (Baroma 1:24) Mmele wa gago o tlhwatlhwakgolo thata gore o ka abelana ka one motlhofo fela!

Bontsha gore o nonofile go ka ‘ithiba mo kgokafalong.’ (1 Bathesalonika 4:3) Ka jalo, letsatsi lengwe fa o tsena mo lenyalong, o ka kgona go robalana le molekane wa gago. Mme o tla kgona go itumelela seno ka botlalo, o se na matshwenyego, boikwatlhao le go ikutlwa o sa sireletsega, tse gantsi e leng karolo ya ditlamorago tsa go robalana pele ga lenyalo.—Diane 7:22, 23; 1 Bakorintha 7:3.

• A motho yo tota a go ratang a ka go utlwisa botlhoko mo mmeleng le mo maikutlong?

• A mongwe yo tota a amegang ka wena a ka go raela gore o senye kamano ya gago le Modimo?—Bahebera 13:4.