GANGWE le gape Jehofa o itshwantsha le modisa yo o ntseng jalo. O re tlhomamisetsa jaana mo Lefokong la gagwe: “Nna ka bonna, ke tla batla dinku tsa me ke bo ke di tlhokomela.”—Esekiele 34:11, 12.

Dinku tsa ga Jehofa ke bomang? Ka bokhutshwane fela, dinku tsa ga Jehofa ke batho ba ba mo ratang le ba ba mo obamelang. Baebele ya re: “A re obameng re ikobeng; a re khubameng fa pele ga ga Jehofa Modiri wa rona. Gonne ke Modimo wa rona, mme re batho ba mafulo a gagwe le dinku tsa seatla sa gagwe [kgotsa dinku tse a di tlhokomelang].” (Pesalema 95:6, 7) Fela jaaka dinku tsa mmatota di sala modisa morago, baobamedi ba ga Jehofa ba iketleeleditse go latela Modisa wa bone. A mme gone ga ba ke ba dira diphoso? Ga go a nna jalo. Ka dinako tse dingwe, batlhanka ba Modimo ba ile ba nna jaaka ‘dinku tse di anamiseditsweng kgakala [kgotsa tse di gasameng],’ ‘dinku tse di latlhegileng’ e bile ‘ba  tshwana le dinku tse di timelang.’ (Esekiele 34:12; Mathaio 15:24; 1 Petere 2:25) Le fa go ntse jalo, fa motho a katogela gosele, ka metlha Jehofa o na le tsholofelo ya gore o tla boa.

A o sa ntse o tsaya Jehofa e le Modisa wa gago? Jehofa o itshupa jang gore ke Modisa gompieno? Ela tlhoko ditsela tseno tse tharo:

O a re fepa. Jehofa a re: “Ke tla di fepa mo mafulong a a siameng. . . . Di tla lala koo mo lefelong le le siameng la bonno, mme di tla fula mo mafulong a a nonneng.” (Esekiele 34:14) Jehofa ga a ise a ko a palelwe ke go re naya dijo tsa tshwantshetso tse di farologaneng, tse di tlang ka nako e e tshwanetseng. A o gopola setlhogo, puo kgotsa bidio nngwe e e neng ya araba thapelo ya gago fa o ne o kopa thuso? A ga e a ka ya go tlhomamisetsa gore Jehofa o amega ka wena?

O a re sireletsa e bile o re ema nokeng. Jehofa o solofetsa jaana: “E e faletseng ke tla e busa, e bile ke tla hapa e e robegileng le e e bobolang ke tla e nonotsha.” (Esekiele 34:16) Jehofa o nonotsha ba ba koafaditsweng kgotsa ba ba fekeeditsweng ke ditlhobaelo. O hapa dinku tsa gagwe, a di thusa gore di fole fa di utlwisitswe botlhoko—gongwe e bile di utlwisitswe botlhoko ke badumedimmogo. Mme o busa ba ba faletseng le ba ba ka tswang ba lwantshana le maikutlo a a sa siamang.

O tsaya e le boikarabelo jwa gagwe go re tlhokomela. Jehofa a re: “Ke tla di golola mo mafelong otlhe a di gasamiseditsweng kwa go one. . . . Ke tla batla e e latlhegileng.” (Esekiele 34:12, 16) Jehofa ga a tlhoboge nku e e latlhegileng. Fa go na le nku e e timetseng, o a itse, o a e batla mme fa a e bona o a ipela. (Mathaio 18:12-14) Tota e bile, o bitsa baobamedi ba gagwe ba boammaaruri a re ke “dinku tsa me, dinku tsa mafulo a me [kgotsa dinku tse ke amegang ka tsone].” (Esekiele 34:31) Le wena o nngwe ya dinku tseo.

Ke eng fa Jehofa a go senka e bile a go laletsa gore o boele kwa go ene? Ka gonne o batla gore o itumele. O solofetsa dinku tsa gagwe gore “go tla nna le dipula tse di tshologang tsa tshegofatso.” (Esekiele 34:26) Seno ga se dijo tsa ditoro fela. Le wena o setse o bone bosupi jwa seno.

Gopola tsela e o neng wa ikutlwa ka yone fa o ne o simolola go itse Jehofa. Ka sekai, o ne wa ikutlwa jang fa ka lekgetlo la ntlha o ne o ithuta boammaaruri jo bo itumedisang ka leina la Modimo le boikaelelo jwa gagwe ka batho? A o gopola kafa go neng go lapolosa ka teng go nna seoposengwe le Bakeresetemmogo kwa dikopanong tse dinnye le tse dikgolo? Fa o ne o bolelela mongwe dikgang tse di molemo mme a bontsha gore o kgatlhega ka tsela ya mmatota, a ga o a ka wa boela gae o itumetse e bile o kgotsofetse?

O ka kgona go nna le boitumelo joo gape. Batlhanka ba Modimo ba bogologolo ba ne ba rapela jaana: “Re busetse kwa go wena, tlhe Jehofa, mme re tla boa kwantle ga go okaoka. Re tlisetse malatsi a masha jaaka mo bogologolong.” (Dikhutsafalo 5:21) Jehofa o ne a araba thapelo eo mme batho ba gagwe ba ne ba boa ba mo direla gape ka boipelo. (Nehemia 8:17) Le wena Jehofa o tla go direla jalo.

Le fa go ntse jalo, go boela kwa go Jehofa ga se kgetsi e potlana. Ela tlhoko dikgwetlho dingwe tse o ka lebanang le tsone fa o batla go boa le gore o ka di fenya jang.