Sekao se se Molemo—Moshulame

Lekgarebe la Moshulame le a itse gore ga le a tshwanela go itetla go laolwa ke maikutlo a lorato. O raya balekane ba gagwe a re: “Ke lo ikanisitse . . . gore lo se ka lwa leka go tsosa lorato mo go nna kgotsa go lo kurusa go fitlha lone lo tsoga.” Moshulame o a itse gore maikutlo a ka fekeetsa tsela ya motho ya go akanya. Ka sekai, o lemoga gore ba bangwe ba ka mo gatelela gore a ratane le mongwe yo o sa mo tshwaneleng. Tota le maikutlo a gagwe a ka mo fifatsa tlhaloganyo. Ka jalo, Moshulame o nna jaaka “lobota.”—Sefela sa Difela 8:4, 10.

A o tsaya kgang ya lorato masisi fela jaaka Moshulame? A o ka itetla go kaelwa ke mogopolo wa gago e seng ke maikutlo fela? (Diane 2:10, 11) Ka dinako dingwe batho ba bangwe ba ka leka go go gatelela gore o ratane o ise o go siamele. Le wena ka bowena o ka ipaya mo kgatelelong eo. Ka sekai, fa o bona mosimane le mosetsana ba tsamaya mmogo ba tshwarane ka diatla, a o gakalela gore le wena o nne le mongwe yo o ka ratanang le ene? A o ka dumela go ratana le mongwe yo e seng wa bodumedi jwa gago? Mosetsana wa Moshulame o ne a tsaya kgang ya lorato masisi. Le wena o ka dira jalo!