Lefitiko 9:1-24
-
Arone o ntsha ditlhabelo (1-24)
9 Mo letsatsing la borobedi,+ Moshe o ne a bitsa Arone le bomorwawe le bagolwane ba Iseraele.
2 O ne a raya Arone a re: “Itseele namane e e itekanetseng ya setlhabelo sa boleo+ le phelefu e e itekanetseng ya setlhabelo se se fisiwang, mme o di ise fa pele ga ga Jehofa.
3 Mme o reye Baiseraele o re, ‘Tsayang podi e tonanyana ya setlhabelo sa boleo le namane e e nang le ngwaga o le mongwe e e itekanetseng le phelefu e potlana e e nang le ngwaga o le mongwe e e itekanetseng, gore e nne setlhabelo se se fisiwang
4 le poo le phelefu gore e nne ditlhabelo tsa go abelana+ gore lo di ntshe setlhabelo fa pele ga ga Jehofa le setlhabelo sa dijo tsa ditlhaka+ se se tlhakantsweng le leokwane ka gonne gompieno Jehofa o tla bonala mo go lona.’”+
5 Ka jalo, ba ne ba ntsha se Moshe a neng a se laetse ba se tlisa fa pele ga tente ya bokopanelo. Morago ga moo, phuthego yotlhe e ne ya atamela mme ya ema fa pele ga ga Jehofa.
6 Mme Moshe o ne a re: “Seno ke se Jehofa a laetseng gore lo se dire, gore kgalalelo ya ga Jehofa e tle e bonale mo go lona.”+
7 Go tswa foo, Moshe o ne a raya Arone a re: “Atamela fa sebesong, o ise setlhabelo sa gago sa boleo+ le setlhabelo sa gago se se fisiwang, e le gore o kgone go itshwarelwa le ba lelapa la gago ba kgone go itshwarelwa.+ Go tswa foo o ise setlhabelo se se ntshediwang Baiseraele+ gore ba kgone go itshwarelwa,+ fela jaaka Jehofa a laetse.”
8 Ka yone nako eo, Arone o ne a atamela fa sebesong mme a tlhaba namane ya setlhabelo sa boleo e e neng e le ya gagwe.+
9 Go tswa foo, bomorwa Arone ba ne ba isa madi+ a yone kwa go ene mme a ina monwana mo mading a bo a a tshasa mo dinakeng tsa sebeso, mme madi otlhe a a setseng o ne a a tshela kwa tlase mo sebesong.+
10 O ne a fisa mafura le diphilo le mafura a sebete a a tswang mo setlhabelong sa boleo gore di kuise mosi mo sebesong, fela jaaka Jehofa a ne a laetse Moshe.+
11 Mme o ne a fisa nama le letlalo ka molelo ka kwa ntle ga kampa.+
12 Morago ga moo, o ne a tlhaba phologolo ya setlhabelo se se fisiwang mme bomorwa Arone ba mo naya madi a yone mme a a kgatšha mo matlhakoreng otlhe a sebeso.+
13 Ba ne ba mo naya dikarolwana tsa phologolo eo ya setlhabelo se se fisiwang mmogo le tlhogo ya yone, mme o ne a di fisa gore di kuise mosi mo sebesong.
14 Mo godimo ga moo, o ne a tlhatswa mala a yone le maoto a yone a bo a di fisa gore di kuise mosi mo godimo ga setlhabelo se se fisiwang mo sebesong.
15 Go tswa foo, o ne a isa setlhabelo se se direlwang batho mme a tsaya podi ya setlhabelo sa boleo e e neng e ntsheditswe batho, a e tlhaba a bo a dira setlhabelo sa boleo ka yone jaaka a dirile ka setlhabelo sa ntlha.
16 Gape o ne a isa setlhabelo se se fisiwang mme a se dira go ya ka fa se dirwang ka gone ka metlha.+
17 Morago ga moo, o ne a isa setlhabelo sa dijo tsa ditlhaka,+ a tabola nngwe ya sone a tlatsa seatla a bo a e fisa gore e kuise mosi mo sebesong, kwantle ga setlhabelo se se fisiwang sa mo mosong.+
18 Morago ga moo, o ne a tlhaba poo le phelefu ya setlhabelo sa go abelana e e neng e ntsheditswe batho. Foo bomorwa Arone ba ne ba mo naya madi a tsone mme a a kgatšha go dikologa matlhakore otlhe a sebeso.+
19 Mme dikarolwana tsa mafura tsa poo,+ mogatla o o mafura wa phelefu, mafura a a khurumeditseng dirwe tse di mo teng, diphilo le mafura a sebete,+
20 dikarolwana tseo tsotlhe tsa mafura ba ne ba di baya mo dihubeng tsa diphologolo, morago ga moo o ne a fisa dikarolwana tseo tsa mafura gore di kuise mosi mo sebesong.+
21 Mme Arone o ne a fokisetsa sehuba sa yone le leoto la yone la moja kwa morago le kwa pele e le setlhabelo se se fokwang fa pele ga ga Jehofa, fela jaaka Moshe a ne a laetse.+
22 Morago ga moo, Arone o ne a tsholeletsa diatla tsa gagwe kwa bathong a bo a ba segofatsa,+ mme fa a sena go ntsha setlhabelo sa boleo le setlhabelo se se fisiwang le ditlhabelo tsa go abelana o ne a fologa.
23 La bofelo Moshe le Arone ba ne ba tsena mo tenteng ya bokopanelo mme ba tswa ba bo ba segofatsa batho.+
Jaanong kgalalelo ya ga Jehofa e ne ya bonala mo bathong botlhe,+
24 mme molelo o ne wa tswa kwa go Jehofa+ o bo o simolola go laila setlhabelo se se fisiwang le dikarolwana tsa mafura mo sebesong. E rile batho botlhe ba bona seno, ba ne ba simolola go goa mme ba wela fa fatshe ka difatlhego.+
