Lefitiko 27:1-34
27 Jehofa o ne a tswelela a bua le Moshe a re:
2 “Bua le Baiseraele mme o ba reye o re, ‘Fa motho a dira maikano a a kgethegileng+ a gore o tla isetsa Jehofa madi a a lekanang le tlhwatlhwa e e beetsweng motho mongwe,
3 tlhwatlhwa ya monna yo o nang le dingwaga di le 20 go ya go di le 60, e tla nna dishekele* tsa selefera di le 50 go ya ka selekanyashekele* sa lefelo le le boitshepo.*
4 Mme fa e le mosadi, tlhwatlhwa ya gagwe e tla nna dishekele di le 30.
5 Fa motho yoo a le dingwaga di le tlhano go ya go di le 20, tlhwatlhwa ya monna e tla nna dishekele di le 20 mme ya mosadi e tla nna dishekele di le 10.
6 Fa a na le kgwedi e le nngwe go ya go dingwaga di le tlhano, tlhwatlhwa ya monna e tla nna dishekele tsa selefera di le tlhano mme ya mosadi e tla nna dishekele tsa selefera di le tharo.
7 “‘Fa motho yoo a le dingwaga di le 60 le go feta, tlhwatlhwa ya monna e tla nna dishekele di le 15 mme ya mosadi e tla nna dishekele di le 10.
8 Mme fa motho yo o dirang maikano a humanegile thata mo a ka se kang a kgona go duela tlhwatlhwa e e beilweng,+ motho yo o ntshiwang a tle fa pele ga moperesiti mme moperesiti o tla baya tlhwatlhwa e sele e a tla e ntshediwang. Moperesiti o tla baya tlhwatlhwa eo go ya ka se motho yo o dirang maikano a ka kgonang go se ntsha.+
9 “‘Fa maikano ao a akaretsa phologolo e e siametseng go ka ntshediwa Jehofa e le setlhabelo, sepe fela se se tla newang Jehofa e tla nna selo se se boitshepo.
10 A se ka a se emisetsa ka se sengwe kgotsa a ntsha se se siameng mo boemong jwa se se sa siamang kgotsa se se sa siamang mo boemong jwa se se siameng. Mme gone, fa a ntsha phologolo mo boemong jwa phologolo e nngwe, phologolo e e neng e ntshitswe pele le e e ntshitsweng mo boemong jwa yone, tsoopedi di tla nna boitshepo.
11 Fa e le gore ke phologolo e e itshekologileng+ e e ka se ntshediweng Jehofa e le setlhabelo, foo o tla emisa phologolo eo fa pele ga moperesiti.
12 Go tswa foo, moperesiti o tla e beela tlhwatlhwa, gore a e siame kgotsa ga e a siama. Tlhwatlhwa e e beilweng ke moperesiti ke yone e e tla ntshiwang.
13 Mme fa a ka batla go e reka gape, foo o tshwanetse go ntsha karolwana* ya yone mo godimo ga tlhwatlhwa e e beilweng.+
14 “‘Jaanong fa motho a ntsha* ntlo ya gagwe gore e nne selo se se boitshepo mo go Jehofa, foo moperesiti o tla e beela tlhwatlhwa, gore a e siame kgotsa ga e a siama. Ntlo eo e tla ntshediwa madi ao go ya ka tlhwatlhwa e moperesiti a e beileng.+
15 Mme fa motho yo o ntshang ntlo ya gagwe a batla go e reka gape, foo o tshwanetse go ntsha karolwana* ya madi a tlhwatlhwa e e beilweng mo godimo ga tlhwatlhwa ya yone; mme e tla nna ya gagwe.
16 “‘Fa motho a naya Jehofa karolo ya tshimo ya gagwe, e tla beelwa tlhwatlhwa e e lekanang le peo e e tlhokegang go jala karolo eo ya tshimo: peo ya barele* ya selekanyo sa dikilogerama di le 130* e tla nna dishekele tsa selefera di le 50.
17 Fa a ntsha tshimo ya gagwe go simolola ka ngwaga wa Jubile,+ tlhwatlhwa eo ga e fetoge.
18 Fa a ntsha tshimo ya gagwe morago ga Jubile, moperesiti o tla mmalela tlhwatlhwa go tsamaisana le dingwaga tse di setseng go fitlha ka ngwaga wa Jubile o o latelang, mme tlhwatlhwa eo e fokodiwe.+
19 Mme fa motho yo a neng a ntshitse tshimo a batla go e reka gape, foo o tshwanetse go ntsha karolwana* ya madi a tlhwatlhwa e e beilweng mo godimo ga tlhwatlhwa ya yone, mme e tla tswelela e le ya gagwe.
20 Jaanong fa a sa rekolole tshimo eo mme e bo e rekisediwa motho yo mongwe, e ka se ka ya rekololwa gape.
21 Fa tshimo eo e gololwa ka Jubile, e tla nna selo se se boitshepo mo go Jehofa, e le tshimo e a e tlhaoletsweng. E tla nna thuo ya baperesiti.+
22 “‘Fa motho a naya Jehofa tshimo e a e rekileng e e seng karolo ya boswa jwa gagwe,+
23 moperesiti o tla mmalela tlhwatlhwa ya yone go fitlha ka ngwaga wa Jubile, mme o tla ntsha tlhwatlhwa eo mo go lone letsatsi leo.+ Ke selo se se boitshepo mo go Jehofa.
24 Mo ngwageng wa Jubile, tshimo e tla boela kwa mothong yo a e rekileng mo go ene, kwa mothong yo lefatshe e leng la gagwe.+
25 “‘Tlhwatlhwa nngwe le nngwe e bewe go ya ka selekanyashekele sa lefelo le le boitshepo. Shekele e lekane le digera* di le 20.
26 “‘Le fa go ntse jalo, ope a se ka a ntsha* leitibolo la diphologolo ka gonne le tsalwa e le leitibolo la ga Jehofa.+ E ka tswa e le poo kgotsa nku, e setse e le la ga Jehofa.+
27 Fa le tswa mo diphologolong tse di itshekologileng mme a le rekolola go ya ka tlhwatlhwa e e beilweng, a a ntshe karolwana* ya tlhwatlhwa eo mo godimo ga tlhwatlhwa ya lone e e beilweng.+ Mme fa le sa rekololwe, le tla rekisiwa go ya ka tlhwatlhwa e e beilweng.
28 “‘Mme motho ope a se ka a rekisa kgotsa a rekolola selo se a se tlhaoletseng Jehofa se se tswang mo dithotong tsa gagwe, e ka ne e le motho kgotsa phologolo kgotsa tshimo e a nang le yone. Sengwe le sengwe se se tlhaotsweng ke selo se se boitshepotshepo mo go Jehofa.+
29 Mo godimo ga moo, motho ope yo o atlhotsweng* yo o beetsweng kwa thoko gore a bolawe, a se ka a rekololwa.+ O tshwanetse go bolawa.+
30 “‘Karolo nngwe le nngwe ya bolesome*+ ya lefatshe, e ka ne e tswa mo thobong ya tshimo kgotsa mo maungong a ditlhare, ke ya ga Jehofa. Ke selo se se boitshepo mo go Jehofa.
31 Fa motho a ka batla go rekolola karolo epe ya gagwe ya bolesome, a a ntshe karolwana ya yone mo godimo ga yone.
32 Fa e le karolo nngwe le nngwe ya bolesome ya motlhape kgotsa letsomane, sengwe le sengwe se se fetang ka fa tlase ga thobane ya modisa, phologolo ya bolesome e nne sengwe se se boitshepo mo go Jehofa.
33 A se ka a e tlhatlhoba gore a e siame kgotsa ga e a siama, le gone a se ka a ntsha phologolo e nngwe mo boemong jwa yone. Mme fa a ka leka go ntsha phologolo e nngwe mo boemong jwa e nngwe, phologolo e e neng e ntshitswe pele le e a e ntshitseng mo boemong jwa yone, tsoopedi e tla nna selo se se boitshepo.+ Ga e ka ke ya rekololwa.’”
34 Tseno ke ditaelo tse Jehofa a neng a di naya Moshe mo Thabeng ya Sinai+ gore a di bolelele Baiseraele.
Dintlha Tse di Kwa Tlase
^ Bona Dintlha B14.
^ Kgotsa “go ya ka shekele e e boitshepo.”
^ Shekele e lekana le 11,4 g. Bona Dintlha B14.
^ Seheb., “nngwetlhanong (1/5).”
^ Seheb., “itshepisa.”
^ Seheb., “nngwetlhanong (1/5).”
^ Semela se se tshwanang le korong.
^ Seheb., “sa homere.” Bona Dintlha B14.
^ Seheb., “nngwetlhanong (1/5).”
^ Gera e lekana le 0,57 g. Bona Dintlha B14.
^ Seheb., “itshepisa.”
^ Seheb., “nngwetlhanong (1/5).”
^ Kgotsa “tlhaotsweng.”
^ Kgotsa “Ditsabosome tsotlhe.”
