Lefitiko 10:1-20
10 Moragonyana bomorwa Arone e bong Nadabe le Abihu,+ mongwe le mongwe wa bone o ne a tsaya setsholamolelo sa gagwe mme a tsenya molelo mo go sone a bo a tsenya maswalo+ mo go sone. Go tswa foo, ba ne ba simolola go isa molelo o o seng ka fa molaong fa pele ga ga Jehofa,+ o a neng a sa ba laela gore ba o dire.
2 Ka jalo, molelo o ne wa tswa fa pele ga ga Jehofa mme wa ba laila,+ mo ba neng ba swela fa pele ga ga Jehofa.+
3 Go tswa foo, Moshe o ne a raya Arone a re: “Seno ke se Jehofa a se buileng, ‘Botlhe ba ba ba leng gaufi le nna ba tshwanetse go gopola gore ke boitshepo+ e bile ke tla galalediwa fa pele ga batho botlhe.’” Mme Arone o ne a didimala fela.
4 Ka jalo, Moshe o ne a bitsa Mishaele le Elisafane, bomorwa Usiele,+ rangwanaagwe Arone a bo a ba raya a re: “Tlang kwano, tlosang bomorwarraalona fa pele ga lefelo le le boitshepo lo ba ise kwa lefelong le le kwa ntle ga kampa.”
5 Ka jalo, ba ne ba atamela mme ba tsaya banna bano ba ntse ba apere diaparo tsa bone tse ditelele ba ba isa kwa lefelong le le kwa ntle ga kampa, fela jaaka Moshe a ne a ba boleletse.
6 Morago ga moo, Moshe o ne a raya Arone le bomorwawe ba bangwe e bong Eliasare le Ithamare a re: “Lo se ka lwa tlogela meriri ya ditlhogo tsa lona e sa tlhokomelwa kgotsa lwa gagola diaparo tsa lona,+ gore lo se ka lwa swa le gore Modimo a se ka a galefela phuthego yotlhe. Bomorwarraalona, phuthego yotlhe ya Baiseraele, ba tla lelela batho bano ba Jehofa a ba bolaileng ka molelo.
7 Ga lo a tshwanela go tswa mo kgorong ya tente ya bokopanelo, go seng jalo lo tla swa ka gonne leokwane la ga Jehofa la go tlotsa le mo go lona.”+ Ka jalo, ba ne ba dira go ya ka lefoko la ga Moshe.
8 Go tswa foo, Jehofa o ne a raya Arone a re:
9 “O se ka wa nwa beine kgotsa dinô tse dingwe tse di tagang, wena mmogo le bomorwao, fa lo tla mo tenteng ya bokopanelo+ gore lo se ka lwa swa. Ke molao o o tla nnelang ruri mo dikokomaneng tsotlhe tsa lona.
10 Lo dire seno gore lo kgone go farologanya selo se se boitshepo le se se seng boitshepo le selo se se seng phepa le se se phepa,+
11 le gore lo rute Baiseraele melao yotlhe e Jehofa a ba boleletseng yone ka Moshe.”+
12 Morago ga moo, Moshe o ne a bua le Arone le bomorwawe ba ba neng ba setse e bong Eliasare le Ithamare, a re: “Tsayang se se setseng mo setlhabelong sa dijo tsa ditlhaka go tswa mo ditlhabelong tsa ga Jehofa tse di dirwang ka molelo mme lo se jele gaufi le sebeso e le senkgwe se se se nang sebediso,+ ka gonne ke selo se se boitshepotshepo.+
13 Lo tshwanetse go se jela mo lefelong le le boitshepo+ ka ntlha ya gore ke kabelo ya lona le kabelo ya bomorwaalona e e tswang mo ditlhabelong tsa ga Jehofa tse di dirwang ka molelo ka gonne seno ke se ke se laetsweng.
14 Gape lo tla jela sehuba sa setlhabelo se se fokwang le leoto la karolo e e boitshepo+ mo lefelong le le phepa, wena le bomorwao mmogo le bomorwadio,+ ka gonne dilo tseno di ntshitswe go tswa mo ditlhabelong tsa Baiseraele tsa go abelana gore e nne kabelo ya gago le kabelo ya bomorwao.
15 Ba tla tlisa leoto la karolo e e boitshepo le sehuba sa setlhabelo se se fokwang mmogo le ditlhabelo tsa mafura tse di dirwang ka molelo, gore ba fokisetse setlhabelo se se fokwang kwa morago le kwa pele fa pele ga ga Jehofa; mme e tla nna kabelo ya gago mmogo le bomorwao e e tla nnelang ruri,+ fela jaaka Jehofa a laetse.”
16 Moshe o ne a batla podi ya setlhabelo sa boleo ka tlhoafalo,+ mme a lemoga gore e ne e fisitswe. Ka jalo, o ne a galefela Eliasare le Ithamare, bomorwa Arone ba ba neng ba setse mme a ba raya a re:
17 “Ke ka ntlha yang fa lo ne lo sa jele phologolo ya setlhabelo sa boleo mo lefelong le le boitshepo,+ ka gonne ke selo se se boitshepotshepo e bile Modimo o lo e neile gore lo tlose molato wa phuthego le gore ba kgone go itshwarelwa fa pele ga ga Jehofa?
18 Madi a yone ga a tlisiwa mo teng ga lefelo le le boitshepo.+ Ruri lo ka bo lo e jetse mo lefelong le le boitshepo, fela jaaka ke laetswe.”
19 Arone o ne a araba Moshe a re: “Gompieno ba isitse setlhabelo sa bone sa boleo le setlhabelo sa bone se se fisiwang fa pele ga ga Jehofa.+ Mme gone morago ga se se ntiragaletseng, fa nkabo ke jele setlhabelo sa boleo gompieno, a seo se ne se tla itumedisa Jehofa?”
20 E rile Moshe a utlwa seo, a kgotsofala.
