Jobe 31:1-40
31 “Ke dirile kgolagano le matlho a me.+
Ka jalo, ga nka ke ka kgatlhegela kgarebane.+
2 Mme gone, kabelo ya me e e tswang kwa Modimong e ne e tla nna efe,Ke ne ke tla bona boswa bofe go tswa kwa go Mothatayotlhe yo o kwa godimo?
3 A masetlapelo ga a letela modiraphosoLe matlhotlhapelo a ga a letela ba ba dirang se se utlwisang botlhoko?+
4 A Modimo ga a bone ditsela tsa me+E bile a ga a bale dikgato tsotlhe tsa me?
5 A nkile ka tsamaya ke bua maaka?*
A nkile ka tsietsa mongwe?+
6 Mma Modimo a nkale ka dikale tse di tlhomameng;+Foo o tla lemoga gore ke ikanyega mo go ene.+
7 Fa e le gore dikgato tsa me di fapoga mo tseleng+Kgotsa pelo ya me e setse matlho a me morago+Kgotsa diatla tsa me di ne di leswafaditswe,
8 Foo mma ke jale peo mme go je mongwe o sele,+Mme a se ke se jalang se kumolwe.*
9 Fa e le gore pelo ya me e ne e raetswe ke mosadi yo mongwe+E bile ke laletse+ fa kgorong ya moagelani wa me ke letile mosadi wa gagwe,
10 Foo a mosadi wa me a silele monna yo mongwe korong,Mme a banna ba bangwe ba tlhakanele dikobo le ene.*+
11 Gonne ke ne ke tla bo ke dirile boitshwaro jo bo tlhabisang ditlhong,Molato o ke tshwanetseng go o otlhaelwa ke baatlhodi.+
12 E ne e tla bo e le molelo o o lailang le o o senyang,*+O o fisang dilo tsotlhe tse ke nang le tsone.
13 Fa ke ne ke gana go direla batlhanka kgotsa malata a me tshiamisoFa ba ne ba ngongorega* ka nna,
14 Ke tla dira eng fa Modimo a ntshekisa?*
Ke tla mo araba ke reng fa a mpotsa dipotso?+
15 A Ene yo o neng a ntira mo popelong ga se ene gape yo o ba dirileng?+
A ga se Ene yo o re bopileng pele ga re tsholwa?*+
16 Fa e le gore ke ne ka gana go naya bahumanegi se ba neng ba se eletsa+Kgotsa ke ne ka dira gore matlho a motlholagadi a koafale;*+
17 Fa e le gore ke ne ke ja dijo tsa me ke le nosiKe sa di kgaogane le dikhutsana;+
18 (Gonne go tswa bosheng jwa me khutsana e ne ya gola e na le nna jaaka e kete ke ne ke le rraayone,E bile go tswa bongwaneng* ke ne ke kaela motlholagadi.)
19 Fa e le gore ke ne ke bona mongwe a nyelela ka gonne a tlhoka diaparoKgotsa motho yo o humanegileng a se na se a ka se aparang;+
20 Fa e le gore ga a* ka a ntshegofatsa+Fa a ntse a ithuthafatsa ka boboa jwa dinku tsa me;
21 Fa e le gore ke ne ke tsholeletsa khutsana lebole la me+Fa e ne e tlhoka gore ke e thuse kwa kgorong ya motse;*+
22 Foo a lebogo* la me le we mo legetleng la me,Mme a lebogo la me le robegele mo sekgonong.*
23 Gonne ke ne ke boifa masetlapelo a a tswang kwa Modimong,Mme ke ne ke sa kgone go itshokela kgalalelo ya gagwe.
24 Fa e le gore ke ne ke ikantse gautaKgotsa ke reile gauta e e sa tswakanngwang ka re, ‘O tshireletso ya me!’+
25 Fa e le gore ke ne ke itumedisiwa ke dikhumo tsa me tse dintsi+Ka gonne ke ne ke kokoantse dithoto tse dintsi;+
26 Fa e le gore ke ne ke bona letsatsi* le phatsimaKgotsa ngwedi o tsamaya o le montle;+
27 Mme pelo ya me e bo e tsietsega mo sephiring,Le molomo wa me o suna seatla sa me e le go di obamela;+
28 Foo ke ne ke tla bo ke dirile molato o baatlhodi ba tshwanetseng go o nkotlhaela,Gonne ke ne ke tla bo ke itatotse Modimo wa boammaaruri.
29 A nkile ka itumela fa mmaba wa me a tlelwa ke masetlapelo+Kgotsa ka itumela ka gonne a diragaletswe ke se se bosula?
30 Ga ke ise nke ke letlelele molomo wa me go leofaKa go kopa gore botshelo jwa gagwe bo hutsege.+
31 A banna ba ba mo tenteng ya me ga ba a ka ba re,‘Ke mang yo o mo itseng yo a iseng a ke a je dijo* tsa gagwe gore a bo a kgotsofale?’+
32 Ga go na motho ope o sele* yo o kileng a lala kwa ntle;+Ke ne ke bulela motsamai dikgoro tsa me.
33 A nkile ka leka go fitlha melato ya me, jaaka batho ba bangwe ba dira,+Ka go fitlha phoso ya me mo kgetsaneng ya seaparo sa me?
34 A nkile ka tshosiwa ke gore batho ba le bantsi ba tla reng,Kgotsa a nkile ka boifisiwa ke go nyadiwa ke batho ba malapa a mangwe,Ba ntidimatsa e bile ba dira gore ke tshabe go tswela kwa ntle?
35 E kete mongwe a ka bo a ntheeditse!+
Ke ne ke tla saena leina la me e le go tlhomamisa gore se ke se buileng se boammaaruri.*
A Mothatayotlhe a nkarabe!+
E kete molatofatsi wa me a ka bo a kwadile se a ntatofatsang ka sone mo lekwalong!
36 Ke ne ke tla le baya mo legetleng,E bile ke ne ke tla le bofelela mo tlhogong ya me jaaka serwalo.
37 Ke ne ke tla mmolelela ka kgato nngwe le nngwe e ke e tsereng;Ke ne ke tla mo atamela ke le pelokgale jaaka kgosana.
38 Fa e le gore lefatshe la me le ne le ka lela ka nnaLe mesele ya lone e ne e ka lela mmogo;
39 Fa e le gore ke ne ke jele maungo a lone ke sa a duelela,+Kgotsa fa e le gore ke ne ke dirile gore beng ba lone ba hutsafale;+
40 Foo a go tlhoge mmitlwa mo boemong jwa korongLe mefero e e nkgang bosula mo boemong jwa barele.”*
Mafoko a ga Jobe a felela fano.
Dintlha Tse di Kwa Tlase
^ Kgotsa gongwe “ka tsamaya le batho ba ba se nang boammaaruri?”
^ Kgotsa “a ditlogolwana tsa me di kumolwe.”
^ Seheb., “a banna ba bangwe ba khubame mo go ene.”
^ Seheb., “o o jang (kometsang) go fitlha o senya.”
^ Kgotsa “ba na le tsheko.”
^ Seheb., “ema?”
^ Seheb., “mo popelong.”
^ Kgotsa “ka hutsafatsa matlho a motlholagadi.”
^ Seheb., “go tswa popelong ya ga mmê.”
^ Seheb., “gore lotheka lwa gagwe ga lo a.”
^ Kgotsa gongwe “Fa ke ne ke bona gore ke na le ba ba nkemang nôkeng kwa kgorong ya motse.”
^ Kgotsa “lerapo la legetla.”
^ Kgotsa “mo lelokololong la lone; mo lerapong la lone le le kwa godimo.”
^ Seheb., “lesedi.”
^ Seheb., “nama.”
^ Kgotsa “motswakwa.”
^ Kgotsa “Ke saenne fano.”
^ Semela se se tshwanang le korong.
