Isaia 29:1-24
29 “Ruri Ariele,* Ariele, motse o Dafide a neng a kampa mo go one o tla atlholwa!+
Tswelelang ngwaga le ngwaga;A modikologo wa meletlo+ o tswelele.
2 Le fa go ntse jalo, ke tla tlisetsa Ariele masetlapelo,+Mme go tla nna le khutsafalo le selelo se segolo,+E bile mo go nna, o tla nna jaaka leiso la sebeso sa Modimo.+
3 Ke tla kampa mo matlhakoreng otlhe gore ke tle ke lwe le wena,E bile ke tla aga legora go go dikologaKe bo ke aga dithako gore ke go tlhasele.+
4 O tla kokobediwa;O tla bua go tswa mo mmung,Mme se o se buang se tla felela mo loroleng.
Lentswe la gago le tla tswa mo mmung+Jaaka lentswe la motho yo o dirisanang le badimo,E bile mafoko a gago a tla tswirinya a tswa mo loroleng.
5 Baba ba gago* ba bantsintsi ba tla nna jaaka lorole lo lo boleta,+Bagateledi ba bantsintsi ba tla nna fela jaaka mmoko o o fofang.+
Mme seo se tla direga ka ponyo ya leitlho, ka tshoganyetso.+
6 Jehofa wa masomosomo o tla go gololaKa tumo ya maru, thoromo ya lefatshe le modumo o mogolo,Ka phefo ya matsubutsubu, setsuatsue le dikgabo tsa molelo o o lailang.”+
7 Foo batho ba bantsintsi ba ditšhaba tsotlhe tse di tlhabanang le Ariele,+Botlhe ba ba lwang le ene,Dikara tsa ntwa tse e keteng ditora tse di mo tlhaselang,Le botlhe ba ba mo tlisetsang masetlapelo,Ba tla nna jaaka toro, e leng ponatshegelo ya bosigo.
8 Ruri go tla nna fela jaaka fa motho yo o tshwerweng ke tlala a lora a ja,Mme a bo a tsoga a tshwerwe ke tlala,*E bile go tla nna jaaka fa motho yo o tshwerweng ke lenyora a lora a nwa,Mme a bo a tsoga a lapile e bile a tshwerwe ke lenyora.*
Batho ba bantsintsi ba ditšhaba tsotlhe tse di tlhabanang le Thaba ya Siona,Le bone ba tla diragalelwa ke sone seo.+
9 Akabalang lo bo lo gakgamale;+Iphoufatseng mme lo foufale.+
Ba tagilwe, mme ga ba a tagiwa ke beine;Ba a thetheekela, mme ga ba a nwa bojalwa.
10 Gonne Jehofa o dirile gore lo robale boroko jo bogolo;+O tswetse matlho a lona, lona baporofeti,+E bile o khurumeditse ditlhogo tsa lona, lona ba lo bonang diponatshegelo.+
11 Mo go lona, ponatshegelo nngwe le nngwe e nna jaaka mafoko a a mo bukeng e e kanetsweng.+ Fa ba e naya motho yo o itseng go bala, ba re: “Tsweetswee, balela seno kwa godimo,” ene o tla re: “Ga ke kgone, ka gonne e kanetswe.”
12 Mme fa ba tsaya buka eo ba e naya mongwe yo o sa itseng go bala, ba re: “Tsweetswee, bala seno,” o tla a re: “Ga ke itse go bala gotlhelele.”
13 Jehofa a re: “Batho bano ba atamela kwa go nna ka melomo ya bone fela,E bile ba ntlotla ka melomo ya bone fela,+Mme dipelo tsa bone di kgakala le nna;E bile go mpoifa ga bone go theilwe mo ditaelong tsa batho tse ba di rutilweng.+
14 Ka jalo, ke nna Yo ke tla dirang dilo tse di gakgamatsang gape ka batho bano,+Ke tla dira dikgakgamatso ka go latelana;Mme botlhale jwa batho ba bone ba ba botlhale bo tla nyelela,E bile tlhaloganyo ya batho ba bone ba ba botlhale e tla fitlhiwa.”+
15 Ruri ba ba tsayang matsapa a magolo go fitlhela Jehofa dithulaganyo* tsa bone, ba tla tlelwa ke masetlapelo.+
Ba direla ditiro tsa bone mo lefifing,Ba ntse ba re: “Ke mang yo o re bonang?
Ke mang yo o itseng se re se dirang?”+
16 Ruri lo sokamisa dilo!*
A mmopi wa letsopa a ka tshwantshiwa le letsopa?+
A selo se se dirilweng se ka raya modiri wa sone sa re:
“Ga a ntira”?+
E bile a selo se se bopilweng se ka bua jaana ka mmopi wa sone:
“Ga a tlhaloganye sepe”?+
17 Mo lobakeng lo lokhutshwane fela, Lebanona e tla fetolwa tshingwana ya maungo,+Mme tshingwana eo ya maungo e tla tshwana fela le sekgwa.+
18 Mo letsatsing leo, bosusu ba tla utlwa mafoko a a mo bukeng,Mme difofu di tla tswa mo letobong le mo lefifing di bo di bona.+
19 Ba ba pelonolo ba tla itumela thata ka ntlha ya ga Jehofa,Le bahumanegi ba tla itumela ka ntlha ya Modimo yo o Boitshepo wa Iseraele.+
20 Mogateledi o tla bo a sa tlhole a le gone,Moikgantshi o tla fedisiwa,Le botlhe ba ba nnang ba ipaakanyeditse go gobatsa ba tla senngwa,+
21 Ba ba buang maaka gore ba bangwe ba felele ba le molato,Ba ba beelang mofemedi* dirai kwa kgorong ya motse,+Le ba ba ganang go direla mosiami tshiamiso ka ntlha ya dikganetsano tse di sa utlwaleng.+
22 Ka jalo, seno ke se Jehofa, yo o neng a golola Aborahame,+ a se bolelelang ditlogolwana tsa ga Jakobe:
“Jakobe ga a kitla a tlhola a tlhabiwa ke ditlhong,E bile sefatlhego sa gagwe ga se kitla se tlhola se nna sesetlha.*+
23 Gonne fa a bona bana ba gagwe,Ba e leng tiro ya diatla tsa me, ba na le ene,+Ba tla baka leina la me;Ruri ba tla baka Modimo yo o Boitshepo wa ga Jakobe,E bile ba tla tlotla Modimo wa Iseraele.+
24 Ba ba duleng mo tseleng ba tla ithuta go tlhaloganya,Le ba ba ngongoregang ba tla amogela thuto.”
Dintlha Tse di Kwa Tlase
^ Gongwe go kaya “Leiso la Sebeso sa Modimo,” go lebega go tewa Jerusalema.
^ Seheb., “Batswakwa.”
^ Kgotsa “a le lolea.”
^ Kgotsa “a omeletse.”
^ Kgotsa “maikaelelo.”
^ Kgotsa “Eleruri lo sokame!”
^ Seheb., “yo o kgalemelang.”
^ Go tewa ka ntlha ya go tlhabiwa ke ditlhong le go swabisiwa.
