Esera 6:1-22
6 Ka yone nako eo Kgosi Dario o ne a ntsha taelo, mme ba ne ba batla ka kelotlhoko mo mabolokelong a dipego* a go neng go bewa matlotlo mo go one kwa Babelona.
2 Mme go ne ga bonwa momeno mo kagong ya phemelo kwa Ekebatana, kwa porofenseng* ya Media, mme go ne go kwadilwe taelo e e latelang mo one:
3 “Mo ngwageng wa ntlha wa ga Kgosi Kurose, Kgosi Kurose o ne a ntsha taelo eno e e amanang le ntlo ya Modimo e e kwa Jerusalema:+ ‘A ntlo eo e agiwe sesha e le lefelo le ba tla ntshang ditlhabelo mo go lone, mme a metheo ya yone e tlhomiwe; bogodimo jwa yone e nne dimetara di ka nna 27,* bophara jwa yone e nne dimetara di ka nna 27,+
4 mme e direlwe mela e meraro ya maje a matona a a pitikololwang le mola o le mongwe wa dikota o beilwe fa godimo ga maje ao;+ mme a ditshenyegelo di duelwe go tswa mo ntlong ya kgosi.+
5 Gape a dijana tsa gauta le tsa selefera tsa ntlo ya Modimo di busiwe, tse Nebukadenesare a neng a di tsere mo tempeleng e e neng e le kwa Jerusalema mme a di tlisa mo Babelona,+ gore di tle di bewe mo lefelong la tsone mo tempeleng kwa Jerusalema mme di busediwe mo ntlong ya Modimo.’+
6 “Jaanong wena Tatenai mmusi wa kgaolo e e Ka Kwa ga Noka,* Shethare-bosenai le badirikalona, e leng balaodi ba babotlana ba kgaolo e e Ka Kwa ga Noka,+ tlogelang batho bao.
7 Lo se ka lwa kgoreletsa tiro e e dirwang mo ntlong ya Modimo. Mmusi wa Bajuda le bagolwane ba Bajuda ba tla tsosolosa ntlo ya Modimo mo lefelong le e neng e le mo go lone pele.
8 Mo godimo ga moo, ke ntsha taelo ka se lo tshwanetseng go se direla bagolwane bano ba Bajuda gore ba kgone go aga ntlo eo ya Modimo sesha: Banna bano ba tshwanetse go newa ka bonako madi a ditshenyegelo go tswa mo bobolokelamatlotlong jwa kgosi+ a a tswang mo lekgethong le le phuthilweng kwa kgaolong e e Ka Kwa ga Noka gore tiro ya bone e se ka ya kgoreletsega.+
9 Mme sepe fela se ba se tlhokang: dipowana+ mmogo le diphelefu+ le dikwanyana+ tsa ditlhabelo tse di fisiwang tse di ntshediwang Modimo wa legodimo, korong,+ letswai,+ beine+ le leokwane,+ fela jaaka baperesiti ba ba kwa Jerusalema ba bolela, ba tshwanetse go nna ba se newa letsatsi le letsatsi,
10 gore ba tle ba nne ba ntsha ditlhabelo tse di itumedisang Modimo wa magodimo le gore ba rapelele botshelo jwa kgosi le bomorwaayone.+
11 Gape ke ntshitse taelo ya gore fa motho a tlola molao ono, go tla somolwa kota mo ntlong ya gagwe mme o tla tsholediwa a bo a kokotelelwa mo go yone,* mme ntlo ya gagwe e tla dirwa ntlwana ya boithomelo* ka ntlha ya molato ono.
12 Mme e kete Modimo yo o dirileng gore leina la gagwe le nne koo+ a ka menola kgosi epe fela kgotsa batho ba ba sa reetseng taelo eno e bile ba leka go senya ntlo eo ya Modimo, e e kwa Jerusalema. Nna, Dario, ke ntsha taelo eno. A e diragadiwe ka bonako.”
13 Foo ntle le go senya nako, Tatenai mmusi wa kgaolo e e Ka Kwa ga Noka, Shethare-bosenai+ le badirikabone ba ne ba diragatsa sengwe le sengwe se Kgosi Dario a neng a se laetse.
14 Mme bagolwane ba Bajuda ba ne ba tswelela ba aga e bile ba gatela pele mo tirong eo,+ ba kgothadiwa ke boporofeti jwa ga moporofeti Hagai+ le Sekarea+ setlogolwana sa ga Ido; ba ne ba fetsa go aga ntlo eo go ya ka taelo ya Modimo wa Iseraele+ le ka taelo ya ga Kurose+ le Dario+ le Kgosi Aretaserese+ wa Peresia.
15 Ba ne ba fetsa go aga ntlo eo mo letsatsing la boraro la kgwedi ya Adare,* mo ngwageng wa borataro wa puso ya ga Kgosi Dario.
16 Go tswa foo, Baiseraele, baperesiti, Balefi+ le batho ba bangwe botlhe ba ba boileng kwa botshwarwa, ba ne ba dira moletlo wa go kgakola* ntlo eo ya Modimo ka boitumelo.
17 Mme ba ne ba ntshetsa moletlo oo wa go kgakolwa ga ntlo ya Modimo dipoo di le 100, diphelefu di le 200, dikwanyana di le 400, mme ba ne ba ntshetsa Baiseraele botlhe setlhabelo sa boleo ka diphoko di le 12, go tsamaisana le palo ya ditso tsa Iseraele.+
18 Mme ba ne ba tlhoma baperesiti go ya ka ditlhopha tsa bone le Balefi go ya ka ditlhopha tsa bone gore ba dire tirelo ya Modimo kwa Jerusalema,+ go ya ka se se kwadilweng mo bukeng ya ga Moshe.+
19 Mme batho ba ba boileng kwa botshwarwa ba ne ba keteka Tlolaganyo mo letsatsing la bo14 la kgwedi ya ntlha.+
20 Baperesiti le Balefi botlhe fela ba ne ba iitshekisitse,+ ka jalo botlhe ba ne ba itshekile; ba ne ba tlhaba phologolo ya Tlolaganyo ba e tlhabela batho botlhe ba ba boileng kwa botshwarwa, baperesiti mmogo le bone, go akaretsa le bone ba ba tlhabang.
21 Foo Baiseraele ba ba neng ba boile kwa botshwarwa ba ne ba e ja, mmogo le mongwe le mongwe yo o neng a ikopantse le bone e bile a tlogetse ditiro tse di seng phepa tsa ditšhaba tsa lefatshe gore a obamele* Jehofa, Modimo wa Iseraele.+
22 Gape ba ne ba keteka Moletlo wa Senkgwe Se se Se Nang Sebediso+ malatsi a le supa ka boitumelo, ka gonne Jehofa o ne a dirile gore ba itumele, e bile o ne a dirile gore kgosi ya Asiria e ba amogele,+ mo e neng ya ba ema nôkeng* mo tirong e e neng e dirwa mo ntlong ya Modimo wa boammaaruri, Modimo wa Iseraele.
Dintlha Tse di Kwa Tlase
^ Seara., “mo ntlong e go bolokelwang dipego mo go yone.”
^ Kgotsa “kwa kgaolong e e nang le taolo.”
^ Seheb., “dikubita di le 60.” Bona Dintlha B14.
^ Kgotsa “e e Ka Kwa ga Euferatese.”
^ Kgotsa gongwe “lefelo la go latlhela matlakala; thotobolo ya boloko.”
^ Kgotsa “o tla bapolelwa mo go yone.”
^ Bona Dintlha B15.
^ Kgotsa “go neela.”
^ Seheb., “batle.”
^ Seheb., “ya nonotsha diatla tsa bone.”
