Ditiro Tsa Baaposetoloi 6:1-15
6 Jaanong mo malatsing ao fa barutwa ba ntse ba oketsega, Bajuda ba ba buang Segerika ba ne ba simolola go ngongorega ka Bajuda ba ba buang Sehebera, ka gonne batlholagadi ba bone ba ne ba tlodisiwa matlho letsatsi le letsatsi fa go abiwa dijo.+
2 Ka jalo, baaposetoloi ba ba 12 ba ne ba bitsa barutwa ba bangwe ba bantsi mme ba ba raya ba re: “Ga go a siama* gore re tlogele lefoko la Modimo mme re abe dijo mo ditafoleng.+
3 Ka jalo, bakaulengwe, itlhopheleng banna ba le supa mo gare ga lona ba ba itiretseng leina le lentle,*+ ba ba tletseng moya le botlhale,+ gore re tle re ba tlhome gore ba etelele pele kgang eno ya botlhokwa;+
4 mme rona re tla nnela ruri mo thapelong e bile re ruta lefoko la Modimo.”
5 Se ba neng ba se bua se ne sa itumedisa batho botlhe, mme ba ne ba tlhopha Setefane, monna yo o nang le tumelo e e nonofileng le yo o tletseng moya o o boitshepo, le Filipo,+ Porokoro, Nikanore, Timone, Paramenase le Nikolase, mosokologi wa kwa Antioka.
6 Ba ne ba ba isa kwa baaposetoloing, mme fa ba sena go rapela, ba ne ba ba baya diatla.+
7 Ka jalo, lefoko la Modimo le ne la tswelela le anama,+ le palo ya barutwa ya nna ya oketsega fela thata+ mo Jerusalema; mme baperesiti ba bantsintsi ba ne ba nna badumedi.+
8 Jaanong e re ka Setefane a ne a amogelwa ke Modimo e bile Modimo a mo naya maatla, o ne a dira dikgakgamatso le ditshupo tse dikgolo mo pele ga batho.
9 Mme banna bangwe ba ba tswang kwa setlhopheng sa Bagololesegi ba ne ba tla ba na le banna bangwe ba Bakurene le Baalekesanderia le ba ba tswang kwa Kilikia le Asia, go tla go ganetsana le Setefane.
10 Le fa go ntse jalo, ba ne ba sa kgone go emelana le ene, ka gonne o ne a le botlhale e bile a thusiwa ke moya o o boitshepo gore a kgone go ba araba.+
11 Go tswa foo, ba ne ba tlhotlheletsa batho mo sephiring gore ba re: “Re mo utlwile a bua dilo tse di bosula tota ka Moshe le Modimo.”
12 Mme ba ne ba dira gore batho, baeteledipele le bakwadi ba galefele Setefane, mme ka tshoganyetso ba ne ba kopana le ene ba bo ba mo tsaya ka dikgoka ba mo isa fa pele ga Sanehederine.
13 Ba ne ba tlisa basupi ba maaka ba ba neng ba re: “Monna yono o nnetse go bua dilo tse dintsi tse di nyatsang lefelo leno le le boitshepo le molao wa ga Moshe.
14 Ka sekai, re mo utlwile a re Jesu yono wa Monasaretha o tla digela lefelo leno fa fatshe a bo a fetola melao e Moshe a re e neileng.”
15 Mme fa batho botlhe ba ba neng ba ntse mo holong ya Sanehederine ba mo lebile ka kelotlhoko, ba ne ba bona sefatlhego sa gagwe se tshwana le sefatlhego sa moengele.
Dintlha Tse di Kwa Tlase
^ Seger., “Ga go itumedise.”
^ Kgotsa “banna ba le supa ba go buiwang molemo ka bone.”
