Dipesalema 68:1-35
Go mokaedi. Pesalema ya ga Dafide. Pina.
68 A Modimo a eme, a baba ba gagwe ba gasame,Mme a ba ba mo tlhoileng ba tshabe, ba tswe fa pele ga gagwe.+
2 Fela jaaka mosi o phatlalala, e kete o ka ba phatlalatsa jalo;Fela jaaka mafura a gakologa fa molelong,A batho ba ba bosula ba nyelele jalo fa pele ga Modimo.+
3 Mme a basiami ba itumele;+A ba itumele fa pele ga Modimo;A ba phophome ka boitumelo.
4 Opelelang Modimo; opelelang leina la gagwe dipako.*+
Opelelang Ene yo o raletseng sekaka.*
Leina la gagwe ke Jah!*+ Itumeleng fa pele ga gagwe!
5 Modimo ke rraagwe dikhutsana* le mosireletsi* wa batlholagadi+A le mo lefelong la gagwe le le boitshepo.+
6 Modimo o naya batho ba ba tlhokang thuso legae le ba ka nnang mo go lone;+O golola magolegwa a bo a dira gore a atlege.+
Mme ba ba tlhogoethata* ba tshwanetse go nna mo nageng e e kgakgabetseng.+
7 Modimo, fa o ne o etelela pele* batho ba gago,+Fa o ne o gwanta mo sekakeng, (Selah)
8 Lefatshe le ne la roroma;+Legodimo le ne la nesa pula* ka ntlha ya Gago;Sinai eno e ne ya roroma ka ntlha ya Modimo, e bong Modimo wa Iseraele.+
9 Modimo, o ne wa dira gore pula e ne thata;O ne wa naya batho* ba gago ba ba neng ba lapile maatla.
10 Ba ne ba nna mo ditenteng mo kampeng ya gago;+Ka ntlha ya bomolemo jwa gago, o ne wa tlamela bahumanegi Modimo.
11 Jehofa o naya batho ba gagwe taelo;Mme basadi ba ba bolelang dikgang tse di molemo ka taelo eo ke lesomo le legolo.+
12 Dikgosi tsa masomosomo di a tshaba,+ di a tshaba!
Mosadi yo o salang kwa gae o nna le kabelo mo go se se gapilweng.+
13 Le fa gone lo ne lo lala mo gare ga melelo e e goditsweng mo dikampeng,*Lo tla amogela leeba le le nang le diphuka tse di khurumeditsweng ke selefera,Le le nang le dintlha tsa diphuka tsa gauta e e sa tswakanngwang.*
14 Fa Mothatayotlhe a ne a gasamisa dikgosi tsa lefatshe leo,*+Kapoko e ne ya wa kwa Salemone.*
15 Thaba ya kwa Bashana+ ke thaba ya Modimo;*Thaba ya kwa Bashana ke thaba e e nang le ditlhoa.
16 Lona dithaba tse di nang le ditlhoa, goreng lo dilolaThaba e Modimo a tlhophileng* go nna mo go yone?+
Eleruri Jehofa o tla nna mo go yone ka bosakhutleng.+
17 Dikara tsa ntwa tsa Modimo di dikete di le masomesome, dikete di le dintsintsi.+
Jehofa o tlile mo lefelong le le boitshepo a tswa kwa Sinai.+
18 O ne wa tlhatlogela kwa godimo wena Jah Modimo;+O ne wa golola ba ba tshwerweng;O ne wa tsaya banna ba ba nang le bokgoni jwa go dira ditiro tse di farologaneng,*+Tota le ba ba tlhogoethata,+ gore ba nne le bone.
19 E kete Jehofa a ka bakwa, yo o rwalang merwalo ya rona letsatsi le letsatsi,+Modimo wa boammaaruri yo e leng poloko ya rona. (Selah)
20 Mo go rona, Modimo wa boammaaruri ke Modimo yo o bolokang;+E bile Morena Molaodimogolo Jehofa o re golola mo losong.+
21 Eleruri, Modimo o tla thubaganya ditlhogo tsa baba ba gagwe,E leng tlhogo e e nang le moriri ya ope fela yo o tswelelang* a le molato.+
22 Jehofa o ne a re: “Ke tla ba busa ke ba ntsha kwa Bashana;+Ke tla ba busa ke ba ntsha mo tengteng ga lewatle,
23 Gore lonao lwa gago lo tle lo gate madi a baba ba gago+Le loleme lwa dintša tsa gago lo tle lo latswe madi a baba bao.”
24 Ba bona mekoloko ya batho ba gago Modimo,Mekoloko ya batho ba Modimo wa me, Kgosi ya me, ba tsena mo lefelong le le boitshepo.+
25 Baopedi ba tsamaya kwa pele, ba ba letsang diletswa tsa megala ba le ka fa morago ga bone;+Fa gare go na le makgarebe a letsa meropana.+
26 Bakang Modimo lo le boidiidi jo bo phuthegileng;*Bakang Jehofa, lona ba lo tswang mo Motsweding wa Iseraele.+
27 Teng koo Benjamine,+ yo mmotlana, o a ba fenya,*Gape go na le dikgosana tsa Juda le boidiidi jwa tsone jo bo tsositseng modumo,Dikgosana tsa Sebulone le dikgosana tsa Nafetali.
28 Modimo wa gago o laetse gore o tla newa nonofo.
Modimo, bontsha nonofo ya gago, fela jaaka o ne wa re e bontsha.+
29 Dikgosi di tla go tlisetsa dimpho+Ka ntlha ya tempele ya gago e e kwa Jerusalema.+
30 Kgalema dibatana tse di nnang mo lotlhakeng,Moraka wa dipoo+ le dinamane tsa tsone,Go fitlha ditšhaba di obama di tlisitse* selefera.
Le fa go ntse jalo, Modimo o gasamisa ditšhaba tse di ratang ntwa.
31 Dilwana tsa boronse di tla tlisiwa di tswa* kwa Egepeto;+Kushe o tla itlhaganelela go tlisetsa Modimo dimpho.
32 Lona magosi a lefatshe, opelelang Modimo,+Opelelang* Jehofa dipako, (Selah)
33 Ene yo o palamang legodimo la magodimo la bogologolo.+
O duma ka lentswe la gagwe, ka lentswe la gagwe le le maatla.
34 Bakang Modimo ka gonne o nonofile.+
Tlotlomalo ya gagwe e mo godimo ga IseraeleE bile nonofo ya gagwe e kwa loaping.*
35 Modimo o laela gore a boifiwe a bo a tlotliwe a le mo lefelong la gagwe* le legolo le le boitshepo.+
Ke Modimo wa Iseraele,Yo o nayang batho nonofo le maatla.+
A go bakwe Modimo.
Dintlha Tse di Kwa Tlase
^ Kgotsa “leletsang leina la gagwe mmino.”
^ Kgotsa gongwe “yo o raletseng maru.”
^ “Jah” ke khutshwafatso ya leina Jehofa.
^ Seheb., “bana ba ba se nang borre.”
^ Seheb., “moatlhodi.”
^ Kgotsa “Mme batlhanogi.”
^ Seheb., “o tsamaya fa pele ga.”
^ Seheb., “le ne la rotha.”
^ Seheb., “boswa.”
^ Kgotsa gongwe “mo masakeng a dinku.”
^ Kgotsa “e e botala jo bo serolwana.”
^ Seheb., “dikgosi tse di mo go lone.”
^ Kgotsa “Go ne ga nna jaaka e kete go wa kapoko kwa Salemone.”
^ Kgotsa “thaba e kgolo thata.”
^ Kgotsa “eletsang.”
^ Seheb., “banna gore e nne dimpho.”
^ Kgotsa “yo o tsamayatsamayang.”
^ Seheb., “lo le mo diphuthegong.”
^ Kgotsa “laola.”
^ Kgotsa gongwe “di gataka.”
^ Kgotsa gongwe “Baemedi ba tla tswa.”
^ Kgotsa “Letsang mmino.”
^ Seheb., “kwa marung.”
^ Seheb., “la gago.”
