Dipesalema 139:1-24
Go mokaedi. Pesalema ya ga Dafide. Pina.
139 Wena Jehofa, o ntlhatlhobile, mme o a nkitse.+
2 O a itse fa ke nna fa fatshe le fa ke ema.+
O lemoga dikakanyo tsa me o le kgakala.+
3 O a mpona* fa ke tsamaya le fa ke rapama;O itse ditsela tsa me tsotlhe.+
4 Pele ga nka ntsha lefoko lepe ka molomo wa me,Wena Jehofa, o setse o le itse sentle.+
5 O ntikologile gore o ntshireletse;E bile o beile seatla sa gago mo go nna.
6 Ga ke kgone go tlhaloganya ka botlalo* kitso e e ntseng jalo.
E kwa godimo thata mo nka se e fitlheleleng.*+
7 Nka tshabela moya wa gago kae,E bile nka tshabela sefatlhego sa gago kae?+
8 Fa ke ne nka tlhatlogela kwa legodimong, o ne o tla bo o le teng koo,Le fa ke ne nka dira gore bolao jwa me bo nne mo Lebitleng,* o ne o tla mphitlhela teng koo.+
9 Fa ke ne nka fofa ka diphuka tsa bosaGore ke ye go aga gaufi le lewatle le le kgakala thata,
10 Tota le teng koo, seatla sa gago se ne se tla nkgogaLe seatla sa gago sa moja se ne se tla ntshwara.+
11 Fa ke re: “Eleruri lefifi le tla mphitlha,”
Foo bosigo jo bo ntikologileng bo ne bo tla fetoga lesedi.
12 Tota le lefifi le ne le ka se nne lentsho thata mo go wena,Mme bosigo bo ne bo tla phatsima fela jaaka motshegare;+Mo go wena lefifi le tshwana fela le lesedi.+
13 Gonne o dirile diphilo tsa me;O ne wa mpoloka ke sireletsegile* mo popelong ya ga mmê.+
14 Ke a go baka ka gonne ke dirilwe ka tsela e e gakgamatsang e e jesang kgakge.+
Ditiro tsa gago di a gakgamatsa,+Ke itse seno sentle.
15 O ne wa bona marapo a meFa ke ne ke dirwa mo sephiring,Fa ke ne ke gola mo popelong ya ga mmê.*+
16 Matlho a gago a ne a mpona ke sa ntse ke le losea lo lo mo popelong;Dikarolo tsa me tsotlhe di ne di kwadilwe mo bukeng ya gagoTota le malatsi a fa di ne di bopiwa,Pele ga epe ya tsone e nna teng.
17 Ruri dikakanyo tsa gago di tlhwatlhwakgolo thata mo go nna!+
Wena Modimo, ruri palo ya tsone e kgolo thata!+
18 Fa ke leka go di bala, di feta le motlhaba.*+
Fa ke tsoga, ke iphitlhela ke sa ntse ke di bala.*+
19 Ao tlhe Modimo, e kete o ne o ka bolaya batho ba ba bosula,+Foo batho ba ba ratang thubakanyo* ba ne ba tla ntlogela,
20 Batho ba ba buang dilo tse di sa siamang ka wena ka maikaelelo a a bosula;*Ke baba ba gago ba ba dirisang leina la gago ka tsela e e se nang mosola.+
21 A ga ke a tlhoa batho ba ba go tlhoileng Jehofa,+Le gone a ga ke ile ba ba go tlhanogelang?+
22 Ke ba tlhoile fela thata;+Ba fetogile baba mo go nna.
23 Ntshekatsheke tlhe Modimo, mme o itse pelo ya me.+
Ntlhatlhobe, mme o itse dikakanyo tsa me tse di tlhobaetsang.+
24 Bona gore a ga go na sepe se se kotsi mo go nna,+Mme o nkgogele+ mo tseleng ya bosakhutleng.
Dintlha Tse di Kwa Tlase
^ Seheb., “ntekanya.”
^ Kgotsa “Ke gakgamadiwa thata ke.”
^ Kgotsa “E ntsi thata gore nka e tlhaloganya.”
^ Kgotsa “Sheole.” Bona Ditlhaloso Tsa Mafoko.
^ Kgotsa gongwe “O ne wa ntoga.”
^ Seheb., “Fa ke ne ke logwa mo dikarolong tse di kwa tengteng tsa lefatshe.”
^ Kgotsa “moshawa.”
^ Seheb., “ke sa ntse ke na le wena.”
^ Kgotsa “ba ba nang le molato wa madi.”
^ Kgotsa “go ya ka dikakanyo tsa bone.”
