Samuele wa Ntlha 20:1-42
-
Jonathane o ema Dafide nôkeng (1-42)
20 Go tswa foo, Dafide o ne a tswa kwa Naiothe kwa Rama mme a tshaba. Le fa go ntse jalo, o ne a tla kwa go Jonathane mme a re: “Ke dirile eng?+ Phoso ya me ke eng, mme ke leofetse rrago ka eng gore a batle go mpolaya?”
2 Fa a rialo, Jonathane o ne a mo raya a re: “Go ka se direge!+ Ga o kitla o swa. Rre ga a kitla a dira sepe, se segolo kgotsa se sennye, a sa se mpolelela. Goreng rre a ka mphitlhela kgang eno? Seno se ka se direge.”
3 Le fa go ntse jalo, Dafide o ne a ikana go ya pele mme a re: “Ruri rrago o a itse gore nna le wena re ditsala+ mme o tla re, ‘O se ka wa letla Jonathane a itse seno, go seng jalo o tla utlwa botlhoko.’ Mme ke ikana ka Jehofa Modimo yo o tshelang le ka wena, ga ke na go tshela lobaka lo loleele!”+
4 Foo Jonathane o ne a raya Dafide a re: “Sengwe le sengwe se o se buang, ke tla se go direla.”
5 Dafide o ne a raya Jonathane a re: “Kamoso ke ngwedi yo mosha,+ mme ruri go solofetswe gore ke bo ke ntse le kgosi ke ja; o tshwanetse go nnaya tsela, mme ke tla iphitlha kwa nageng go fitlha maitseboa mo letsatsing la boraro.
6 Fa rrago a ntlhoka, foo o re, ‘Dafide o ne a kopa tetla mo go nna gore a sianele kwa motseng wa gagabo wa Bethelehema,+ ka gonne go na le setlhabelo koo sa ngwaga le ngwaga sa lelapa lotlhe.’+
7 Fa a re, ‘Go siame!’ seo se tla bo se kaya gore nna motlhanka wa gago ga ke tlhoke go boifa sepe. Mme fa a galefa, o tla itse gore o ikemiseditse go nkgobatsa.
8 Mpontshe lorato lo lo sa kgaotseng,+ ka gonne o dirile kgolagano le nna fa pele ga ga Jehofa.+ Mme fa ke le molato,+ mpolaye. Ke ka ntlha yang fa o nkisa kwa go rrago?”
9 Fa a rialo, Jonathane o ne a re: “Nka se go dire jalo! Fa ke lemoga gore rre o ikemiseditse go go gobatsa, ruri ke tla go bolelela.”+
10 Foo Dafide o ne a raya Jonathane a re: “Ke mang yo o tla mpolelelang gore a rrago o go arabile ka bogale?”
11 Jonathane o ne a raya Dafide a re: “A re tsamaye re ye kwa nageng.” Ka jalo, boobabedi ba ne ba ya kwa nageng.
12 Mme Jonathane o ne a raya Dafide a re: “A Jehofa, Modimo wa Iseraele a nne mosupi wa gore ke tla botsolotsa rre mo e ka nnang ka nako eno kamoso kgotsa ka letsatsi la boraro. Fa a utlwana le wena, ke tla go romelela molaetsa ke go itsise.
13 Mme fa e le gore rre o batla go go gobatsa, e kete Jehofa a ka nkotlhaya fa nka se ka ka go bolelela seo le fa nka se ka ka go tsamaisa ka kagiso. E kete Jehofa a ka nna le wena,+ fela jaaka a ne a na le rre.+
14 Mme gone, a ga o kitla o mpontsha lorato lo lo sa kgaotseng lo lo tshwanang le lwa ga Jehofa fa ke sa ntse ke tshela, tota le fa ke swa?+
15 Le ka motlha o se ka wa kgaotsa go bontsha ba lelapa la gaetsho lorato lo lo sa kgaotseng,+ tota le fa Jehofa a nyeletsa baba botlhe ba gago mo lefatsheng.”
16 Ka jalo, Jonathane o ne a dira kgolagano le ba lelapa la ga Dafide a re, “Jehofa o tla otlhaya baba botlhe ba ga Dafide.”
17 Ka jalo, Jonathane o ne a ikanisa Dafide gape ka lorato lo a mo ratang ka lone, ka gonne o ne a mo rata fela jaaka a ithata.+
18 Go tswa foo, Jonathane o ne a mo raya a re: “Kamoso ke ngwedi yo mosha,+ mme go tla lemogiwa gore ga o yo, ka gonne setulo sa gago se tla bo se se na ope.
19 Ka letsatsi la boraro go tla lemotshega le go feta, mme o tshwanetse go tla mo lefelong le o neng o iphitlhile mo go lone letsatsi lele,* mme o nne fano gaufi le leje.
20 Go tswa foo, ke tla hulela metswi e meraro ka fa letlhakoreng le lengwe la lone, jaaka e kete ke hula sengwe.
21 Fa ke roma motlhokomedi, ke tla re, ‘Tsamaya, o ye go batla metswi.’ Fa ke raya motlhokomedi ke re, ‘Bona! Metswi e ka fa letlhakoreng leno la gago, e tseye,’ foo o ka nna wa boa, ka gonne ke ikana ka Jehofa Modimo yo o tshelang, seo se tla bo se raya gore sengwe le sengwe se se amanang le wena se mo kagisong e bile ga go na kotsi epe.
22 Le fa go ntse jalo, fa nka raya mosimane ke re, ‘Bona! Metswi e kwa pele ga gago,’ foo o tsamaye, ka gonne Jehofa o batla gore o tsamaye.
23 Fa e le ka tsholofetso e re e dirileng,+ nna le wena, e kete Jehofa a ka nna fa gare ga rona ka bosakhutleng.”+
24 Ka jalo, Dafide o ne a iphitlha kwa nageng. Ka letsatsi la ngwedi yo mosha, kgosi e ne ya nna mo setulong sa yone gore e je.+
25 Kgosi e ne e ntse mo setulong sa yone se se fa loboteng jaaka gale. Jonathane o ne a lebagane le ene, mme Abenere+ o ne a ntse fa thoko ga ga Saulo, mme setulo sa ga Dafide sone se ne se se na ope.
26 Saulo o ne a se ka a bua sepe mo letsatsing leo, ka gonne o ne a ipolelela jaana: ‘Go diragetse sengwe se se dirileng gore a se ka a nna phepa.+ Ruri o tshwanetse a bo a itshekologile.’
27 Mme letsatsi morago ga ngwedi yo mosha, mo letsatsing la bobedi, setulo sa ga Dafide se ne sa tswelela se se na ope. Foo Saulo o ne a raya morwawe e bong Jonathane a re: “Ke ka ntlha yang fa morwa Jese+ a sa tla dijong maabane le gompieno?”
28 Jonathane o ne a araba Saulo a re: “Dafide o ne a kopa tetla mo go nna gore a ye kwa Bethelehema.+
29 O ne a re, ‘Tsweetswee, ntetle ke tsamaye, ka gonne re na le setlhabelo sa lelapa mo motseng, mme nkgonne o mpiditse. Ka jalo, fa ke bone kamogelo mo matlhong a gago, tsweetswee mma ke sianele teng ke ye go bona bonkgonne.’ Ke gone ka moo a sa tlang mo tafoleng ya kgosi.”
30 Foo Saulo o ne a galefela Jonathane fela thata mme a mo raya a re: “Morwa ke wena wa mosadi yo o tlhogoethata, a o akanya gore ga ke itse gore o tlhopha go ema mo letlhakoreng la ga morwa Jese, gore o itlhabise ditlhong o bo o tlhabise le mmago ditlhong?*
31 Fa fela morwa Jese a sa ntse a tshela, ga o kitla o nna kgosi e bile bogosi jwa gago ga bo kitla bo nnela ruri.+ Ka jalo, roma mongwe gore a mo tlise kwa go nna, ka gonne o tshwanetse go swa.”*+
32 Le fa go ntse jalo, Jonathane o ne a raya rraagwe a re: “Ke ka ntlha yang fa a tshwanetse go bolawa?+ O dirile eng?”
33 Fa a rialo, Saulo o ne a mo konopa ka lerumo a re o a mo tlhaba,+ ka jalo Jonathane o ne a lemoga gore rraagwe o ne a ikemiseditse go bolaya Dafide.+
34 Ka yone nako eo, Jonathane o ne a tswa mo tafoleng a tuka bogale, mme o ne a se ka a ja mo letsatsing la bobedi morago ga ngwedi yo mosha, ka gonne o ne a utlwile botlhoko ka ntlha ya ga Dafide+ e bile rraagwe o ne a mo tlhabisitse ditlhong.
35 Mo mosong, Jonathane o ne a ya kwa nageng gore a ye go kopana le Dafide, mme motlhokomedi yo mmotlana o ne a na le ene.+
36 Mme o ne a raya motlhokomedi wa gagwe a re: “Tsweetswee, siana mme o batle metswi e ke e hulang.” Motlhokomedi o ne a siana, mme Jonathane o ne a hulela motswi kwa pele ga gagwe.
37 E rile motlhokomedi a goroga kwa lefelong le Jonathane a huletseng motswi kwa go lone, Jonathane o ne a tlhaeletsa motlhokomedi a re: “A motswi ga o kwa pele ga gago?”
38 Jonathane o ne a tlhaeletsa motlhokomedi a re: “Itlhaganele! Tsamaya ka bonako! O se ka wa diega!” Mme motlhokomedi wa ga Jonathane o ne a sela metswi a bo a boela kwa go mong wa gagwe.
39 Motlhokomedi yoo o ne a sa tlhaloganye sepe ka kgang eno; Jonathane le Dafide ke bone fela ba ba neng ba itse gore seno se kaya eng.
40 Go tswa foo, Jonathane o ne a naya motlhokomedi wa gagwe dibetsa tsa gagwe a bo a mo raya a re: “Tsamaya, di ise kwa motseng.”
41 E rile motlhokomedi a tsamaya, Dafide o ne a ema a tswa mo lefelong le le gaufi le le neng le le ka fa borwa. Go tswa foo, o ne a wela fa fatshe ka sefatlhego a bo a ikoba gararo, mme ba ne ba tlamparelana* ba bo ba lela mmogo, mme Dafide o ne a lela thata.
42 Jonathane o ne a raya Dafide a re: “Tsamaya ka kagiso, e re ka roobabedi re ikanne+ mo leineng la ga Jehofa, re re, ‘E kete Jehofa a ka nna fa gare ga me le wena le fa gare ga ditlogolwana* tsa gago le ditlogolwana* tsa me ka bosakhutleng.’”+
Go tswa foo, Dafide o ne a ema a bo a tsamaya, mme Jonathane ene o ne a boela kwa motseng.
Dintlha Tse di Kwa Tlase
^ Seheb., “ka letsatsi la tiro.”
^ Seheb., “o bo o tlhabise bosaikategang jwa ga mmago ditlhong?”
^ Seheb., “ka gonne ke morwa loso.”
^ Seheb., “yo mongwe o ne a suna yo mongwe.” Mo motlheng wa fa Baebele e ne e kwalwa, motho o ne a suna yo mongwe go bontsha gore ke ditsala.
^ Seheb., “losika.”
^ Seheb., “losika.”
