Ditiragalo wa Ntlha 15:1-29
15 Dafide o ne a tswelela a ikagela matlo mo Motseng wa ga Dafide, mme o ne a baakanyetsa Letlole la Modimo wa boammaaruri lefelo a bo a le tlhomela tente.+
2 Ke ka yone nako eo mo Dafide a neng a re: “Ope a se ka a tsaya Letlole la Modimo wa boammaaruri ntle le Balefi, ka gonne Jehofa o tlhophile bone gore ba tseye Letlole la ga Jehofa le gore ba mo direle ka metlha.”+
3 Go tswa foo, Dafide o ne a phuthela Baiseraele botlhe kwa Jerusalema gore Letlole la ga Jehofa le isiwe kwa lefelong le a neng a le le baakanyeditse.+
4 Dafide o ne a phutha ditlogolwana tseno tsa ga Arone+ le tsa Balefi:+
5 go tswa mo go Bakohathe e ne e le Uriele molaodi le bomorwarraagwe ba le 120;
6 go tswa mo go Bamerari e ne e le Asaia+ molaodi le bomorwarraagwe ba le 220;
7 go tswa mo go Bagereshome e ne e le Joele+ molaodi le bomorwarraagwe ba le 130;
8 go tswa mo ditlogolwaneng tsa ga Elisafane+ e ne e le Shemaia molaodi le bomorwarraagwe ba le 200;
9 go tswa mo ditlogolwaneng tsa ga Heberone e ne e le Eliele molaodi le bomorwarraagwe ba le 80;
10 go tswa mo ditlogolwaneng tsa ga Usiele+ e ne e le Aminadabe molaodi le bomorwarraagwe ba le 112.
11 Mo godimo ga moo, Dafide o ne a bitsa moperesiti Sadoke+ le moperesiti Abiathare,+ le Balefi e bong Uriele, Asaia, Joele, Shemaia, Eliele le Aminadabe,
12 mme o ne a ba raya a re: “Ke lona ditlhogo tsa dikgotla tsa lona tsa Balefi. Nnang boitshepo, lona le bomorwarraalona, mme lo ise Letlole la ga Jehofa, Modimo wa Iseraele kwa lefelong le ke le le baakanyeditseng.
13 E re ka mo lekgetlong la ntlha lo ne lo sa le tsaya,+ Jehofa, Modimo wa rona o ne a re galefela,+ ka gonne re ne re sa latela thulaganyo e e siameng.”+
14 Ka jalo, baperesiti le Balefi ba ne ba iphepafatsa* gore ba ye go tsaya Letlole la ga Jehofa, Modimo wa Iseraele.
15 Go tswa foo, Balefi ba ne ba tsholetsa Letlole la Modimo wa boammaaruri mo magetleng a bone ka dikota,+ fela jaaka Moshe a ne a laetse go ya ka lefoko la ga Jehofa.
16 Foo Dafide o ne a bolelela balaodi ba Balefi gore ba tlhome bomorwarraabone ba e leng baopedi gore ba opele ka boitumelo, ba opela ba ntse ba letsa diletswa tseno tsa mmino: diletswa tsa megala, diharepa+ le disemebala.+
17 Ka jalo, go tswa mo lotsong lwa bone, Balefi ba ne ba tlhoma Hemane+ morwa Joele, Asafe+ morwa Berekia le Ethane+ morwa Kushaia, wa lelapa la Bamerari.
18 Ba ne ba na le bomorwarraabone ba setlhopha sa bobedi+ e bong Sekarea, Bene, Jaasiele, Shemiramothe, Jehiele, Uni, Eliabe, Benaia, Maaseia, Matithia, Elifelehu le Mikeneia, le Obede-edoma le Jeiele badisa ba dikgoro.
19 Baopedi e bong Hemane,+ Asafe+ le Ethane, ba ne ba tshwanetse go letsa disemebala tsa kopore;+
20 mme Sekarea, Asiele, Shemiramothe, Jehiele, Uni, Eliabe, Maaseia le Benaia ba ne ba letsa diletswa tsa megala tse di dirilweng gore di ntshe molodi wa Alamothe;*+
21 mme Matithia,+ Elifelehu, Mikeneia, Obede-edoma, Jeiele le Asasia ba ne ba etelela pele ka go letsa diharepa tse di dirilweng gore di ntshe molodi wa Sheminithe.*+
22 Kenania+ yo e neng e le molaodi wa Balefi o ne a okametse go tsamaisiwa ga letlole, ka gonne e ne e le setswerere,
23 mme Berekia le Elekana e ne e le badisa ba Letlole.
24 Baperesiti e bong Shebania, Joshafate, Nethanele, Amasai, Sekarea, Benaia le Eliesere ba ne ba leletsa diterompeta kwa godimo fa pele ga Letlole la Modimo wa boammaaruri,+ mme Obede-edoma le Jehia gape ba ne ba direla e le badisa ba Letlole.
25 Go tswa foo, Dafide le bagolwane ba Iseraele le baokamedi ba dikete ba ne ba tsamaya mmogo gore ba ye go ntsha letlole la kgolagano ya ga Jehofa kwa ntlong ya ga Obede-edoma+ ka boitumelo.+
26 E re ka Modimo wa boammaaruri a ile a thusa Balefi ba ba neng ba tshwere letlole la kgolagano ya ga Jehofa, ba ne ba ntsha setlhabelo ka dipowana di le supa le diphelefu di le supa.+
27 Dafide o ne a apere seaparo se se se nang mabogo sa letsela le le boleta, fela jaaka Balefi botlhe ba ba tshwereng Letlole, baopedi le Kenania yo e neng e le molaodi wa ba ba tsamaisang letlole e bile e le molaodi wa baopedi; gape Dafide o ne a apere khiba+ ya letsela le le boleta.
28 Baiseraele botlhe ba ne ba tlisa letlole la kgolagano ya ga Jehofa ba goa ba itumetse,+ ba letsa lonaka, diterompeta+ le disemebala, ba leletsa diletswa tsa megala le diharepa+ kwa godimo.
29 Le fa go ntse jalo, fa letlole la kgolagano ya ga Jehofa le goroga mo Motseng wa ga Dafide,+ morwadia Saulo e bong Mikale+ o ne a leba kwa tlase ka fensetere mme a bona Kgosi Dafide a tlolatlola e bile a itumetse; mme o ne a mo nyatsa mo pelong.+
Dintlha Tse di Kwa Tlase
^ Seheb., “iitshepisa.”
^ Bona Ditlhaloso Tsa Mafoko.
^ Bona Ditlhaloso Tsa Mafoko.
