Bakorintha wa Ntlha 6:1-20
6 Fa mongwe a na le kgang le yo mongwe,+ ke eng fa lo ya go sekisana kwa kgotlatshekelong, lo ya go ngongorega fa pele ga batho ba ba sa ikobeleng melao ya Modimo? Ke eng fa lo sa ye kwa batlhankeng ba Modimo ba ba boitshepo?
2 Kgotsa a ga lo itse gore batlhanka bano ba ba boitshepo ba tla atlhola lefatshe?+ Mme fa e le gore lo tla atlhola lefatshe, a ga lo a tshwanela go atlhola dikgang tse di sa reng sepe?
3 A ga lo itse gore re tlile go atlhola baengele?+ Ka jalo, ke ka ntlha yang fa re sa rarabolole mathata a a sa reng sepe a a tlhagang gone jaanong?
4 Jaanong, fa e le gore lo na le mathata a a tshwanetseng go rarabololwa,+ ke ka ntlha yang fa lo tlhopha banna ba ba seng mo phuthegong go lo atlhola?
5 Ke bua jaana gore ke lo tlhabise ditlhong. A ga go na motho yo o botlhale mo go lona yo o ka atlholang fa go tsoga kgang nngwe mo gare ga lona?
6 Mme jaanong mokaulengwe o sekisa mokaulengwe wa gagwe kwa kgotlatshekelong, le gone a dira jalo fa pele ga batho ba ba sa dumeleng mo go Jesu!
7 Tota fa lo sekisana kwa dikgotlatshekelong, lo itlhabisa ditlhong. Ke eng fa lo sa itshoke fa bakaulengwe ba lona ba lo diretse phoso?+ Go botoka go ba tlogela ba lo tseela dilo tsa lona.
8 Jaanong lo direlana diphoso e bile lo a tsietsana, le gone lo dira bakaulengwe ba lona jalo!
9 Kgotsa a ga lo itse gore batho ba ba sa siamang ga ba kitla ba rua Bogosi Jwa Modimo?+ Lo se ka lwa tsiediwa. Batho ba ba dirang boitsholo jo bo sa siamang jwa tlhakanelodikobo,*+ ba ba obamelang medingwana,+ ba ba dirang boaka,+ banna ba ba letlang gore banna ba bangwe ba robalane le bone,+ banna ba ba robalanang le banna ba bangwe,*+
10 magodu, batho ba ba pelotshetlha,+ matagwa,+ ba ba sotlang ba bangwe ka mafoko,* le batho ba ba tseelang ba bangwe dilo ka dikgoka ga ba kitla ba rua Bogosi Jwa Modimo.+
11 Le fa go ntse jalo, bangwe ba lona ba ne ba ntse jalo. Mme lo tlhapisitswe lwa nna phepa;+ lo dirilwe boitshepo;+ lo boletswe lo le ba ba siameng+ ka ntlha ya leina la Morena wa rona Jesu Keresete le ka moya wa Modimo wa rona.
12 Mo go nna, dilo tsotlhe di ka fa molaong,* mme ga se dilo tsotlhe tse di nang le mosola.+ Mo go nna, dilo tsotlhe di ka fa molaong, mme ga ke na go itetla gore ke laolwe ke sepe.
13 Dijo ke tsa mpa, le mpa le yone ke ya dijo, mme Modimo o tla di nyeletsa tsoopedi.+ Mmele ga o a tshwanela go dirisediwa boitsholo jo bo sa siamang jwa tlhakanelodikobo,* go na le moo, o tshwanetse go dirisediwa tiro ya Morena;+ mme Morena ene o tlamela mmele.
14 Mme Modimo o ne a tsosa Morena+ e bile o tla re tsosa mo losong+ a dirisa maatla a gagwe.+
15 A ga lo itse gore mebele ya lona e seoposengwe le mmele wa ga Keresete?+ A lo akanya gore ke tla lo ntsha mo mmeleng wa ga Keresete mme ke lo dire seoposengwe le seaka? Le e seng!
16 A ga lo itse gore yo o tlhakanelang dikobo le seaka, o tla nna mmele o le mongwe le sone? Gonne Modimo a re, “batho ba babedi ba tla nna nama e le nngwe.”+
17 Mme yo o seoposengwe le Morena, o akanya jaaka ene.+
18 Tshabang boitsholo jo bo sa siamang jwa tlhakanelodikobo!*+ Boleo bongwe le bongwe bo sele jo motho a ka bo dirang bo kwa ntle ga mmele wa gagwe, mme yo o dirang boitsholo jo bo sa siamang jwa tlhakanelodikobo o leofela mmele wa gagwe.+
19 A ga lo itse gore mmele wa lona ke tempele+ ya moya o o boitshepo o o nnang mo go lona, o lo o neilweng ke Modimo?+ Gape, lo ba Modimo,+
20 ka gonne lo ne lwa rekwa ka tlhwatlhwa e e kwa godimo.+ Ka jalo, galaletsang Modimo+ mo mmeleng wa lona.+
Dintlha Tse di Kwa Tlase
^ Kgotsa “banna ba ba tlhakanelang dikobo le banna ba bangwe.”
^ Bona Ditlhaloso Tsa Mafoko.
^ Kgotsa “bagobolodi.”
^ Kgotsa “di a letlelesega.”
^ Ka Segerika, por·nei′a. Bona Ditlhaloso Tsa Mafoko.
^ Ka Segerika, por·nei′a. Bona Ditlhaloso Tsa Mafoko.
