Nehemia 5:1-19
5 Le fa go ntse jalo, batho le basadi ba bone ba ne ba lelela+ bomorwarraabone ba Bajuda+ ka selelo se segolo thata.
2 Mme go ne go na le ba ba neng ba re: “Re ntsha bomorwaarona le bomorwadiarona e le sebeelo gore re tle re bone dijo tsa ditlhaka re je mme re tswelele re tshela.”+
3 Mme go ne go na le ba ba neng ba re: “Re ntsha masimo a rona le masimo a rona a mofine le matlo a rona e le sebeelo+ gore re tle re bone dijo tsa ditlhaka fa go na le tlhaelo ya dijo.”
4 Mme go ne go na le ba ba neng ba re: “Re adimile madi mo masimong a rona le masimo a rona a mofine+ gore re ntshetse kgosi sehuba.+
5 Mme jaanong nama ya rona e tshwana le nama ya bomorwarraarona;+ bomorwaarona ba tshwana le bomorwaabone, mme bona, re dira bomorwaarona le bomorwadiarona batlhanka,+ mme go na le bangwe ba bomorwadiarona ba ba setseng ba dirilwe jalo; mme ga go na maatla mo diatleng tsa rona fa masimo a rona le masimo a rona a mofine e le a ba bangwe.”
6 Jaanong ke ne ka nna bogale fela thata fa ke sena go utlwa selelo sa bone le mafoko ano.
7 Ka jalo pelo ya me ya akanya mo teng ga me, mme ka simolola go bona batlotlegi le bathusi ba mmusi molato,+ mme ka ba raya ka re: “Lo batla koketso+ e ntsi thata, mongwe le mongwe mo go morwarraagwe.”
Mo godimo ga moo, ke ne ka rulaganya kopano e kgolo ka ntlha ya bone.+
8 Mme ka ba raya ka re: “Rona ka borona re rekolotse+ bomorwarraarona ba Bajuda ba ba neng ba rekiseditswe ditšhaba, kafa go neng go le kafa maatleng a rona ka teng; mme go ntse go le jalo a lona ka bolona lo tla rekisa bomorwarraalona,+ mme a ba tshwanetse go rekisediwa rona?” Foo ba tlhoka puo, mme ba se ka ba bona lefoko le ba ka le buang.+
9 Mme ka tswelela ka re: “Selo se lo se dirang ga se a siama.+ A ga lo a tshwanela go tsamaya ka go boifa+ Modimo+ wa rona ka ntlha ya kgobo ya ditšhaba, baba ba rona?+
10 Gape nna, bomorwarre le batlhokomedi ba me re ntsha madi le dijo tsa ditlhaka re ba adima. Tsweetswee, a re tlogeleng go adima ka tsadiso+ jaana.
11 Tsweetswee, mo letsatsing leno, ba busetseng masimo+ a bone, masimo a bone a mofine, dikgwa tsa bone tsa motlhware le matlo a bone, le sa bolekgolo sa madi le dijo tsa ditlhaka, beine e ntšha le leokwane le lo le batlang e le morokotso mo go bone.”
12 Foo ba re: “Re tla di ba busetsa,+ mme ga re na go kopa+ sepe mo go bone. Re tla dira fela jaaka o bua.”+ Ka jalo ka bitsa baperesiti mme ka ba ikanisa gore ba dire kafa lefokong leno.+
13 Gape, ka tlhotlhora sehuba sa me mme ka re: “Ka mokgwa ono e kete Modimo wa boammaaruri o ka tlhotlhora mo ntlong ya gagwe le mo thotong ya gagwe e a e bapetseng motho mongwe le mongwe yo o sa diragatseng lefoko leno; mme e kete a ka tlhotlhorwa ka mokgwa ono mme a sale a se na sepe.” Foo phuthego yotlhe ya re: “Amen!”+ Mme ba simolola go baka Jehofa.+ Mme batho ba dira kafa lefokong leno.+
14 Selo se sengwe: Go simolola ka letsatsi le a ntlhomileng go nna molaodi+ wa bone mo lefatsheng la Juda ka lone, go simolola mo ngwageng wa bomasome a mabedi+ go ya go wa bomasome a mararo le bobedi+ wa ga Aretaserese+ kgosi, dingwaga di le lesome le bobedi, nna le bomorwarre ga re a ka ra ja senkgwe se se tshwanetseng molaodi.+
15 Mme balaodi ba pele ba ba neng ba le teng pele ga me, ba ne ba diretse batho boima, mme ba nna ba tsaya dishekele tsa selefera di le masome a manè mo go bone letsatsi le letsatsi tsa senkgwe le beine. Gape, batlhokomedi ba bone ba ne ba gatelela batho.+ Fa e le nna, ke ne ka se ka ka dira jalo+ ka ntlha ya go boifa Modimo.+
16 Mme, mo godimo ga moo ke ne ka tsenya letsogo mo tirong ya lobota lono, mme ga re a ka ra nna le tshimo;+ mme batlhokomedi botlhe ba me ba ne ba phuthelwa mmogo koo gore ba dire.
17 Mme Bajuda le bathusi ba mmusi, banna ba le lekgolo le masome a matlhano, le ba ba tlang kwa go rona ba tswa kwa ditšhabeng tse di neng di re dikologile ba ne ba le fa tafoleng+ ya me.
18 Fa e le se se neng sa baakanngwa letsatsi le letsatsi, poo e le nngwe, dinku di le thataro tse di tlhophilweng le dinonyane ke ne ke di baakanyediwa, mme gangwe mo malatsing mangwe le mangwe a le lesome mofuta mongwe le mongwe wa beine+ e le ntsi. Mme mmogo le seno, ga ke a ka ka batla senkgwe se se tshwanelang mmusi, ka gonne tirelo mo bathong bano e ne e le boima.
19 A ko o nkgakologelwe,+ tlhe Modimo wa me, ka tsela e e molemo,+ ka ntlha ya sotlhe se ke se diretseng batho bano.+
