Jeremia 23:1-40
23 “A bo go latlhega badisa ba ba senyang le go gasamisa dinku tsa mafulo a me!”+ go bua Jehofa.
2 Ka jalo Jehofa Modimo wa Iseraele o buile jaana kgatlhanong le badisa ba ba disang batho ba me: “Lona lo gasamisitse dinku tsa me; mme lo ne lwa nna lwa di phatlalatsa, mme ga lo a di tlhokomela.”+
“Bonang, ke lebisa tlhokomelo ya me mo go lona ka ntlha ya bosula jwa ditiro tsa lona,”+ go bua Jehofa.
3 “Mme nna ke tla phutha mmogo masalela a dinku tsa me mo mafatsheng otlhe a ke neng ke di phatlalaleditse kwa go one,+ ke tla di busetsa kwa mafulong a tsone,+ ruri di tla ata di nne dintsi.+
4 Ke tla tsosa badisa mo go tsone ba ruri ba tla di disang;+ mme ga di na go tlhola di boifa, le fa e le go welwa ke letshogo lepe,+ ga go kitla go nna le epe e e seyong,” go bua Jehofa.
5 “Bonang! Metlha e etla,” go bua Jehofa, “ke tla tsosetsa Dafide letlhogela le le siameng.+ Mme ruri kgosi e tla busa+ le go dira ka botlhale le go diragatsa tshiamiso le tshiamo mo lefatsheng.+
6 Juda mo metlheng ya gagwe o tla bolokwa,+ mme Iseraele o tla aga ka polokesego.+ Mme leno ke leina la gagwe le a tla bidiwang ka lone, Jehofa ke Tshiamo ya Rona.”+
7 “Ka jalo, bonang! metlha e etla,” go bua Jehofa, “mme ga ba na go tlhola ba re, ‘Jehofa yo o ntshitseng bomorwa Iseraele kwa lefatsheng la Egepeto o a tshela,’+
8 mme ba tla re, ‘Jehofa yo o tlhatlositseng le yo o tlisitseng bana ba ntlo ya Iseraele go tswa lefatsheng la bokone le go tswa kwa mafatsheng otlhe a ke ba phatlalaleditseng kwa go one, o a tshela,’ mme ruri ba tla nna mo mmung wa bone.”+
9 Fa e le ka baporofeti, pelo ya me e thubagane mo teng ga me. Marapo a me otlhe a simolotse go roroma. Ke tshwana le monna yo o tagilweng,+ le jaaka monna yo o nonofileng yo o fentsweng ke beine, ka ntlha ya ga Jehofa le ka ntlha ya mafoko a gagwe a a boitshepo.
10 Gonne baakafadi+ ba tletse mo lefatsheng.+ Gonne lefatshe le mo khutsafalong+ ka ntlha ya phutso, mafulo a naga a omeletse;+ e bile tsela e ba dirang dilo ka yone e bosula, le thata ya bone ga e a siama.
11 “Gonne moporofeti mmogo le moperesiti ba leswafetse.+ Gape ke fitlhetse bosula jwa bone mo ntlong ya me,”+ go bua Jehofa.
12 “Ka jalo mo go bone tsela ya bone e tla nna jaaka mafelo a a boreledi+ mo letobong, a ba tla kgoromelediwang mo go one mme ba we.”+
“Gonne ke tla tlisa masetlapelo mo go bone, ngwaga wa gore ba elwe tlhoko,”+ go bua Jehofa.
13 “Mme mo baporofeting ba Samarea+ ke bone tshiamololo. Ba diretse jaaka baporofeti ba ba tlhotlhelediwang ke Baale,+ mme ba nna ba dira gore batho ba me, le eleng Iseraele, ba kgarakgatshege.+
14 Mme mo baporofeting ba Jerusalema ke bone dilo tse di maswe,+ go dira boaka+ le go tsamaya mo maakeng;+ mme ba nonotshitse diatla tsa badirabosula gore ba se ka ba boa+ mongwe le mongwe mo bosuleng jwa gagwe. Mo go nna botlhe ba fetogile go nna jaaka Sodoma,+ le banni ba gagwe jaaka Gomora.”+
15 Ka jalo Jehofa wa masomosomo o buile jaana kgatlhanong le baporofeti: “Bonang, ke dira gore ba je longana, mme ke tla ba naya metsi a a botlhole gore ba a nwe.+ Gonne mo baporofeting ba Jerusalema go dule botlhanogi+ bo tswela mo lefatsheng lotlhe.”
16 Jehofa wa masomosomo o buile jaana: “Lo se ka lwa reetsa mafoko a baporofeti ba ba lo porofetelang.+ Ba dira gore lo se ka lwa nna le mosola.+ Ba bua ponatshegelo ya pelo ya bone+—e seng go tswa mo molomong wa ga Jehofa.+
17 Ba bua kgapetsakgapetsa ba raya ba ba sa ntlotleng ba re, ‘Jehofa o buile jaana: “Lo tla nna le kagiso.”’+ Mme ba reile mongwe le mongwe yo o tsamayang mo bologwading jwa pelo ya gagwe+ ba re, ‘Ga lo na go tlelwa ke masetlapelo ape.’+
18 Gonne ke mang yo o emeng mo setlhopheng se se atamalaneng thata+ sa ga Jehofa gore a tle a bone a bo a utlwe lefoko la gagwe?+ Ke mang yo o etseng lefoko la gagwe tlhoko gore a tle a le utlwe?+
19 Bonang! Sefefo sa ga Jehofa, tšararego ka boyone, eleruri e tla tswa, le setsuatsue se se itshokeletsang.+ Se tla itshokeletsa mo tlhogong ya ba ba boikepo.+
20 Bogale jwa ga Jehofa ga bo na go boela morago+ go fitlha fa a tla bo a diragaditse le go fitlha fa a tla bo a dirile gore dikgopolo tsa pelo ya gagwe di diragale.+ Go ela kwa bokhutlong jwa metlha lo tla akanyetsa seno ka tlhaloganyo.+
21 “Ga ke a ka ka roma baporofeti, mme bone ba ne ba taboga. Ga ke a ka ka bua le bone, mme bone ba ne ba porofeta.+
22 Mme fa ba ka bo ba eme mo setlhopheng sa me se se atamalaneng thata,+ ba ka bo ba dirile gore batho ba me ba utlwe mafoko a me, mme ba ka bo ba dirile gore ba boele morago mo tseleng ya bone e e bosula le mo bosuleng jwa ditiro tsa bone.”+
23 “A nna ke Modimo yo o gaufi,” go bua Jehofa, “e seng Modimo yo o kgakala?”+
24 “Kgotsa a motho le fa e le ope o ka subiwa mo mafelong a go itshuba mme nna ka se ka ka mmona?”+ go bua Jehofa.
“A ga se nna ke tlatsang magodimo le lefatshe?”+ go bua Jehofa.
25 “Ke utlwile se baporofeti ba ba porofetang maaka mo leineng la me+ ba se buileng, ba re, ‘Ke lorile! Ke lorile!’+
26 Go tla nna ka lobaka lo lo kae mo pelong ya baporofeti ba ba porofetang maaka e bile e le baporofeti ba tsietso ya pelo ya bone?+
27 Ba akanya go lebatsa batho ba me leina la me ka ditoro tsa bone tse ba nnang ba di bolelelana,+ fela jaaka borraabone ba ne ba lebala leina la me ka Baale.+
28 Moporofeti yo o nang le toro, a a bolele toro; mme yo o nang le lefoko la me, a a bue lefoko la me ka boammaaruri.”+
“Lotlhaka lo amana jang le dijo tsa ditlhaka?”+ go bua Jehofa.
29 “A lefoko la me ga le ka tsela e e tshwanang le molelo,”+ go bua Jehofa, “le jaaka noto ya go thula e e thubaganyang lefika le legolo?”+
30 “Ka jalo bonang, ke kgatlhanong le baporofeti,”+ go bua Jehofa, “ba ba utswang mafoko a me, mongwe le mongwe mo molekaneng wa gagwe.”+
31 “Bonang, ke kgatlhanong le baporofeti,” go bua Jehofa, “ba ba dirisang loleme lwa bone gore ba bue ba re, ‘Lefoko!’”+
32 “Bonang, ke kgatlhanong le baporofeti ba ditoro tsa maaka,” go bua Jehofa, “ba ba di bolelang le ba ba dirang gore batho ba me ba kgarakgatshege ka ntlha ya maaka+ a bone le ka ntlha ya go ipelafatsa ga bone.”+
“Mme nna ga ke a ba roma le fa e le go ba laela. Ka jalo ga ba na go tswela batho bano mosola ka tsela epe,”+ go bua Jehofa.
33 “Mme fa batho bano kgotsa moporofeti kgotsa moperesiti a go botsa, a re, ‘Mokgweleo wa ga Jehofa ke eng?’+ o ba reye o re, ‘“Lona batho—A bo lo le mokgweleo jang ne!+ Mme ruri ke tla lo tlogela,”+ go bua Jehofa.’
34 Fa e le moporofeti kgotsa moperesiti kgotsa batho ba ba reng, ‘Mokgweleo wa ga Jehofa!’ Le nna ke tla lebisa tlhokomelo ya me kwa mothong yoo le kwa go ba ntlo ya gagwe.+
35 Mongwe le mongwe wa lona o nna a raya mongwe ka ene le mongwe le mongwe a raya morwarraagwe a re, ‘Jehofa o arabile jang? Le gone Jehofa o buile eng?’+
36 Mme mokgweleo+ wa ga Jehofa lo se ka lwa tlhola lo o umaka,+ gonne mo go mongwe le mongwe mokgweleo ka boone o nna lefoko la gagwe,+ mme lo fetotse mafoko a Modimo yo o tshelang,+ Jehofa wa masomosomo, Modimo wa rona.
37 “O tla raya moporofeti o re, ‘Jehofa o go neile karabo efe? Le gone Jehofa o buile eng?+
38 Mme fa e le gore lo nna lo re “Mokgweleo wa ga Jehofa!” he Jehofa o buile jaana: “Ka ntlha ya gore lo rile, ‘Lefoko leno ke one mokgweleo wa ga Jehofa,’ fa ke ne ke ntse ke roma kwa go lona, ke re, ‘Lo se ka lwa re: “Mokgweleo wa ga Jehofa!”’
39 ka jalo ke fano! Mme ke tla lo tlhokomologa tota,+ ke tla lo latlha le motse o ke o neileng lona le borraalonamogologolwane—ke lo ntsha fa pele ga me.+
40 Mme ke tla baya kgobo mo go lona ka bosakhutleng le go tlhabisiwa ditlhong ka bosakhutleng, tse di se kitlang di lebalwa.”’”+
