Dipalo 34:1-29
34 Mme Jehofa a tswelela a bua le Moshe a re:
2 “Laela bomorwa Iseraele, o ba reye o re, ‘Lo tsena mo lefatsheng la Kanana.+ Leno ke lefatshe le le tla welang kafa go lona ka boswa,+ lefatshe la Kanana kafa melelwaneng ya lone.+
3 “‘Mme letlhakore la lona la borwa le simolole kwa nageng ya Tsine go bapa le Edoma, mme molelwane wa lona wa borwa o simolole kwa ntlheng ya Lewatle la Letswai+ kafa botlhaba.
4 Mme molelwane wa lona o fetole tsela go tswa kwa borwa jwa botlhatlogo jwa Akarabime+ o kgabaganyetse kwa Tsine, mme o felele kwa borwa jwa Kadeshe-barenea;+ mme o tswele kwa Hasare-adare o bo o kgabaganyetsa kwa Asemone.
5 Mme molelwane o fetole tsela kwa Asemone o ye kwa mokgatšheng o o phothoselang wa Egepeto, mme o felele kwa Lewatleng.+
6 “‘Mme molelwane wa lona o o kwa bophirima, e nne Lewatle le Legolo le losi. Ono e tla nna molelwane wa lona o o kwa bophirima.
7 “‘Jaanong ono e tla nna molelwane wa lona o o kwa bokone: Go tswa kwa Lewatleng le Legolo lo tla tshwaya go fitlha kwa Thabeng ya Hore+ jaaka molelwane wa lona.
8 Go tswa kwa Thabeng ya Hore lo tla tshwaya molelwane go fitlha kwa botsenong jwa Hamathe,+ mme molelwane o felele kwa Sedade.+
9 Mme molelwane o tswele kwa Siferone, mme o felele kwa Hasare-enane.+ Ono e tla nna molelwane wa lona wa bokone.
10 “‘Morago ga moo lo itshwaele molelwane wa lona kafa botlhaba go simolola kwa Hasare-enane go fitlha kwa Shefame.
11 Mme molelwane o fologe go tswa kwa Shefame go fitlha kwa Ribela kafa botlhaba jwa Aine, mme molelwane o fologe o fitlhe fa mokgokoloseng o o kafa botlhaba wa lewatle la Kinerethe.+
12 Mme molelwane o fologele kwa Joredane, mme o felele kwa Lewatleng la Letswai. Leno e tla nna lefatshe la lona+ kafa melelwaneng ya lone mo tikologong yotlhe.’”
13 Ka jalo Moshe a laola bomorwa Iseraele a re: “Leno ke lefatshe le lo tla le ikgaoganyetsang ka bola+ go nna thuo, fela jaaka Jehofa a laetse go le naya ditso di le robongwe le sephatlo.
14 Gonne lotso lwa bomorwa Barubene ka ntlo ya borraabone le lotso lwa bomorwa Bagada ka ntlo ya borraabone lo setse lo tsere, le sephatlo sa lotso lwa ga Manase se setse se tsere boswa+ jwa sone.
15 Ditso tse pedi le sephatlo di setse di tsere boswa jwa tsone go tswa kwa kgaolong ya Joredane fa thoko ga Jeriko kafa botlhaba go ela kafa botlhabatsatsi.”+
16 Mme Jehofa a tswelela a bua le Moshe a re:
17 “Ano ke maina a banna ba ba tla lo arolelang lefatshe gore e nne thuo, moperesiti Eliasare+ le Joshua morwa Nune.+
18 Mme lo tseye kgosana e le nngwe mo lotsong longwe le longwe gore e arole lefatshe go nna thuo.+
19 Mme ano ke maina a banna bao: Wa lotso lwa ga Juda, Kalebe morwa Jefune;+
20 le wa lotso lwa bomorwa Simeone, Shemuele morwa Amihude;
21 wa lotso lwa ga Benjamine, Elidade morwa Kiselone;
22 le wa lotso lwa bomorwa Dana, kgosana e bong Buki morwa Jogeli;
23 wa bomorwa Josefa,+ wa lotso lwa bomorwa Manase, kgosana e bong Haniele morwa Efode;
24 le wa lotso lwa bomorwa Eferaime, kgosana e bong Kemuele morwa Shifetane;
25 le wa lotso lwa bomorwa Sebulone, kgosana e bong Elisafane morwa Paranake;
26 le wa lotso lwa bomorwa Isakare, kgosana e bong Palatiele morwa Asane;
27 le wa lotso lwa bomorwa Ashera, kgosana e bong Ahihude morwa Shelomi;
28 le wa lotso lwa bomorwa Nafetali, kgosana e bong Pedahele morwa Amihude.”
29 Bano ke bone ba Jehofa a neng a ba laela gore ba dire bomorwa Iseraele beng ba naga mo lefatsheng la Kanana.+
