Dipalo 21:1-35
21 Jaanong Mokanana mongwe e bong kgosi ya Arada,+ yo o neng a nna kwa Negebe,+ a utlwa gore Iseraele e ne e tlile ka tsela ya Atharime, mme a simolola go lwa le Iseraele a ba a gapa bangwe ba yone jaaka batshwarwa.
2 Ka gone Iseraele ya ikanela Jehofa ya re:+ “Ruri fa o ka tsenya batho bano mo seatleng sa me, ruri le nna ke tla senya metse ya bone.”+
3 Ka jalo Jehofa a reetsa lentswe la Iseraele mme a e neela Bakanana; mme ya ba senya mmogo le metse ya bone. Ke gone ka moo ba neng ba raya lefelo leo leina ba re Horema.+
4 Fa ba ne ba tswelela go sepela go tswa kwa Thabeng ya Hore+ ka tsela ya Lewatle le Lehibidu gore ba tsamaye go dikologa lefatshe la Edoma,+ moya wa batho wa simolola go lapa ka ntlha ya tsela.
5 Mme batho ba nna ba bua kgatlhanong le Modimo+ le Moshe+ ba re: “Ke ka ntlha yang fa lo re ntshitse kwa Egepeto gore re tle go swela mo nageng?+ Gonne ga go na senkgwe e bile ga go na metsi,+ mme moya wa rona o ila senkgwe seno se se nyatsegang.”+
6 Ka jalo Jehofa a romela dinoga tse di nang le botlhole+ mo bathong, mme tsa nna tsa loma batho, mo go neng ga swa batho ba le bantsi ba Iseraele.+
7 La bofelo batho ba tla kwa go Moshe ba re: “Re leofile,+ ka gonne re buile kgatlhanong le Jehofa le wena. Re buelele mo go Jehofa gore a tlose dinoga mo go rona.”+ Mme Moshe a buelela batho.+
8 Foo Jehofa a raya Moshe a re: “Itirele noga e e botlhole jo e keteng molelo o bo o e baya mo koteng ya sesupo. Mme go tla diragala gore fa ope a lomilwe, a lebe kwa go yone mme a nne a ntse a tshela.”+
9 Moshe a akofa a dira noga ya kgotlho+ a bo a e baya mo koteng+ ya sesupo; mme go ne go diragala gore fa noga e ne e lomile motho a bo a tlhoma noga ya kgotlho matlho,+ foo o ne a nna a ntse a tshela.+
10 Morago ga moo bomorwa Iseraele ba bolola mme ba thibelela mo Obothe.+
11 Morago ga moo ba bolola mo Obothe mme ba thibelela mo Aye-abarime,+ mo nageng e e elang kwa pele ga Moabe, go ela kwa botlhabatsatsi.
12 Go tswa koo ba bolola mme ba thibelela fa mokgatšheng o o phothoselang wa Serada.+
13 Go tswa koo ba bolola mme ba thibelela mo kgaolong ya Arenone,+ e e mo nageng e e simololang mo molelwaneng wa Baamore; gonne Arenone ke molelwane wa Moabe, fa gare ga Moabe le Baamore.
14 Ke gone ka moo go buiwang jaana mo bukeng ya Dintwa tsa ga Jehofa:
“Fahebe mo Sufahe le mekgatšha e e phothoselang ya Arenone,
15 le bokgwelo jwa mekgatšha e e phothoselang, jo bo obegetseng kafa bonnong jwa Ara+ e bile bo ikaegile ka molelwane wa Moabe.”
16 Go tswa koo ba ya kwa Bere.+ Seno ke sediba se Jehofa a neng a raya Moshe kaga sone a re: “Phutha batho, mme mma ke ba neye metsi.”+
17 Ka nako eo Iseraele ya opela pina eno:+“Biloga wena sediba! Se arabeng ka pina lona batho!
18 Sediba, dikgosana di ne tsa se epa. Se ne sa epiwa ke batlotlegi ba batho,Ka lore lwa molaodi,+ ka dinthe tsa bone.”
Morago ga moo ba tswa mo nageng ba ya kwa Matana.
19 Go tswa Matana ba ya kwa Nahaliele, go tswa Nahaliele ba ya kwa Bamothe.
20 Mme go tswa Bamothe ba ya kwa mokgatšheng o o mo nageng ya Moabe,+ kwa tlhogong ya Pisega,+ mme e ntsha tlhogo go okama Jeshimone.+
21 Jaanong Iseraele ya romela barongwa kwa go Sihone+ kgosi ya Baamore, e re:
22 “Mma ke ralale lefatshe la gago. Ga re kitla re fapogela mo tshimong kgotsa mo tshimong ya mofine. Ga re kitla re nwa metsi a sediba sepe. Re tla gwanta mo tseleng ya kgosi go fitlha re ralala karolo ya gago ya naga.”+
23 Mme Sihone a se ka a letlelela Iseraele go ralala karolo ya gagwe ya naga,+ mme Sihone a phutha batho botlhe ba gagwe mme a tswa a ya go kgatlhantsha Iseraele kwa nageng, a goroga mo Jahase+ mme a simolola go tlhabana le Iseraele.
24 Foo Iseraele ya mo kgemetha ka bogale jwa tšhaka+ ya rua lefatshe+ la gagwe go tswa Arenone+ go fitlha kwa Jaboke,+ gaufi le bomorwa Amona; ka gonne Jasere+ ke molelwane wa bomorwa Amona.
25 Ka jalo Iseraele ya tsaya metse eno yotlhe, mme Iseraele ya simolola go nna mo metseng yotlhe ya Baamore,+ kwa Heshebone+ le metse yotlhe e e kafa tlase ga gagwe.
26 Gonne Heshebone e ne e le motse wa ga Sihone.+ E ne e le kgosi ya Baamore,+ e bile e ne e le ene yo o neng a tlhabana le kgosi ya Moabe pele a ba a tsaya lefatshe lotlhe la yone mo seatleng sa yone go fitlha kwa Arenone.+
27 Ke gone ka moo babui ba dipuo tsa tshotlo ba neng ba tle ba re:“Tla mo Heshebone.A motse wa Sihone o agiwe o bo o supege o tlhomilwe ka nitamo.
28 Gonne molelo o dule kwa Heshebone,+ kgabo ya molelo kwa motseng wa Sihone.O laitse Ara+ wa Moabe, beng ba mafelo a a kwa godimo a Arenone.
29 A bo go latlhega wena Moabe! Ruri lo tla nyelela, lona batho ba Kemoshe!+Ruri o tla naya kgosi ya Baamore e bong Sihone bomorwawe jaaka bafalodi le bomorwadie kwa botshwarwa.
30 Ka jalo a re ba huleng.Ruri Heshebone o tla nyelela go fitlha kwa Dibone,+Le basadi go fitlha kwa Nofa, banna go fitlha kwa Medeba.”
31 Mme Iseraele ya simolola go nna mo lefatsheng la Baamore.+
32 Foo Moshe a roma bangwe go ya go tlhola Jasere.+ Ka jalo ba thopa metse e e kafa tlase ga gagwe ba bo ba gapela Baamore ba ba neng ba le koo thuo ya bone.+
33 Morago ga moo ba retologa ba tlhatloga ka tsela ya Bashana.+ Foo Oge+ kgosi ya Bashana a tswa a tla go ba kgatlhantsha, ene le batho botlhe ba gagwe, kwa tlhabanong ya Ederei.+
34 Jaanong Jehofa a raya Moshe a re: “O se ka wa mmoifa,+ gonne ruri ke tla mo tsenya mo seatleng sa gago le batho botlhe ba gagwe le lefatshe+ la gagwe; mme o mo dire fela jaaka o dirile Sihone, kgosi ya Baamore, yo o neng a nna kwa Heshebone.”+
35 Ka jalo ba mo kgemetha le bomorwawe le batho botlhe ba gagwe, go fitlha a se na mofalodi ope yo o setseng;+ mme ba rua lefatshe la gagwe.
