Dipalo 2:1-34
2 Jaanong Jehofa a bua le Moshe le Arone a re:
2 “Bomorwa Iseraele ba thibelele, motho mongwe le mongwe fa lekgamung+ la gagwe la ditso tse tharo, fa matshwaong a ntlo ya borraabone. Ba thibelele go dikologa fa pele ga mogope wa bokopanelo.
3 “Mme ba ba thibelelang ntlheng ya botlhaba go ela kwa botlhabatsatsi e tla nna lekgamu la ditso tse tharo la bothibelelo jwa ga Juda ka masomo a bone, mme kgosana ya bomorwa Juda ke Nashone+ morwa Aminadabe.
4 Mme lesomo la gagwe la ba ba kwadisitsweng ba lone ba dikete di le masome a supa le bonè le makgolo a le marataro.+
5 Mme ba ba thibelelang fa thoko ga gagwe e tla nna lotso lwa ga Isakare,+ mme kgosana ya bomorwa Isakare ke Nethanele+ morwa Suare.
6 Lesomo la gagwe le ba gagwe ba ba kwadisitsweng ba dikete di le masome a matlhano le bonè le makgolo a le manè.+
7 Le lotso lwa ga Sebulone; mme kgosana ya bomorwa Sebulone ke Eliabe+ morwa Helone.
8 Lesomo la gagwe le ba ba kwadisitsweng ba gagwe ba dikete di le masome a matlhano le bosupa le makgolo a le manè.+
9 “Botlhe ba ba kwadisitsweng ba bothibelelo jwa Juda ba dikete di le lekgolo masome a le robedi le borataro le makgolo a le manè mo masomong a bone. E nne ba ntlha+ go bolola.
10 “Lekgamu la ditso tse tharo la bothibelelo jwa ga Rubene+ le tla bo le le ntlheng ya borwa ka masomo a lone, mme kgosana ya bomorwa Rubene ke Elisure+ morwa Shedeure.
11 Lesomo la gagwe le ba ba kwadisitsweng ba gagwe ke ba le dikete di le masome a manè le borataro le makgolo a le matlhano.+
12 Mme ba ba thibelelang fa thoko ga gagwe e tla nna lotso lwa ga Simeone, mme kgosana ya bomorwa Simeone ke Shelumiele+ morwa Surishadai.
13 Lesomo la gagwe le ba ba kwadisitsweng ba bone ba dikete di le masome a matlhano le borobongwe le makgolo a le mararo.+
14 Le lotso lwa ga Gada; mme kgosana ya bomorwa Gada ke Eliasafe+ morwa Reuele.
15 Lesomo la gagwe le ba ba kwadisitsweng ba bone ba dikete di le masome a manè le botlhano le makgolo a le marataro le masome a matlhano.+
16 “Botlhe ba ba kwadisitsweng ba bothibelelo jwa ga Rubene ba dikete di le lekgolo le masome a matlhano le bongwe makgolo a le manè le masome a matlhano ka masomo a bone, mme e nne ba bobedi+ go bolola.
17 “Fa mogope wa bokopanelo+ o tshwanetse gore o bolole, bothibelelo jwa Balefi+ bo tla bo bo le fa gare ga mathibelelo.
“Tsela e ba tshwanetseng go thibelela ka yone, ba bolole ka yone,+ mongwe le mongwe kwa lefelong la gagwe, kafa makgamung a bone a ditso tse tharo.
18 “Lekgamu la ditso tse tharo la bothibelelo jwa ga Eferaime+ ka masomo a lone le tla bo le le ntlheng ya bophirima, mme kgosana ya bomorwa Eferaime ke Elishama+ morwa Amihude.
19 Lesomo la gagwe le ba ba kwadisitsweng ba bone ba dikete di le masome a le manè le makgolo a le matlhano.+
20 Mme fa thoko ga gagwe e tla nna lotso lwa ga Manase,+ mme kgosana ya bomorwa Manase ke Gamaliele+ morwa Pedasure.
21 Lesomo la gagwe le ba ba kwadisitsweng ba bone ba dikete di le masome a mararo le bobedi le makgolo a mabedi.+
22 Le lotso lwa ga Benjamine;+ mme kgosana ya bomorwa Benjamine ke Abidane+ morwa Gideoni.
23 Lesomo la gagwe le ba ba kwadisitsweng ba bone ba dikete di le masome a mararo le botlhano le makgolo a le manè.+
24 “Botlhe ba ba kwadisitsweng ba bothibelelo jwa ga Eferaime ba dikete di le lekgolo le borobedi le lekgolo ka masomo a bone, mme e nne ba boraro+ go bolola.
25 “Lekgamu la ditso tse tharo la bothibelelo jwa ga Dana le tla bo le le ntlheng ya bokone ka masomo a lone, mme kgosana ya bomorwa Dana ke Ahiesere+ morwa Amishadai.
26 Lesomo la gagwe le ba ba kwadisitsweng ba bone ba dikete di le masome a marataro le bobedi le makgolo a le supa.+
27 Mme ba ba thibelelang fa thoko ga gagwe e tla nna lotso lwa ga Ashera, mme kgosana ya bomorwa Ashera ke Pagiele+ morwa Okerane.
28 Lesomo la gagwe le ba ba kwadisitsweng ba bone ba dikete di le masome a manè le bongwe le makgolo a le matlhano.+
29 Le lotso lwa ga Nafetali;+ mme kgosana ya bomorwa Nafetali ke Ahira+ morwa Enane.
30 Lesomo la gagwe le ba ba kwadisitsweng ba bone ba dikete di le masome a matlhano le boraro le makgolo a le manè.+
31 “Botlhe ba ba kwadisitsweng ba bothibelelo jwa ga Dana ba dikete di le lekgolo masome a matlhano le bosupa le makgolo a le marataro. E nne ba bofelo go bolola+—kafa makgamung a bone a ditso tse tharo.”
32 Bano e ne e le ba ba kwadisitsweng ba bomorwa Iseraele kafa ntlong ya borraabone; botlhe ba ba kwadisitsweng ba mathibelelo ka masomo a bone ba ne ba le dikete di le makgolo a le marataro le boraro le makgolo a le matlhano le masome a matlhano.+
33 Mme Balefi ba ne ba se ka ba kwadisiwa+ mo gare ga bomorwa Iseraele, fela jaaka Jehofa a ne a laetse Moshe.
34 Bomorwa Iseraele ba dira kafa go sotlhe se Jehofa a neng a se laetse Moshe.+ Ke tsela e ba neng ba thibelela ka yone ka makgamu+ a bone a ditso tse tharo, e bile ke tsela e ba neng ba bolola+ ka yone, mongwe le mongwe mo malapeng a gagabo malebana le ntlo ya borraagwe.
