Dipalo 17:1-13
17 Jaanong Jehofa a bua le Moshe a re:
2 “Bua le bomorwa Iseraele mme o tseye thobane+ e le nngwe mo go bone ya ba ntlo nngwe le nngwe ya ga rre mo dikgosaneng tsotlhe tsa bone,+ ka ntlo ya borraabone, dithobane di le lesome le bobedi. O kwale leina la mongwe le mongwe wa bone mo thobaneng ya gagwe.
3 Mme o kwale leina la ga Arone mo thobaneng ya ga Lefi, ka gonne go na le thobane e le nngwe ya tlhogo ya ntlo ya borraabone.
4 Mme o di beye mo mogopeng wa bokopanelo fa pele ga Tshupo,+ kwa ke itlhagisang mo go lona gone ka metlha.+
5 Mme se se tla diragalang ke gore motho yo ke tla mo tlhophang,+ thobane ya gagwe e tla kukunya, mme ruri ke tla dira gore dingongorego+ tsa bomorwa Iseraele kgatlhanong le nna di kokobele, tse ba di ngongoregang kgatlhanong le lona.”+
6 Ka jalo Moshe a bua le bomorwa Iseraele, mme dikgosana tsotlhe tsa bone tsa mo naya thobane ya kgosana nngwe le nngwe, thobane ya kgosana nngwe le nngwe, ka ntlo ya borraabone, dithobane di le lesome le bobedi;+ mme thobane ya ga Arone e ne e le mo gare ga dithobane tsa bone.+
7 Foo Moshe a baya dithobane fa pele ga ga Jehofa mo mogopeng wa Tshupo.+
8 Mme ga diragala mo letsatsing le le latelang gore fa Moshe a tsena mo mogopeng wa Tshupo, bona! thobane ya ga Arone ya ntlo ya ga Lefi e ne e kukuntse, e ntsha makukunya le dithunya tse di thunyang e bile e ungwa dithamane tse di buduleng.
9 Foo Moshe a ntsha dithobane tsotlhe fa pele ga ga Jehofa a di isa kwa go bomorwa Iseraele botlhe, mme ba ya go leba, monna mongwe le mongwe a tsaya thobane ya gagwe.
10 Morago ga moo Jehofa a raya Moshe a re: “Busetsa thobane ya ga Arone+ fa pele ga Tshupo jaaka selo se se tshwanetseng go bewa gore e nne sesupo+ mo go bomorwa botsuolodi,+ gore dingongorego tsa bone di tle di fele kgatlhanong le nna, gore ba se ka ba swa.”
11 Moshe a akofa a dira fela jaaka Jehofa a ne a mo laetse. A dira fela jalo.
12 Mme bomorwa Iseraele ba raya Moshe ba re: “Jaanong ruri re tlile go swa, re tlile go nyelela, rotlhe re tlile go nyelela.+
13 Ope yo o tlang gaufi,+ yo o atamelang motlaagana wa ga Jehofa, o tla swa!+ A re tshwanetse go feleletsa re fedile ka tsela eo?”+
