Bahebera 8:1-13
8 Jaanong ka ga dilo tse go tlotlwang ka tsone ntlha ya konokono ke eno: Re na le moperesiti yo mogolo+ yo o ntseng jaaka yono, mme o ntse kafa seatleng sa moja sa setulo sa bogosi sa Ene Yo o Tlotlometseng kwa magodimong,+
2 motlhanka mo lefelong le le boitshepo+ le wa mogope wa boammaaruri, o Jehofa+ a o tlhomileng, e seng motho.+
3 Gonne moperesiti yo mogolo mongwe le mongwe o tlhomelwa gore a ise dimpho le ditlhabelo+ tshupelo; ka jalo go ne go tlhokega gore yono le ene a nne le sengwe se a se isang tshupelo.+
4 Jaanong, fa a ne a le mo lefatsheng, a ka bo a se moperesiti,+ e re ka go na le banna ba ba isang dimpho tshupelo go ya ka Molao,
5 mme e le banna ba ba dirang tirelo e e boitshepo ka setshwano se se tshwanang tota+ e bile e le moriti+ wa dilo tsa selegodimo; fela jaaka Moshe, fa a ne a tloga a konela mogope,+ a ne a newa taelo ya bomodimo:+ Gonne a re: “Tlhokomela gore o dire dilo tsotlhe kafa sebopegong sa tsone se o neng wa se bontshiwa mo thabeng.”+
6 Mme jaanong Jesu o bone tirelo e e molemolemo, mo e leng gore gape ke motsereganyi+ wa kgolagano+ e e botoka ka tsela e e tshwanang, e e tlhomamisitsweng semolao mo ditsholofetsong tse di botoka.+
7 Gonne fa kgolagano eo ya ntlha e ne e se na phoso, ya bobedi e ka bo e sa senkelwa sebaka;+
8 gonne ruri o bona batho molato fa a re: “‘Bona! Metlha e etla,’ go bua Jehofa, ‘mme ke tla dira kgolagano e ntšha+ le ntlo ya Iseraele le ntlo ya Juda;
9 e seng kafa kgolaganong+ e ke neng ka e dira le borraabonemogologolwane mo letsatsing le ka lone ke neng ka ba tshwara ka seatla go ba ntsha mo lefatsheng la Egepeto,+ ka gonne ba ne ba se ka ba nna mo kgolaganong ya me,+ mo e leng gore ke ne ka lesa go ba tlhokomela,’ go bua Jehofa.”+
10 “‘Gonne eno ke kgolagano e ke tla golaganang le ntlo ya Iseraele ka yone morago ga malatsi ao,’ go bua Jehofa. ‘Ruri ke tla tsenya melao ya me mo mogopolong wa bone, e bile ke tla e kwala mo dipelong tsa bone.+ Mme ke tla nna Modimo wa bone,+ mme bone ka bobone ba tla nna batho ba me.+
11 “‘Mme ga ba kitla mongwe le mongwe a ruta moagimmogo le ene ka gope le mongwe le mongwe morwarraagwe, a re: “Itse Jehofa!”+ Gonne botlhe ba tla nkitse,+ go tloga ka yo mmotlana go ya go yo mogolo wa bone.
12 Gonne ke tla utlwela ditiro tse di sa siamang tsa bone botlhoko, mme ga ke kitla ke tlhola ke gakologelwa maleo a bone+ ka gope.’”+
13 Fa a re “kgolagano e ntšha,” o dirile gore ya pele e se ka ya tlhola e dira.+ Jaanong se se dirilweng gore se se ka sa tlhola se dira e bile se le segologolo se gaufi le go nyelela.+
