Bahebera 7:1-28
7 Gonne Melekisedeke yono, e bong kgosi ya Salema, moperesiti wa Modimo Mogodimodimo,+ yo o neng a kgatlhantsha Aborahame a boa kwa polaong ya dikgosi a ba a mo segofatsa+
2 e bile e le yo Aborahame a neng a mo abela sa bosome mo dilong tsotlhe,+ santlhantlha, fa go ranolwa, ke “Kgosi ya Tshiamo,” mme go tswa foo gape ke kgosi ya Salema,+ ke gore, “Kgosi ya Kagiso.”
3 E re ka a se na rre, a se na mmè, a sa balelwe mo tlhatlhamanong epe ya losika, a se na tshimologo ya malatsi+ le fa e le bokhutlo jwa botshelo, mme a dirilwe jaaka Morwa Modimo,+ o nnela moperesiti ruriruri.+
4 Jaanong, bonang ka moo monna yono a neng a le mogolo ka gone yo Aborahame, e bong tlhogo ya lotso, a neng a mo naya sa bosome mo dithopong tsa botlhokwa.+
5 Ke boammaaruri, banna ba ba tswang mo go bomorwa Lefi+ ba ba amogelang tiro ya bone ya boperesiti ba na le taolo ya go phutha ditsabosome+ mo bathong+ go ya ka Molao, ke gore, mo go bomorwarraabone, le eleng fa bano ba dule mo lothekeng lwa ga Aborahame;+
6 mme motho yo o neng a sa latedise tlhatlhamano ya masika a gagwe+ go tswa mo go bone o ne a tsaya ditsabosome mo go Aborahame+ a ba a segofatsa yo o neng a na le ditsholofetso.+
7 Jaanong kwantle ga kganetsano epe, yo mmotlana o segofadiwa ke yo mogolo.+
8 Mme mo ntlheng nngwe ke batho ba ba swang ba ba amogelang ditsabosome,+ mme mo ntlheng e nngwe ke motho yo go newang bosupi ka ene gore o a tshela.+
9 Mme, fa ke ka dirisa polelwana eno, le eleng Lefi yo o amogelang ditsabosome o ntshitse ditsabosome ka Aborahame,
10 gonne o ne a santse a le mo lothekeng+ lwa ga rraagwemogologolwane fa Melekisedeke a ne a mo+ kgatlhantsha.
11 Jaanong, fa e le gore tota boitekanelo+ bo ne bo le ka boperesiti jwa Balefi,+ (gonne batho ba ne ba newa Molao+ ka jone e le selo sa konokono,) go ne go tla bo go na le tlhokego efe e nngwe+ ya gore go eme moperesiti yo mongwe kafa mokgweng wa ga Melekisedeke+ mme go sa twe kafa mokgweng wa ga Arone?
12 Gonne e re ka boperesiti bo fetolwa,+ molao le one o tlhoka go fetolwa.+
13 Gonne monna yo dilo tseno di buiwang mabapi le ene o ne a le leloko la lotso lo longwe,+ lo go se nang ope go tswa mo go lone yo o diretseng kwa sebesong.+
14 Gonne go bonala sentle gore Morena wa rona o tlhagile mo Juda,+ lotso lo Moshe a sa buang sepe ka lone ka baperesiti.
15 Mme go sa ntse go phepafetse thata gore go tshwana le Melekisedeke+ go ema moperesiti+ yo mongwe,
16 yo jaanong a leng moperesiti, e seng go ya ka molao wa taolo e e ikaegileng ka nama,+ mme go ya ka maatla a botshelo jo bo ka se kang jwa senngwa,+
17 gonne fa go supelwa ga twe: “O moperesiti ka bosaengkae kafa mokgweng wa ga Melekisedeke.”+
18 Jaanong, eleruri taelo ya pele e beelwa kwa thoko ka ntlha ya bokoa+ le go tlhoka mosola ga yone.+
19 Gonne Molao ga o a itekanedisa sepe,+ mme go tlisiwa ga tsholofelo+ e e botoka mo godimo ga one, e re atamelang gaufi le Modimo+ ka yone go ne ga dira jalo.
20 Gape, go ya bokgakaleng jwa gore e ne e se kwantle ga ikano,
21 (gonne eleruri go na le banna ba ba nnileng baperesiti kwantle ga ikano, mme go na le yo o nang le ikano e e neng ya dirwa ke Yo o neng a bua jaana ka ene: “Jehofa o ikanne+ a re (mme ga a na go ikutlwa a ikwatlhaya), ‘O moperesiti ka bosaengkae,’”)+
22 go ya bokgakaleng joo gape Jesu jaanong ke yo o neilweng e le tlhomamisetso ya kgolagano e e botoka.+
23 Go feta moo, ba le bantsi ba ne ba tshwanela go nna baperesiti ka go tlhatlhamana+ ka ntlha ya go idiwa ke loso+ gore ba tswelele e le bone,
24 mme ene ka ntlha ya go tswelela a tshela ka bosaengkae+ boperesiti jwa gagwe ga bo na batlhatlhami bape.
25 Ke gone ka moo gape a kgonang go boloka ka botlalo ba ba atamelang Modimo ka ene, ka gonne ka metlha o a tshela gore a tle a ba rapelele.+
26 Gonne moperesiti yo mogolo yo o ntseng jaaka yono o ne a re tshwanela,+ a ikanyega,+ a se na boferefere,+ a sa leswafala,+ a lomologane le baleofi,+ a le kwa godimo go feta magodimo.+
27 Ga a tlhoke go ntsha ditlhabelo letsatsi le letsatsi,+ jaaka baperesiti ba bagolo bao ba dira, a ntshetsa maleo a gagwe+ pele mme go tswa foo a ntshetsa a batho:+ (gonne seno o ne a se dira gangwe+ fela fa a ne a intsha setlhabelo;+)
28 gonne Molao o tlhoma banna ba ba nang le makoa+ go nna baperesiti ba bagolo,+ mme lefoko la ikano e e ikanetsweng+ e e neng ya tla morago ga Molao le tlhoma Morwa, yo o itekanedisitsweng+ ka bosaengkae.
