•  Itlhatlhobe

•  Goreng ke tlhoka go bolelelwa gore go na le sengwe se ke sa se direng sentle?

•  Nka amogela jang kgakololo?

•  Se balekane ba gago ba se buang

 Ka dinako dingwe rotlhe re tlhoka kgakololo ya gore re ka tokafatsa jang dilo tse re di dirang kgotsa tsela e re itshwarang ka yone. Ela tlhoko dikai tse di latelang.

1.  ● Morutabana wa gago o go bolelela gore ga o a tseela porojeke ya gago matsapa. A re: “O tlhoka go ipha nako fa o dira dipatlisiso.”

    O tla dira eng fa o neelwa kgakololo eno?

   1.   O a e gana. (‘Morutabana ga a nthate.’)

   2.   O a e amogela. (‘Ke tla dirisa kgakololo eno mo porojekeng e e latelang.’)

2.  ● Motsadi wa gago o go bolelela gore kamore ya gago e tlhakatlhakane, le fa gone o fetsa go e phepafatsa.

    O tla dira eng fa o newa kgakololo eno?

   1.   O a e gana. (‘Ga a ke a kgotsofala.’)

   2.   O a e amogela. (‘Tota nkabo ke dirile botoka.’)

3.  ● Monnao o go bolelela gore ga a itumelele gore o rata go mo laola.

    O tla dira eng fa o newa kgakololo eno?

   1.   O a e gana. (‘E le gore o akanya gore ke mang ene?’)

   2.   O a e amogela. (‘Gongwe nka leka go bua le ene sentle.’)

 Basha bangwe ba a ngala fa ba newa kgakololo, le fa e le nnye. A le wena o ntse jalo? Fa go le jalo, o fetiwa ke sengwe se se botlhokwa thata! Goreng re bua jalo? Ka gonne go itlwaetsa go amogela kgakololo ke bokgoni jo bo tla go tswelang mosola gone jaanong le fa o setse o godile.

•   Ka gonne re baleofi. Baebele ya re: “Rotlhe re kgotšwa makgetlo a le mantsi.” (Jakobe 3:2) Ka jalo, rotlhe re tlhoka go nna re gakololwa.

   “Ke nna ke ikgopotsa gore rotlhe re baleofi le gore re tla nna re dira diphoso. Ka jalo, fa mongwe a nnaya kgakololo, ke leka go e dirisa ke bo ke tila go boeletsa phoso e ke e dirileng.”​—David.

•   Ka gonne o ka kgona go tokafatsa. Baebele ya re: “Naya motho yo o botlhale mme o tla nna botlhale le go feta.” (Diane 9:9) Kgakololo e ka go thusa, fa fela o e amogela.

   “Ke ne ke sa rate go newa kgakololo. Ke ne ke ikutlwa e kete e ntira motho yo o sa siamang. Mme jaanong ke e amogela e bile ka dinako tse dingwe ke a e kopa. Ke batla go itse gore nka tokafatsa jang.”​—Selena.

 Gone go motlhofo go kopa kgakololo. Mme fa o e newa o sa e kopa, go ka nna thata go e amogela. Natalie o ne a newa karata e e neng e na le kgakololo e a neng a sa e kopa, a re “Ke ne ke tshogile e bile ke kgobegile marapo ka gonne ke ne ka newa kgakololo le fa gone ke ne ke ithaya ke re ke dira dilo sentle.”

 A sengwe se se tshwanang le seno se kile sa go diragalela? Fa go le jalo o ka dira eng?

•   Reetsa.

   Baebele ya re: “Ope fela yo o thibelang mafoko a gagwe o na le kitso, mme motho yo o nang le temogo o na le moya o o ritibetseng.” (Diane 17:27) Fa motho a bua le wena, o se ka wa mo tsena ganong. O se ka wa araba o tseegile maikutlo, o bo o bua sengwe se o tla se ikwatlhaelang!

   “Fa mongwe a nkgakolola, ke tla bo ke itlhaganelela go mo araba. Mme gone ke tshwanetse go ithuta go amogela kgakololo ke bo ke dira dilo sentle.”​—Sara.

•   O se ka wa leba gore go bua mang, reetsa se se buiwang.

   O ka nna wa iphitlhela o akanya ka diphoso tsa motho yo o go nayang kgakololo. Mme go tla bo go le botoka go dirisa kgakololo ya Baebele e e reng “nna bonako go utlwa, bonya go bua, bonya go shakgala.” (Jakobe 1:19) Gantsi fa motho a go naya kgakololo o a bo a lemogile sengwe. Fa o sa batle go newa kgakololo o ka se kgone go tokafatsa mo o tshwanetseng go tokafatsa gone.

   “Fa batsadi ba me ba ne ba nnaya kgakololo, ke ne ke tlhola ke tenega ke bo ke ba raya ke re, ‘ee ke a itse.’ Mme fa ke ba reetsa ke bo ke dirisa kgakolo e ba nnayang yone, ke kgona go dira dilo botoka.”​—Edward

•   Nna tekatekano.

   Fa o newa kgakololo ga go reye gore ga o kgone go dira dilo sentle. Go raya fela gore le wena o dira diphoso jaaka mongwe le mongwe. Tota le motho yo o go gakololang, ka dinako dingwe le ene a ka tlhoka go gakololwa. Baebele ya re: “Ga go na motho yo o siameng mo lefatsheng yo o nnang a dira molemo.”​—Moreri 7:20.

   “Tsala ya me o ne a nnaya kgakololo e ke neng ke akanya gore ga ke e tlhoke. Ke ne ka mo leboga, le fa gone ke ne ke kgopisegile. Fa nako e ntse e ya, ke ne ka lemoga gore o ne a bua nnete. Ke lebogela go bo a mphile kgakololo eno, ka gonne e nthusitse go bona gore ke tlhoka go tokafatsa fa kae. Fa a ka bo a sa mpolelela, nkabo ke sa itse.”​—Sophia.

•   Iketleeletse go tokafatsa.

   Baebele ya re “ope fela yo o... tlhokomelang kgalemelo o botlhale.” (Diane 15:5) Fa o amogela kgakololo ga o kitla o nna fela o utlwile botlhoko, mme o tla tokafatsa mo o tshwanetseng go tokafatsa gone. Itirele thulaganyo ya dilo tse o tlhokang go tokafatsa mo go tsone, o bo o bona gore a o kgonne go dira jalo mo dikgweding tse di latelang.

   “Selo se se ka thusang motho go amogela kgakololo, ke fa a amogela gore o dirile phoso, a kopa maitshwarelo a bo a leka go tokafatsa.”​—Emma.

 Sa botlhokwa: Baebele ya re: “Tshipi e loodiwa ka tshipi, motho le ene o betliwa ke yo mongwe.” (Diane 27:17, Tswana Central) Kgakololo ke sengwe se se ka go lootsang, gone jaanong le fa setse o godile.