Bosheng jaana kwa Queens, New York, Basupi ba ga Jehofa ba le 23 ba ne ba ya kwa ditlelaseng tsa go ithuta go bua le go bala Se-Bengali, puo e e buiwang kwa Bangladesh le kwa dikarolong tse dingwe tsa India. Khoso eno ya Basupi ba ga Jehofa e ne e dirilwe ka boikaelelo jwa go ruta puo eno ka bonako.

Se-Bengali ke nngwe ya dipuo tse dintsi tse di neng tsa rutwa kwa United States le kwa dinageng tse dingwe. Boikaelelo jwa go ithuta dipuo tseo ke go ithuta go bolelela batho ba ba buang dipuo tse dingwe molaetsa wa Baebele.

Magaly, moithuti yo o neng a ithuta Se-Bengali a re: “Batho ba ba buang Se-Bengali mo lefelong la rona ba oketsega ka bonako. Batho ba batla dikarabo tsa dipotso tsa botlhokwa tse di jaaka gore, Ke ka ntlha yang fa go na le pogo e kana kana? Fa ke bolelela batho ka ditsholofetso tsa Modimo tse di itumedisang tsa mo isagweng, ba batla go itse mo go oketsegileng. Le fa go ntse jalo, go sa itse puo ya bone go dira gore re se ka ra kgona go tswelela ka motlotlo.”

Barutisi ba dirisitse mekgwa e e kgatlhang ya go ruta go thusa baithuti gore ba ithute ka bonako. Mongwe wa mekgwa eo e ne akaretsa go ithuta go dirisiwa boitshikhinyo jwa mmele go thusa motho go gopola se a se ithutileng.

Nako le nako fa baithuti ba sena go ithuta mo tlelaseng, ba ne ba dirisa puo e ntšha e ba e ithutileng, ba etela batho ba ba buang Se-Bengali mo lefelong la bone e bile ba tlotla le bone ka dikgang tsa Baebele. Magaly a re: “Batho ba itumetse e bile ba batla go itse gore goreng ke ithuta puo ya bone. Lebaka la go bo ke iphile nako ya go ithuta puo ya bone le ba thusitse go bona botlhokwa jwa molaetsa wa rona.”

Basupi ba ga Jehofa ga ba ithute fela go bua dipuo disele mme gape ba thapisediwa go nna barutisi ba dipuo tseo. Go simolola ka Ferikgong 2006 go fitlha ka Ferikgong 2012, mo tshimong e e tlhokometsweng ke ofisi ya lekala la United States fela go ne ga tshwarwa diseminara di ka nna 38 tsa puo tse di thapisitseng batho ba le 2 244 gore e nne barutisi. Ka Lwetse 1, 2012, Basupi ba ga Jehofa ba ne ba tshwara ditlelase di ka nna 1 500 tse di rutang dipuo di le 37 mo tshimong ya lekala la United States.