Fa e sale go tloga ka Lwetse 2012, tiro e e neng e dirwa kwa diofising tsa makala tsa Basupi ba ga Jehofa di feta 20 e ne ya simolola go dirwa kwa diofising tse dikgolwane tsa makala.

Gape go na le makala a mangwe a masha a a tlhomilweng kwa Serbia le Macedonia. Go na le mabaka a mabedi a konokono a go bo go dirilwe diphetogo tseno.

Mo dingwageng tsa bosheng, kgatelopele e e dirilweng mo thekenolojing ya tlhaeletsano le ya go gatisa e dirile gore go fokodiwe badiri kwa makaleng mangwe. E re ka jaanong go fokoditswe batho ba ba direlang kwa makaleng a magolwane, go ne ga nna le mafelo a bonno a a neng a tla dirisiwa ke batho ba bangwe ba ba neng ba bereka mo makaleng a mannye kwa dinageng tse dingwe.

Jaanong mo makaleng a a kopantsweng go na le Basupi ba le bantsi ba ba nang le maitemogelo ba ba tlhokomelang tiro ya go ruta Baebele. Ka sekai, tiro ya go rera kwa Costa Rica, El Salvador, Guatemala, Honduras, Nicaragua le Panama e tlhokometswe ke lekala la Mexico. Ka ntlha ya seo, diofisi tsa makala kwa dinageng tseo tse thataro di ile tsa tswalwa.

Basupi ba le 40 ba ba tswang mo makaleng ao a le marataro ba ne ba abelwa go direla kwa lekaleng la Mexico. Ba bangwe ba ka nna 95 ba ile ba sala kwa dinageng tsa gabone mme ba tsenela tirelo ya nako e e tletseng.

Ba bangwe ba ba mo dinageng tseo tse di kwa Amerika Bogare ba ne ba simolola go bereka mo diofising tsa thanolo tse di tlhokometsweng ke lekala la Mexico. Ka sekai, Basupi ba ka nna 20 kwa Panama ba ranolela dikgatiso tsa Baebele mo dipuong tse di buiwang kwa nageng eo. Kwa Guatemala, kwa go neng go na le ofisi ya lekala gone, Basupi ba bangwe ba le 16 ba ranolela dikgatiso mo dipuong tse nnè tse di buiwang kwa nageng eo. Ka jalo, go rulaganya dilo sesha kwa Amerika Bogare go dirile gore go fokodiwe palo ya batho ba le 300 ba ba kwa ofising ya lekala gore e nne 75.

E re ka jaanong makala a kopantswe, badiredi ba ba nang le maitemogelo ba ba neng ba ntse ba direla kwa makaleng a mannye ba ka dirisa nako e ntsi mo tirong ya go rera dikgang tse di molemo.

Mokaulengwe mongwe mo Afrika, yo o neng a abelwa go ya go dira tiro ya go rera, o ne a re: “Mo dikgweding tsa ntlha di le mmalwa, go fetola botshelo jwa me gore ke tlwaele maemo a masha e ne e le kgwetlho. Le fa go ntse jalo, go nna gone ka metlha mo bodireding go dirile gore ke itumele ke bo ke bone masego a mantsi. Gone jaanong ke ithuta Baebele le batho ba le 20 mme bangwe ba bone ba setse ba tla dipokanong tsa phuthego.”