Basupi ba ga Jehofa ba Rutiwa Jang go Dira Tiro ya go Rera le go Ruta Batho Baebele?

TSHAMEKA

Basupi ba ga Jehofa ba nna ba rutiwa gore ba tshwanetse go tshela jang e re ka e le Bakeresete, mme seno se akaretsa le go dira tiro ya go rera le go ruta batho Baebele. Jesu o ile a laela balatedi ba gagwe gore ba rere le go ruta batho dikgang tse di molemo tsa Bogosi Jwa Modimo. (Mathaio 24:14; 28:19, 20) Fa re le kwa dipokanong tsa rona tsa beke le beke le kwa dikopanong tsa ngwaga le ngwaga, re katisiwa gore re kgone go rerela batho le go ba ruta. Mo godimo ga moo, Basupi ba ga Jehofa ba ba nang le maikarabelo mo phuthegong kgotsa mo mokgatlhong ba amogela katiso e e oketsegileng kwa dikolong tsa Baebele tse di kgethegileng.

Se se mo setlhogong seno:

Basupi ba ga Jehofa ba katisiwa jang?

Dipokano tsa phuthego. Beke le beke re tshwara dipokano di le pedi kwa mafelong a rona a kobamelo a a bidiwang Diholo Tsa Bogosi. Pokano e nngwe re e tshwara mo gare ga beke mme e nngwe re e tshwara ka mafelobeke. Mongwe le mongwe a ka nna gone mo go tsone mme ga go patelediwe go ntsha koleke.

Pokano ya mo gare ga beke. Re rutiwa go bala sentle, go nna le bokgoni jwa go tlotla le batho, jwa go bua fa pele ga batho ba bantsi le jwa go rera le go ruta batho Baebele. Go dirisiwa metlotlo, dipuo tse di rutang le dibidio go re katisa. Katiso eno e re thusa go nna ditswerere fa re bolelela batho molaetsa wa Baebele le fa re tshwara dithuto tsa Baebele le batho ba ba batlang go ithuta. Dipokano tseno di tswela botlhe ba ba nnang gone mosola. Se se molemo le go feta ke gore dipokano tsa rona di re nonotsha tumelo e bile di re thusa go rata Modimo le badumedimmogo le rona.
Pokano ya mafelobeke. Pokano eno e na le dikarolo tse pedi. Ya ntlha ke puo ya Baebele e e diretsweng go ruta batho botlhe segolobogolo ba e seng Basupi. Ya bobedi ke motlotlo wa dipotso le dikarabo o o theilweng mo makasineng o o ithutiwang wa Tora ya Tebelo. a Makasine ono o tlotla ka dikgang tse di tswang mo Baebeleng le melaometheo ya Baebele e e re thusang mo botshelong le mo tirong ya rona ya go rera le go ruta.

Dikopano. Ngwaga le ngwaga re nna le dikopano tse tharo tse mo go tsone go kopanang diphuthego di le dintsi. Dikopano tseno di nna le setlhogo se se theilweng mo Baebeleng, go tlotliwa ka sone go dirisiwa dipuo, dipotsolotso le dibidio. Fela jaaka dipokano tsa rona, dikopano le tsone di re thusa gore re nne le kitso e ntsi ka Baebele e bile di re thusa gore re nne le bokgoni jwa go rera le go ruta batho Baebele. Le mo go tsone, mongwe le mongwe a ka nna gone mme ga go patelediwe go ntsha koleke.

Basupi ba ga Jehofa ba na le dikolo dife tsa Baebele?

Bangwe ba Basupi ba ga Jehofa ba lalediwa go nna gone mo dikolong tse di farologaneng tsa Baebele gore ba newe katiso e e oketsegileng. Dikolo tseno ke dife? Di diretswe eng mme di tsaya lobaka lo lo kae? Ke bo mang ba ba lalediwang?

Sekolo sa Tirelo ya Bobulatsela

Boikaelelo: Go katisa bareri ba nako e e tletseng ba ba bidiwang babulatsela b gore ba nne le bokgoni mo tirong ya bone ya go rera le go ruta. Mo sekolong seno go na le metlotlo, dipuo le dibidio.
Lobaka: Malatsi a marataro.
Ba ba Lalediwang: Ba ba digetseng ngwaga e le babulatsela ba ka metlha ke bone ba ba lalediwang. Babulatsela ba go fetileng dingwaga tse tlhano ba sa lalediwe kwa sekolong seno le bone ba ka lalediwa.

Sekolo sa Baboledi ba Bogosi

Boikaelelo: Go naya bareri ba nako e e tletseng ba ba nang le maitemogelo katiso e e oketsegileng. Ba ba nnang gone mo sekolong seno ba thusiwa go tokafatsa tsela e ba rerang le e ba rutang ka yone, e bile ba ithuta Baebele ka tsela e e tseneletseng. Gantsi batho ba ba alogang mo sekolong seno ba romelwa kwa mafelong a go tlhokegang bareri kwa go one.
Lobaka: Dikgwedi tse pedi.
Ba ba Lalediwang: Babulatsela ba ba fitlhelelang dilo tse di tlhokegang e bile maemo a bone a ba letla go ya go direla gongwe le gongwe kwa go nang le tlhokego gone, ba ka tsenya kopo.

Sekolo sa Bagolwane ba Phuthego

Boikaelelo: Go thusa bagolwane c go dira maikarabelo a bone mo phuthegong a a akaretsang go ruta, go tlhokomela maloko a phuthego le go ba thusa go oketsa tsela e ba ratang Modimo le badumedimmogo ka yone.—1 Petere 5:2, 3.
Lobaka: Malatsi a matlhano.
Ba ba Lalediwang: Bakaulengwe ba e leng gone ba tlhomiwang go nna bagolwane le bagolwane ba ba nang le maitemogelo ba go fetileng dingwaga tse tlhano ba sa lalediwe kwa sekolong seno.

Sekolo sa Balebedi ba Potologo le Basadi ba Bone

Boikaelelo: Go katisa badiredi ba ba neilweng maikarabelo a go etela diphuthego ba ba bidiwang balebedi ba potologo, d gore ba kgone go dira tiro ya bone ka tsela e e molemo. (1 Timotheo 5:17) Gape sekolo seno se thusa bagolwane bano le basadi ba bone gore ba oketse tsela e ba tlhaloganyang Baebele ka yone.
Lobaka: Kgwedi e le nngwe.
Ba ba Lalediwang: Go lalediwa balebedi ba potologo le basadi ba bone ba e leng gone ba fetsang ngwaga ba dira tiro eno. Go tswa foo, ba nna ba lalediwa morago ga dingwaga di ka nna tlhano.

Sekolo sa Bodiredi sa Bogosi

Boikaelelo: Go thusa bagolwane le batlhanka ba bodiredi e gore ba kgone go dira maikarabelo a bone a go tlhokomela phuthego. (2 Timotheo 3:1) Sekolo seno se tshwarwa morago ga dingwaga di se kae.
Lobaka: Gantsi se tsaya letsatsi le le lengwe.
Ba ba Lalediwang: Balebedi ba potologo, bagolwane le batlhanka ba bodiredi.

Sekolo sa Tirelo ya Bethele

Boikaelelo: Go thusa batho ba ba dirang kwa Bethele f gore ba kgone go dira tiro e ba e neilweng le go ba thusa go rata Modimo le batho ba bangwe ka tsela e e oketsegileng.
Lobaka: Malatsi a matlhano le halofo.
Ba ba Lalediwang: Maloko a masha a Bethele a nna gone mo sekolong seno. Batho ba ba nang le lobaka ba le kwa Bethele ba go fetileng dingwaga di le tlhano ba sa ye kwa sekolong seno, le bone ba ka lalediwa gore ba nne gone gape.

Sekolo sa Baebele sa Watchtower sa Gileade

Boikaelelo: Go thusa baithuti go tlhaloganya Baebele botoka gore ba e rate le gore ba dirise se ba se ithutang. (1 Bathesalonika 2:13) Banna le basadi ba Bakeresete ba ba ikanyegang ba ba tswang kwa Sekolong sa Gileade, ba thusa thata mo phuthegong ya ga Jehofa le mo tirong ya go ruta batho Baebele e e dirwang mo lefatsheng lotlhe. Fa ba sena go aloga kwa sekolong seno, ba ka abelwa go ya go direla kwa nageng e ba tswang kwa go yone kgotsa kwa ofising ya lekala la naga eo kgotsa ba ka romelwa kwa nageng e nngwe.
Lobaka: Dikgwedi tse tlhano.
Ba ba Lalediwang: Ofisi ya lekala e ka laletsa batho ba ba direlang ka nako e e tletseng gore ba tsenye kopo. Sekolo seo se tshwarelwa kwa United States kwa Lefelong la Thuto la Watchtower kwa Patterson kwa New York.

Sekolo sa Maloko a Komiti ya Lekala le Basadi ba Bone

Boikaelelo: Go katisa Maloko a Komiti ya Lekala g gore a kgone go tlhokomela tiro e e dirwang kwa ofising ya lekala. Gape ba katisiwa go tlhokomela dilo tse di amanang le tiro ya go rera ya Basupi ba ga Jehofa e e dirwang mo dinageng tse di tlhokomelwang ke ofisi ya lekala la bone.
Lobaka: Dikgwedi tse pedi.
Ba ba Lalediwang: Ofisi ya Ntlokgolo ya Lefatshe Lotlhe ya Basupi ba ga Jehofa e laletsa maloko a a tlhophilweng a Komiti ya Lekala le basadi ba bone gore ba tle kwa sekolong seo se se tshwarelwang kwa Lefelong la Thuto la Watchtower kwa Patterson kwa New York.

Go dirisiwa eng go katisa Basupi ba ga Jehofa?

Dikolo tsotlhe tsa Basupi ba ga Jehofa di dirisa Baebele go ba katisa. Re dumela gore Baebele ke Lefoko la Modimo le gore e re ruta go tshela ka tsela e e bontshang gore re Bakeresete.—2 Timotheo 3:16, 17.

A Basupi ba ga Jehofa ba a duela fa ba katisiwa?

Nnyaa, ga ba duele. Tiro e Basupi ba ga Jehofa ba e dirang e tshegediwa ka meneelo e e ntshiwang ka go rata.—2 Bakorintha 9:7.

a Baebele le dikgatiso tsa rona tsa Baebele le dibidio, di ka fitlhelwa mo websaeteng ya rona ya jw.org.

b Babulatsela ke banna kgotsa basadi ba e leng Basupi ba ga Jehofa ba ba kolobeditsweng, ba ba ipeetseng mokgele wa go fetsa diura tse di rileng kgwedi le kgwedi ba rerela batho ba bangwe ka molaetsa o o tswang mo Baebeleng.

c Bagolwane ke banna ba Bakeresete ba ba rutang go tswa mo Dikwalong le go tlhokomela batho ba ga Jehofa ka go ba thusa le go ba kgothatsa. Bagolwane ga ba duelelwe tiro e ba e dirang.

d Molebedi wa potologo ke modiredi wa nako e e tletseng, yo beke le beke a etelang diphuthego tse di farologaneng tse a abetsweng go di tlhokomela. O neela dipuo tse di theilweng mo Baebeleng tse di kgothatsang phuthego, gape o ba kgothatsa ka go tsamaya le bone fa ba dira tiro ya go rera.

e Batlhanka ba bodiredi ba thusa phuthego ka ditiro tse di botlhokwa tse farologaneng. Fa ba dira ditiro tseo, bagolwane ba kgona go nna le nako e e oketsegileng ya go ruta phuthego le go etela ba bangwe ba ba tlhokang go kgothadiwa.

f Bethele ke leina le diofisi tsa lekala tsa Basupi ba ga Jehofa di bidiwang ka lone. Badiredi ba nako e e tletseng ba ba direlang koo, ba tshegetsa tiro e e dirwang mo dinageng tse di tlhokometsweng ke ofisi eo ya lekala.

g Komiti ya Lekala ke bagolwane ba ikanyegang. E ka nna banna ba le bararo kgotsa go feta.

Katiso e Basupi ba ga Jehofa ba e newang e ba thusitse jang?

“Ke motho yo o ditlhong, ka jalo go ne go le thata gore ke bue le batho ba ke sa ba itseng ka Baebele. Dipokano tsa mo gare ga beke di nthusitse gore ke kgone go nna pelokgale le gore ke nne le bokgoni jwa go ruta. Gape di nthusitse gore ke kgone go tokafatsa tsela e ke buang ka yone le batho ba bangwe mo phuthegong le kwa tirong.”—Natasha, wa kwa United States.
“Sekolo sa Baboledi ba Bogosi se nthutile gore ke nne motho yo o lorato, yo o pelotelele le yo o pelonomi. Ka jalo, seo se nthusitse gore ke dirisane le batho ba bangwe sentle mo phuthegong le gore ke nne tsala le moagisani yo o molemo. Sekolo seno gape se nthutile go dira dipatlisiso ka dikgang tse go buiwang ka tsone mo Baebeleng, e bile se nthutile go tlhalosa Baebele ka tsela e e thusang batho gore ba itse Modimo sentle le go mo rata.”—Stephen, wa kwa Nigeria.
“Sekolo sa Bagolwane ba Phuthego se nthusitse go nna boikokobetso gore ke kgone go nna mogolwane yo o molemo. Fa re ntse re rutiwa kwa sekolong seo, ke ile ka bona botlhokwa jwa go latela sekao sa ga Jesu.”—Luca, wa kwa Italy.
“Sekolo sa Bodiredi sa Bogosi se nthutile gore ke tshwanetse go nna botsalano, go nna pelonomi le go nna kutlwelobotlhoko fa ke dirisana le batho ba bangwe. Gape ke ithutile gore fa ke direla batho dilo dingwe, ke di dire ka go rata e seng fela ka gonne ke tshwanetse go di dira.”—Samuel, wa kwa United Kingdom
“Sekolo sa Gileade se re thusitse gore re kgone go itlhatlhoba re dirisa Baebele. (Jakobe 1:22-25) Re ne ra lemoga gore re tlhoka go tokafatsa botho jwa rona le tsela e re direlang Jehofa Modimo ka yone. Gape re ne ra ithuta gore ga re a tshwanela go itseela kwa godimo, go na le moo re tshwanetse go bontsha gore re rata ba bangwe fa re bua le bone le fa re ba direla dilo.”—Elnathan le Princess, ba kwa Philippines.