Wasomaji Wetu Wanauliza . . .

Je, Mungu Anakaa Mahali Pamoja?

▪ Dini mbalimbali zinasema kwamba Mungu yuko kila mahali, wazo linalodokeza kwamba Mungu hukaa kila mahali, wakati uleule. Kwa mfano, kitabu cha marejeo, New Catholic Encyclopedia, kinataja kwamba Mungu “yuko kila mahali na katika vitu vyote.” Vivyo hivyo, John Wesley, ambaye ndiye mwanzilishi wa Kanisa la Methodisti, aliandika hotuba yenye kichwa “Kuwapo kwa Mungu Kila Mahali.” Katika hotuba hiyo alisema kwamba “hakuna mahali, iwe ndani au nje ya ulimwengu, ambako Mungu hayuko.”

Biblia inafundisha nini? Je, Mungu yuko kila mahali, mbinguni, duniani, na hata ndani ya wanadamu wakati uleule?

Kwa kweli, Biblia inataja kwamba Mungu ana mahali fulani anapokaa, yaani, mbinguni. Biblia inataja sala ya Mfalme Sulemani ambaye alimwomba Mungu hivi: “Basi na usikilize ukiwa mbinguni, makao yako yaliyofanywa imara.” (1 Wafalme 8:43) Alipokuwa akiwafundisha wanafunzi wake jinsi ya kusali, Yesu Kristo aliwaambia waelekeze sala zao kwa ‘Baba yao aliye mbinguni.’ (Mathayo 6:9) Baada ya kufufuliwa, Biblia inasema Kristo “aliingia mbinguni kwenyewe, ili sasa aonekane mbele za uso wa Mungu.”—Waebrania 9:24.

Mistari hiyo inaeleza wazi kwamba Yehova Mungu hakai kila mahali, bali mbinguni pekee. Bila shaka, “mbingu” zinazotajwa katika mistari hiyo hazirejelei anga hewa linaloizunguka dunia wala anga kubwa la juu kabisa ya dunia. Mbingu tunazoona haziwezi kumtosha Muumba wa ulimwengu. (1 Wafalme 8:27) Biblia inasema kuwa “Mungu ni Roho.” (Yohana 4:24) Mungu anakaa katika mbingu za kiroho, eneo lililo tofauti kabisa na ulimwengu.—1 Wakorintho 15:44.

Namna gani mistari ya Biblia inayoonekana kudokeza kwamba Mungu anakaa kila mahali? Kwa mfano, kama inavyoelezwa katika Zaburi 139:7-10, Daudi alisema hivi kumhusu Mungu: “Ni wapi ninapoweza kwenda mbali na roho yako, na ni wapi ninapoweza kukimbilia mbali na uso wako? Kama ningepanda mbinguni, ungekuwa huko; na kama ningetandika kitanda changu katika Kaburi, tazama! ungekuwa huko. Kama ningechukua mabawa ya mapambazuko, ili nipate kuishi katika bahari ya mbali sana, huko, pia, mkono wako ungeniongoza.” Je, mistari hiyo inaonyesha kwamba Mungu kwa kweli hukaa kila mahali, akiishi katika sehemu zote ambazo zimetajwa?

Ona kwamba kwanza Daudi aliuliza: “Ni wapi ninapoweza kwenda mbali na roho yako?”  * Kwa kutumia roho yake takatifu, Mungu anaweza kuona kila kitu na kuelekeza nguvu zake kila mahali, bila kwenda au kuishi hapo kihalisi. Kwa mfano: Katika siku za hivi karibuni wanasayansi wameweza kuchunguza udongo wa sayari ya Mihiri, iliyo mamilioni ya kilomita kutoka duniani. Jinsi gani? Si kwa kusafiri kihalisi hadi huko, bali kwa kuchunguza picha zenye habari nyingi na pia habari nyingine zinazotumwa duniani na vyombo fulani vya angani ambavyo vimetumwa kwenye sayari hiyo.

Vivyo hivyo, Yehova Mungu hahitaji kuwa kila mahali, ili kuona kinachoendelea katika kila sehemu ya dunia. Neno la Mungu linasema: “Hakuna kiumbe kisichokuwa wazi machoni pake.” (Waebrania 4:13) Kwa kweli, nguvu nyingi za utendaji za Yehova, au roho yake takatifu, zinaweza kufika mahali popote, zikimwezesha kuona kila kitu na kutimiza mapenzi yake akiwa mahali fulani hususa, ‘makao yake matakatifu’ huko mbinguni.—Kumbukumbu la Torati 26:15.

[Maelezo ya Chini]

[Picha katika ukurasa wa 27]

IAC/RGO/David Malin Images